ەلدىڭ ساياسي جۇيەسىندەگى باستى وقيعالاردىڭ ءبىرى – سايلاۋ ناۋقانى. سەبەبى, سايلاۋ ناۋقانىندا ساياسي جۇيەنىڭ لەگيتيمدىلىگى مەن سايلاۋشىلاردىڭ جۇيەگە قاتىستى كوڭىل كۇيى انىقتالادى. اقتوبە وبلىسى – ەلىمىزدىڭ ەكونوميكالىق جانە الەۋمەتتىك جاعىنان قارقىندى دامىپ كەلە جاتقان الدىڭعى قاتارلى وڭىرلەرىنىڭ ءبىرى.
ەلىمىزدىڭ وندىرىستىك, مەديتسينالىق سالاسىن كاسىبي ماماندارمەن قامتاماسىز ەتىپ كەلە جاتقان ايماقتا دەموگرافيالىق جاعىنان دا تۇراقتى ءوسىم بار. ونىڭ ۇستىنە, ءوڭىر تۇرعىندارىنىڭ ساياسي بەلسەندىلىگى جىلدان-جىلعا ارتىپ كەلەدى. سوندىقتان دا بولار ورتالىق بيلىكتىڭ اقتوبە ايماعىنا نازارى وزگەشە. ورتالىق سايلاۋ كوميسسياسىنىڭ مالىمەتى بويىنشا بۇگىندە پارلامەنت ماجىلىسىنە دەپۋتاتتىققا اقتوبە وبلىسىنان ءبىرمانداتتى سايلاۋ وكرۋگى بويىنشا 16 ۇمىتكەر تىركەۋدەن وتكەن. ونىڭ 6-سى ايەل, 10-ى ەر ادام. ۇمىتكەرلەردىڭ ورتاشا جاسى – 54-تە. ال وبلىستىق, قالالىق جانە اۋداندىق ماسليحاتتارعا 686 ۇمىتكەر تىركەلدى.
پرەزيدەنت ق.توقاەۆتىڭ باستاماسىمەن جۇزەگە اسىرىلىپ جاتقان ساياسي رەفورمالار ايماقتاردىڭ ساياسي بەلسەندىلىگىن ارتتىرۋدى كوزدەپ وتىر. سونىڭ ءبىر كورىنىسى – ەل بولاشاعىنا بەي-جاي قارامايتىن بەلسەندى ازاماتتار وزدەرىن سايلاۋ ورگاندارىنا ۇمىتكەر رەتىندە ۇسىنۋعا مۇمكىندىك الدى. ەلىمىزگە ماجوريتارلى سايلاۋ جۇيەسىنىڭ قايتا ورالۋى, ياعني ءماجىلىستىڭ 30 پايىزى ءبىرمانداتتى وكرۋگتەردەن سايلانعان دەپۋتاتتاردان جاساقتالۋى – ازاماتتاردىڭ ساياسي ومىرگە ارالاسۋىنا كەڭ جول اشادى ءارى ەلدەگى ساياسي باسەكەلەستىك پەن كۇرەستىڭ شىنايى دەموكراتيالىق ءمانىن كورسەتەدى. بۇل – ءبىر. ەكىنشىدەن, ءماجىلىس جانە بارلىق دەڭگەيدەگى ءماسليحاتتار سايلاۋىنا جاڭادان قۇرىلعان ساياسي پارتيالار قاتىسادى. بۇل پارتيالار قازىرگى تاڭداعى وزەكتى ماسەلەلەردى قوزعاپ, پارلامەنتتەن ورىن الماق ويى بار. ولاردىڭ ماقساتى قانشالىقتى جۇزەگە اساتىندىعىن الداعى سايلاۋ كورسەتەدى. دەگەنمەن ءبىزدىڭ ويىمىزشا قازىرگى جاعدايدا ولاردىڭ مۇمكىندىگى جەتكىلىكتى. سەبەبى, ولار ساياسي جۇيەدەگى جاڭا ويىنشىلار رەتىندە سايلاۋشىلاردىڭ تاڭداۋىنا ىقپال ەتەدى. ۇشىنشىدەن, پروپورتسيونالدى سايلاۋ جۇيەسىندەگى پايىزدىق كەدەرگىنى 7-دەن 5-كە ءتۇسىرۋ ساياسي پارتيالار ءۇشىن ۇلكەن جەڭىلدىك جانە باستى مۇمكىندىك بولدى. ءوز كەزەگىندە بۇل قوعامداعى دەموكراتيالىق ۇردىستەردىڭ ءارى قاراي دامۋىنا ىقپال ەتەرى ءسوزسىز. تورتىنشىدەن, سايلاۋ بيۋللەتەنىنە «بارلىعىنا قارسىمىن» گرافاسىنىڭ ەنگىزىلۋى سايلاۋشىلاردىڭ كوڭىل كۇيىن انىقتاۋعا جول اشادى. وسى ارقىلى ساياسي پارتيالاردىڭ قوعامداعى الاتىن ورنى مەن ءرولىن كورۋگە بولادى. بەسىنشىدەن, كونستيتۋتسياعا جانە سايلاۋ تۋرالى زاڭعا ەنگىزىلگەن وزگەرىستەر مەن تولىقتىرۋلار سايلاۋدىڭ وتۋىنە دە بىرقاتار وزگەشەلىكتەر الىپ كەلەدى. دەمەك, سايلاۋ بارىسىنداعى ۇگىت-ناسيحات جۇمىستارىندا باسەكەلەستىك كۇشەيەدى.
تۇجىرىمدارىمدى ورتاعا سالا وتىرىپ, سايلاۋدىڭ شىنايى ءارى دەموكراتيالىق نورمالارعا ساي ءوتۋى تەك عانا بيلىككە ەمەس, سونىمەن قاتار سايلاۋشىلارعا دا تىكەلەي بايلانىستى دەگىم كەلەدى. سول سەبەپتى ەل تۇرعىندارى سايلاۋ كۇنى ءوز داۋىس بەرۋ ۋچاسكەلەرىنە كەلىپ, ازاماتتىق تاڭداۋىن جاساعانى ءجون.
اسحات كەڭەسوۆ,
ساياسي عىلىمدار كانديداتى, ق.جۇبانوۆ اتىنداعى اقتوبە وڭىرلىك ۋنيۆەرسيتەتى الەۋمەتتىك-ساياسي پاندەر كافەدراسىنىڭ دوتسەنتى
اقتوبە