«Respublica» پارتياسى جاڭا مۇشەلەرىنىڭ سانى بويىنشا قوستاناي وبلىسى كوش باستاپ تۇر. بۇل تۋرالى پارتيانىڭ وسى وبلىستاعى شارالارى كەزىندە ايتىلدى. وڭىردە پارلامەنت سايلاۋى قارساڭىندا حالىقتىڭ ساياسي بەلسەندىلىگىنىڭ جوعارى ەكەنىن اتاپ وتۋگە بولادى.
وسىلايشا, تەك سوڭعى كۇندەردىڭ وزىندە قوعامنىڭ بارلىق سالاسىندا كۇردەلى رەفورمالار جۇرگىزۋ قاجەتتىگىن قولداپ, پارتيا قاتارىنا 15 مىڭنان استام ادام قوسىلدى. ال «Respublica» وكىلدەرىنىڭ قوستانايداعى حالىقپەن كەزدەسۋىنە 1000-نان استام تۇرعىن قاتىستى.
– بىرىنشىدەن, بەلسەندىلىكتەرىڭىز ءۇشىن سىزدەرگە العىس ايتقىم كەلەدى. سوڭعى كەزدەرى ءبىر عانا قوستاناي وبلىسىندا «Respublica» پارتياسىنىڭ قاتارىنا 15 مىڭنان استام ادام مۇشەلىككە ءوتتى. بۇل ءبىزدىڭ پارتياعا دەگەن سەنىمنىڭ جوعارى ەكەنىن جانە «Respublica» ۇسىنعان ساياسي جانە ەكونوميكالىق رەفورمالار باعىتىن قولدايتىندارىڭىزدى كورسەتەدى. ءبىز سىزدەردىڭ سەنىمدەرىڭىزدى اقتاۋعا بار كۇش-جىگەرىمىزدى سالامىز, – دەدى پارتيا توراعاسى ايداربەك قوجانازاروۆ.
قوستاناي وبلىسىنىڭ اۋىل شارۋاشىلىعى وبلىس ەكونوميكاسىنىڭ ەكىنشى نەگىزگى باعىتى بولىپ سانالادى. ونەركاسىپتە 119 مىڭنان استام ادام جۇمىس ىستەيدى, بۇل جالپى جۇمىسپەن قامتىلعان حالىقتىڭ 25 پايىزدان استامىن قۇرايدى. وڭىردە ەگىس كولەمى 5,1 ميلليون گەكتاردان اسىپ, جۇزدەگەن شارۋا قوجالىقتارى ءىرىلى-ۇساقتى مال وسىرەدى, ءسۇت-تاۋارلى, ءتىپتى قۇلپىناي فەرمالارى دامىپ, ونداعان ينۆەستيتسيالىق جوبالار جۇزەگە اسىرىلۋدا. وسىلايشا, اۋىل شارۋاشىلىعىنىڭ ءارتۇرلى سالالارى ءدال وسى جەردە كەڭىنەن ۇسىنىلعان.
– قوستاناي وبلىسى ءۇشىن اۋىل شارۋاشىلىعى – وتە پەرسپەكتيۆالى سالا. ال بۇكىل ەل اۋماعىندا اۋىل شارۋاشىلىعى سالاسىن دامىتۋ ءبىز سايلاۋالدى باعدارلامامىزدا ەرەكشە نازار اۋدارىپ وتىرعان شەشۋشى فاكتورعا اينالىپ وتىر. كۇشتى اگروونەركاسىپتىك سەكتور ازاماتتاردىڭ جوعارى ورتاشا ءومىر ءسۇرۋ دەڭگەيىن قامتاماسىز ەتۋمەن, ءونىمدى جۇمىسپەن قامتۋدىڭ وسۋىمەن, وڭدەۋ ونەركاسىبىنىڭ جانە جوعارى تەحنولوگيالاردىڭ دامۋ دارەجەسىمەن تىكەلەي بايلانىستى. سوندىقتان ءبىز اۋىل شارۋاشىلىعىندا وزىق تەحنولوگيالاردى كەڭ كولەمدە قولدانۋدى, سالانى قارجىلاندىرۋ ماسەلەلەرىن شەشۋدى جاقتايمىز, – دەدى پارتيا توراعاسى.