قازاقستان حالىق پارتياسىنىڭ توراعاسى, پارلامەنت ءماجىلىسى دەپۋتاتتىعىنا كانديدات ەرمۇحامەت ەرتىسباەۆ پەن پارتيا مۇشەلەرى يرينا سميرنوۆا, اسىلبەك نۇرالين وسكەمەندەگى گەس پەن وبلىستىق پوليتسيا دەپارتامەنتىنە قاراستى ەمحانا ۇجىمىمەن كەزدەستى.
سپيكەرلەر پارتيانىڭ سايلاۋالدى باعدارلاماسىنىڭ باسىم باعىتتارىن دا ءتۇسىندىرىپ ءوتتى. ء«بىز كلاندىق-وليگارحيالىق كاپيتاليزم جۇيەسىنە قارسىمىز. ءبىز ءسوتسياليزمدى قولدايمىز. باي ازاماتتار – باي مەملەكەت, مىقتىلارعا – جۇمىس, مۇقتاجدارعا قامقورلىق قاجەت», دەدى ە.ەرتىسباەۆ.
كەزدەسۋ بارىسىندا پارتيا توراعاسى جەر جانە جەر قويناۋى حالىققا تيەسىلى بولۋ كەرەك ەكەنىن ەرەكشە اتاپ ءوتتى.
– ءبىز ەلىمىزدىڭ ءاربىر ازاماتىنا ۇلتتىق بايلىقتى قايتارۋ تەتىگىن ىسكە قوسۋعا قول جەتكىزۋىمىز كەرەك. ءماجىلىس قوعامدىق مۇددەنى بىلدىرەتىن بارلىق وقيعاعا پارلامەنتتىك تەرگەۋ جۇرگىزۋ قۇقىعىنا يە بولۋعا ءتيىس. وسىلايشا, ءبىز حالىقتىڭ وبەكتيۆتى اقپارات الۋ قۇقىعىن قامتاماسىز ەتەمىز. رەسپۋبليكالىق بيۋدجەتتىڭ اتقارىلۋىن تەكسەرۋ وكىلەتتىگى بار اۋديتورلىق پالاتا ءماجىلىس قۇرامىنا كىرۋگە ءتيىس. باقىلاۋ فۋنكتسياسى سەنىمدى اقپاراتتى قالپىنا كەلتىرۋ ءۇشىن قاجەت. سەبەبى ۇكىمەتتىڭ قازىرگى ەسەپ بەرۋ ءتاسىلى سىرعىتپا جاۋاپ تارىزدەس, – دەدى ول.
پارتيا توراعاسىنان سوڭ ءسوز العان سپيكەرلەر اۋىلدىق وكرۋگ اكىمدەرىن ىرىكتەۋ كريتەريلەرىنە قاتىستى جەرگىلىكتى ءوزىن ءوزى باسقارۋ تۋرالى زاڭدى وزگەرتۋدى تالاپ ەتەتىندەرىن ايتتى. ولاردىڭ پىكىرىنشە, بارلىق دەڭگەيدەگى اكىمدى تىكەلەي داۋىس بەرۋ ارقىلى حالىق سايلاۋى كەرەك. اكىم مىندەتىن دۇرىس اتقارا الماعان جاعدايدا حالىق ونى كەرى قايتارۋعا ءتيىس.
سپيكەرلەر كاسىپورىندى زاڭسىز جەكەشەلەندىرۋ نەمەسە وزگە دە قۇقىقتىق جانە سالىقتىق زاڭ بۇزۋشىلىقتار انىقتالعان جاعدايدا ونىڭ كۇشىن جويىپ, ينۆەستور مەن مەملەكەتتىڭ مىندەتتەمەلەرىن قايتا ەسەپتەۋ قاجەت ەكەنىن العا تارتتى.
– مونوپوليالار رەسۋرستاردى ءراسۋالاپ, ءومىردىڭ بارلىق سالالارىنداعى سىبايلاس جەمقورلىق ميلليونداعان قاراپايىم ادامنىڭ بولاشاعىنا بالتا شاۋىپ وتىر. ەڭ تومەنگى جالاقى مولشەرىن 140 مىڭ تەڭگەگە دەيىن جەتكىزۋ قاجەت, – دەيدى اسىلبەك نۇرالين.