85 جاسىندا ەۋروپانىڭ باس جۇلدەسىن يەلەندى

تاريحقا كوز جۇگىرتسەك جاسى ۇلعايسا دا ءوزىنىڭ جاس كەزىندەگى قارىم-قابىلەتىن جوعالتپاعان ايرىقشا جاندار جونىندەگى دەرەكتەرگە تاپ بولامىز. ال جاسى سەكسەننىڭ بەسەۋىنە قاراعان ورالدىق اقساقال ءدارجان يمانعاليەۆتىڭ ءجونى تىپتەن بولەك. بۇل كىسىنىڭ سانالى عۇمىرى بيزنەس دەگەن ۇعىم مەن تۇسىنىك تىلدىك قورىمىزعا دەندەپ كىرە قويماعان سوناۋ كەڭەستىك كەزەڭدە وتكىزىلگەن. ول سول ۋاقىتتا وبكومنىڭ قارجى-شارۋاشىلىق ءبولىمىن باسقارعان.

داكەڭ مۇندا ۇزاق جىلدار بويى ابىرويمەن ەڭبەك ەتىپ, قۇرمەتتى ەڭبەك دەمالىسىنا شىققان كەزدە سوتسياليستىك قوعامى­نىڭ شەگەلەرى بىلقىلداپ, بوساي باستاعان بولاتىن. ءوزى­نىڭ كۇش-قايراتى جانە ەرىك-جىگەرىنىڭ مولدىعىمەن تالايلاردى تاڭعالدىرىپ كەلگەن ەل اعاسى, ارينە, قاراپ جاتا المادى. ءسوي­تىپ, كەڭەس ءداۋىرىنىڭ وزىندە بيزنەسكە بىلەك سىبانا كىرىسىپ كەت­­­تى. بۇل كەزدە قوعامدا بانكىدەن نەسيەلىك قاراجاتتار الىپ, وعان قۇ­رىلىس نىساندارىن سالۋ ىسىنە مۇلدەم تۇرەن تۇسپەگەن ەدى. مىنە, الپىستان اسقان شاعىندا, سوناۋ 90-جىلداردىڭ باس كەزىندە د.يمانعاليەۆ رەسپۋبليكادا العاشقىلاردىڭ ءبىرى بولىپ, وسىنداي تىڭ قادامعا بارۋعا بەكەم بەل بۋدى. كوز قورقاق, قول باتىر دەگەندەي, كوپ كەشىكپەي قولعا العان ءىسىن باستاپ تا كەتتى. تاعى ءبىر سۇيسىنەرلىك جايت, جاڭالىقتى جاتسىنباعان دارا قاسيەت يەسى ءدارجان تىلەش ۇلىنىڭ باستاماسىمەن تۇرعىزىلعان ەڭسەلى عيماراتتار مەن نىساندار ورال قالاسىنىنڭ ارحيتەكتۋرالىق اجارىنا ايرىقشا ۇلەس قوستى. اۋەل باستا بەرىك نەگىز قالانسا – بيزنەس قاشاندا تابىس­تى­ جۇرەتىنىنە, توقتاپ, توقىراپ قالمايتىنىنا 85-كە كەلگەن اق­جايىق­تىڭ اسا سىيلى, ابىرويلى اقساقالى ءدارجان يمانعا­ليەۆ جەتەكشىلىك جاسايتىن كاسىپورىننىڭ تىنىس-تىرشىلىگى ارقىلى دا كوز جەتكىزە الامىز. ول بۇگىندە ءوز بيزنەسىنىڭ 25 جىل­دىق اسۋىن اتاپ وتۋگە قام جاساپ وتىر. ەڭ باستىسى, مۇندا ادام­دار تۇراقتى جۇمىسپەن قامتىلعان. سەركىتەستىكتەگى تابىس كوزدەرى­نىڭ جىلدان-جىلعا وسە ءتۇسۋى ولاردىڭ بەرىك سەنىمدەرىن ورنىقتىرعان. سەكسەننىڭ سەڭگىرىنەن الدەقاشان اسىپ كەتسە دە, بيزنەستىڭ قۇپيا سىرلارىنا ۇڭىلۋدەن تانباعان ەل اقساقالى تاياۋدا حالىقارالىق ماراپاتقا دا يە بولدى. وعان سوناۋ شۆەيتساريادان ساپا ءۇشىن بەلگىلەنگەن ەۋروپانىڭ باس جۇلدەسى جەتكىزىلدى. وتكەن مامىر ايىندا اقجايىقتىڭ اقساقال بيزنەسمەنى جەنەۆادان شاقىرۋ العان بولاتىن. وكىنىشكە قاراي, ول بۇل ساپارعا دەنساۋلىعىنا بايلانىس­تى بارا المادى. سودان كەيىن اتالعان حالىقارالىق ماراپاتتى تاعايىنداعاندار ونى قازاقستانعا, ونىڭ يەسىنە جەتكىزىپ بەردى. اتالعان حالىقارالىق ماراپاتتىڭ قىر-سىرىنا تەرەڭىرەك توقتالساق, شۆەيتساريانىڭ فرانتسۋز ءتىلدى كاسىپكەرلەر فەدەرا­تسياسىنىڭ ونەركاسىپ جانە تەحنولوگيالار اگەنتتىگى 2014 جىلعى 26 مامىرداعى شەشىمىمەن «شاعىن بيزنەس كاسىپورنىن تابىس­تى باسقارۋ» اتتى اتالىمىنداعى حالىقارالىق كونكۋرستىڭ قورىتىندىسىن شىعارعان. سوعان سايكەس اتالعان اگەنتتىك 85 جاستاعى قازاقستاندىق كاسىپكەر ءدارجان يمانعاليەۆ پەن ول باسقاراتىن «تىلەش» جشس-ءىن جەڭىمپاز دەپ تاۋىپتى. بۇل ءسوز جوق, جوعارعى ايتىپ وتكەنىمىزدەي جاسى ۇلعايسا دا ىزدەنىسىن توقتاتپاعان, ءوز بويىنداعى قارىم-قابىلەتىن جوعالتپاعان ورال وڭىرىندەگى شاعىن بيزنەس وكىلى ءۇشىن ۇلكەن ابىروي, بيىك مارتەبە, ءارى ءوز ۋاقىتىنا جەتپەي شاۋ تارتىپ قالعاندار ءۇشىن ۇلگى-ونەگە ەكەنى انىق. سوندىقتان دا, ءبىز بۇگىن وسى جاعىمدى جاڭا­لىق­تى گازەت وقىرماندارىنىڭ نازارىنا ۇسىنعاندى ءجون كوردىك. تەمىر قۇسايىن, «ەگەمەن قازاقستان». باتىس قازاقستان وبلىسى.