اۋىلدى دامىتۋ جوبالارى

مۇنداعى تۇرعىنداردى جۇمىسسىزدىق, توزى­عى جەتكەن كوممۋنالدىق ينفراقۇرىلىم, تۇر­عىن ءۇي قىمباتشىلىعى جانە مەديتسينا قىزمەت­كەرلەرىنىڭ تاپشىلىعى ماسەلەلەرى تولعاندىرادى. پارتيا توراعاسى ەرلان قوشانوۆ پارتيا اۋىل تۇرعىندارىنىڭ ءال-اۋقاتىن ارتتىرۋ ماقساتىندا جىلدىق مولشەرلەمەسى 2,5%-دى قۇرايتىن جەڭىلدەتىلگەن نەسيە بەرۋ, ليزينگ ارقىلى اۋىل شارۋاشىلىعى تەحنيكاسىن جاڭارتۋ, كووپەراتيۆتەر قۇرۋ ىسىنە اتسالىساتىنىن اتاپ ءوتتى. بۇل باستاما «اۋىل اماناتى» جوباسى اياسىندا قولعا الىنادى.

ە.قوشانوۆ پارتيانىڭ باستى مىندەتىنىڭ ءبىرى – ۇكىمەت نازارىن تەك ءىرى قالالار مەن استاناعا عانا ەمەس, وڭىرلەرگە اۋدارۋ ەكەنىن ايتتى. «كوپشىلىك قازاقستاندىقتار ءۇشىن تۇرعىن ءۇي ساتىپ الۋ ماسەلەسى قيىنداي ءتۇستى. جوعارى پايىزدىق مولشەرلەمە مەن ينفلياتسيا ايتارلىقتاي كەدەرگى كەلتىرىپ جاتىر. ءبىزدىڭ كۇش-جىگەرىمىز قالا مەن اۋىل تۇرعىندارىنىڭ ءومىر سۇرۋىنە قولايلى جاعداي جاساۋعا باعىتتالادى. ياعني وتانداستارىمىز تۇرعىن ۇيمەن جانە ساپالى ينفراقۇرىلىممەن قامتاماسىز ەتىلۋگە ءتيىس», دەدى پارتيا توراعاسى.

الداعى 5 جىلدا جامبىل وبلىسىندا 9 مىڭعا جۋىق وتباسى باسپانالى بولادى. ال جالپى ەل اۋماعىندا «Amanat» پارتياسى 730 مىڭنان استام وتباسى ءۇشىن قولجەتىمدى باعاداعى 78 ميلليون شارشى مەتردەن استام جاڭا تۇرعىن ءۇي سالۋ جوسپارىن ىسكە اسىرۋعا كەپىلدىك بەرەدى. بۇعان قوسىمشا, اپاتتى جانە توزىعى جەتكەن تۇرعىن ۇيلەردىڭ 30 مىڭعا جۋىق يەسى جاڭا پاتەرگە كوشۋگە مۇمكىندىك الادى. ال جۇمىسپەن قامتۋ ماسەلەسىن شەشۋ ءۇشىن 2027 جىلدىڭ سوڭىنا دەيىن «Amanat» پارتياسى جامبىل وبلىسىندا كەمىندە 84 مىڭ جۇمىس ورنىن قۇرۋعا ىقپال ەتەدى.

ال پارتيانىڭ رەسپۋبليكالىق سايلاۋالدى شتابىنىڭ مۇشەلەرى ايدوس سارىم مەن الماس الماتوۆ قىزىلوردا وبلىسىنداعى ۇگىت جۇمىسى اياسىندا جالاعاش اۋدانىنا قاراستى تاڭ جانە اققۇم اۋىلدىق وكرۋگتەرىندەگى سايلاۋشىلارمەن كەزدەستى. مۇندا كانديداتتار «تاڭ لتد» جشس ەڭبەك ۇجىمىمەن جۇزدەسىپ, ديقاندارعا پارتيانىڭ سايلاۋالدى باعدارلاماسىن تانىستىردى. ء«بىز كوكتەمگى ەگىس جۇمىستارىنا فەرمەرلەر ءۇشىن جەڭىلدىكپەن جانار-جاعارماي ءبولۋدىڭ اشىق ءارى ءادىل تەتىگىن ەنگىزەمىز», دەدى ايدوس سارىم.