قازاقستان حالىق پارتياسىنان ءماجىلىس دەپۋتاتتىعىنا كانديدات ولگا بەرەزۋتسكايا قوستانايداعى سوكولوۆ-سارىباي تاۋ-كەن بايىتۋ وندىرىستىك بىرلەستىگىنىڭ ۇجىمىمەن كەزدەسىپ, سايلاۋالدى ۇگىت-ناسيحات جۇمىستارىن جۇرگىزدى.
«حالىق پارتياسى جالدامالى جۇمىسشىلاردىڭ, قىزمەتكەرلەردىڭ الەۋمەتتىك قۇقىعىن قورعاۋ جولىندا ەڭبەك ەتىپ كەلەدى. ءبىز قۋاتتى ورتا تاپتىڭ قالىپتاسۋىن قولداي وتىرىپ, تابيعي شيكىزاتتى – مۇناي-گاز, مۇناي-حيميا, تاۋ-كەن مەتاللۋرگياسىن ءوندىرۋ جانە وڭدەۋ سالاسى ەڭبەككەرلەرىن دە نازاردان تىس قالدىرمايمىز. ءبىز وسى كۇنگە دەيىن ءماجىلىس مىنبەرىنەن مەتاللۋرگتەر مەن كەنشىلەردىڭ وزەكتى ماسەلەلەرىن كوتەردىك», دەدى ولگا بەرەزۋتسكايا.
پارتيا اۋىر, زياندى نەمەسە قاۋىپتى جۇمىستاردا ىستەيتىن قىزمەتكەرلەردى 50-55 جاستان زەينەتكە شىعارۋدى تالاپ ەتەدى. سونداي-اق ول ەلدىڭ بيلىگى مەن بايلىعى قازاقستان حالقىنا تيەسىلى بولۋ كەرەك دەگەندى العا تارتتى. حالىق پارتياسى ءسوتسياليزمدى جاقتايدى. ءاربىر تۇرعىن لايىقتى ءومىر ءسۇرۋ ءۇشىن تەگىن مەديتسينا مەن بىلىمگە قول جەتكىزۋى قاجەت. پارتيا ەڭ تومەنگى جالاقى مولشەرىن 140 مىڭ تەڭگەگە دەيىن كوتەرۋ قاجەت دەپ وتىر. جالپى, ءاربىر وتباسىنىڭ قۇرامىن ەسكەرە وتىرىپ, ازىق-ت ۇلىككە, دەنساۋلىق ساقتاۋعا, كوممۋنالدىق قىزمەتكە, بىلىمگە, اۆتوجولدارعا ناقتى شىعىندار مولشەرىندە سالىق سالىنبايتىن جانە الىم الىنبايتىن ەڭ تومەنگى كۇنكورىس دەڭگەيىن ەنگىزۋ كەرەك. حالىق پارتياسى جىنىسىنا, ناسىلىنە, ەتنوسىنا جانە دىنىنە قاراماي, قازاقستاننىڭ بارلىق ازاماتتارىنىڭ قۇقىقتارى مەن مۇمكىندىكتەرى تەڭ بولۋعا ءتيىس دەپ سانايدى.
ال پارلامەنت ءماجىلىسى دەپۋتاتتىعىنا كانديدات, قحپ توراعاسىنىڭ ورىنباسارى الەكساندر ميليۋتين اباي وبلىسىنداعى «بۇركىتوۆا» جشس ۇجىمىمەن كەزدەستى. ول ۇجىمعا حالىق پارتياسىنىڭ سايلاۋالدى باعدارلاماسىن تانىستىردى. ونىڭ ايتۋىنشا, ەل بايلىعىنىڭ دەنى وليگارحتاردىڭ قولىندا. مونوپوليالار رەسۋرستاردى ءراسۋالاپ, ءومىردىڭ بارلىق سالاسىنداعى سىبايلاس جەمقورلىق ميلليونداعان قاراپايىم ادامنىڭ بولاشاعىنا بالتا شاپقانى راس. «حالىق پارتياسى حالىق كاپيتاليزمىن قولدايدى. بۇل قۋاتتى ورتا تاپتىڭ قالىپتاسۋى جانە الەۋمەتتىك مەملەكەت قۇرۋ دەگەن ءسوز», دەدى كانديدات.