دەنساۋلىق ساقتاۋ ءمينيسترى اجار عينيات اتىراۋ وبلىسىنا جۇمىس ساپارى كەزىندە 150 توسەككە ارنالعان وبلىستىق كارديولوگيالىق ورتالىققا باردى, وندا بۇگىندە 200-گە جۋىق مەديتسينا قىزمەتكەرى جۇمىس ىستەيدى, دەپ حابارلايدى Egemen.kz.
قازىرگى ۋاقىتتا بۇل جەردە اورتوكورونارلىق شۋنتتاۋ جانە ماگيسترالدىق تامىرلارعا قاقپاقشالىق حيرۋرگيا, ەندوۆاسكۋليارلىق ارالاسۋلار (كورونارلىق, كۇرە جانە پەريفەريالىق ارتەريالاردى ستەنتتەۋ), سونداي-اق كوپ بەيىندى حيرۋرگياداعى ەندوسكوپيالىق جانە اشىق وپەراتسيالار سياقتى جالپى جۇرەك وپەراتسيالارىنىڭ بارلىعى دەرلىك جاسالادى.
مىسالى, اۋىل تۇرعىندارى ءۇشىن مەديتسينالىق كومەكتىڭ قولجەتىمدىلىگى تۋرالى سۇراققا اجار عينيات اۋىلدىق دەنساۋلىق ساقتاۋدى جاڭعىرتۋ جونىندەگى ۇلتتىق باعدارلامانى ىسكە اسىرۋ تۋرالى ايتىپ بەردى. ونىڭ شەڭبەرىندە اتىراۋ وبلىسىندا 2023-2024 جىلدار ارالىعىندا 18 العاشقى مەديتسينالىق-سانيتاريالىق كومەك وبەكتىلەرىن, ونىڭ ىشىندە 11 مەديتسينالىق پۋنكت, 6 فەلدشەرلىك-اكۋشەرلىك پۋنكت, 1 دارىگەرلىك امبۋلاتوريا سالۋ جوسپارلانۋدا. ول سونداي-اق اۋداندىق اۋرۋحانالار دەڭگەيىندە دە وزگەرىستەر بولاتىنىن, وندا قوسىمشا بولىمشەلەر اشىلاتىنىن جانە جاڭا مەديتسينالىق جابدىقتارمەن جاراقتاندىرۋ جوسپارلاناتىنىن ايتتى.
اكىمدىكتىڭ مالىمەتىنشە, جىل باسىندا اتىراۋ وبلىسىندا 280-نەن استام مەديتسينا مامانى, ونىڭ ىشىندە 183 دارىگەر جەتىسپەيدى, بۇل رەتتە اكۋشەر-گينەكولوگتارعا اسا قاجەتتىلىك بار. دەنساۋلىق ساقتاۋ مينيسترلىگىنىڭ دەرەكتەرى بويىنشا وڭىرلەرگە كادرلاردى تارتۋ ماقساتىندا 2022-2023 وقۋ جىلىنا رەزيدەنتۋرادا ماماندار دايارلاۋعا 24 ورىن, ونىڭ ىشىندە ەكى اكۋشەر-گينەكولوگ ءۇشىن ءبولىندى.