بيىل مىڭنان اسا ستۋدەنت پرەزيدەنت شاكىرتاقىسىن الادى

اتالعان ستيپەنديالار قازاقستاندىق جوو مەن جوعارى وقۋ ورنىنان كەيىنگى ءبىلىم بەرۋ ۇيىمدارى اراسىندا بولىنەدى.

ەڭ كوپ شاكىرتاقى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىنە ءبولىندى - 100. سونداي-اق ماگيسترانتتارعا 2 شاكىرتاقى ءبولىندى.

ءال-فارابي اتىنداعى قازاق ۇلتتىق ۋنيۆەرسيتەتى مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە 94 شاكىرتاقى ءبولىندى.

م.اۋەزوۆ اتىنداعى وڭتۇستىك قازاقستان ۋنيۆەرسيتەتى 60 پرەزيدەنتتىك شاكىرتاقى الادى.

ا.بايتۇرسىنوۆ اتىنداعى قوستاناي وڭىرلىك ۋنيۆەرسيتەتىنىڭ ستۋدەنتتەرىنە 55 پرەزيدەنتتىك ستيپەنديا تاعايىندالادى.

س. امانجولوۆ اتىنداعى شىعىس قازاقستان ۋنيۆەرسيتەتىنە 34, م.قوزىباەۆ اتىنداعى سولتۇستىك قازاقستان ۋنيۆەرسيتەتىنە 27 شاكىرتاقى ءبولىندى.

بارلىعى 55 جوعارى وقۋ ورنىنىڭ ستۋدەنتتەرىنە 1005 پرەزيدەنتتىك شاكىرتاقى, ماگيسترانتتارعا تاعى 7 شاكىرتاقى بولىنەدى.

قۇجات «اشىق نقا» سايتىندا 20 ناۋرىزعا دەيىن ورنالاستىرىلدى.

قازاقستان رەسپۋبليكاسى پرەزيدەنتىنىڭ شاكىرتاقىسى مەملەكەتتىك تاپسىرىس نەگىزىندە دە, اقىلى نەگىزدە دە تەك «وتە جاقسى» وقيتىن كۇندىزگى ءبولىمنىڭ 3-كۋرسىنان باستاپ وقۋدىڭ بارلىق كەزەڭىنە تاعايىندالادى.

ستيپەنديا ستۋدەنتتەردىڭ كەلەسى ساناتتارىنا بەرىلەدى:

رەسپۋبليكالىق جانە حالىقارالىق وليمپيادالاردىڭ, شىعارماشىلىق بايقاۋلاردىڭ, سپورتتىق بايقاۋلاردىڭ, فەستيۆالدەردىڭ جەڭىمپازدارى نەمەسە جاڭالىقتاردىڭ, ونەرتابىستاردىڭ اۆتورلارى;

عىلىمي ەڭبەكتەر جيناقتارىندا, رەسپۋبليكالىق جانە حالىقارالىق عىلىمي جۋرنالداردا جاريالانىمدارىنىڭ بولۋى;

عىلىمي-زەرتتەۋ جۇمىستارىمەن بەلسەندى اينالىساتىن ستۋدەنتتەر. ونىڭ تابىسى ديپلومدارمەن, سەرتيفيكاتتارمەن راستالادى;

ۋنيۆەرسيتەتتىڭ قوعامدىق, مادەني جانە سپورتتىق ومىرىنە بەلسەندى قاتىسۋ.

ستيپەنديالاردى تاعايىنداۋ كەزىندە ۇمىتكەرلەردى ىرىكتەۋ جوعارىداعى كريتەريلەر تارتىبىمەن جۇزەگە اسىرىلادى.

ستۋدەنتتەرگە ارنالعان پرەزيدەنتتىك شاكىرتاقى مولشەرى 73 320 تەڭگە; ماگيسترانتتارعا – 173 974 تەڭگەنى قۇرايدى.