«اۋىل» پارتياسىنان پارلامەنت ءماجىلىسى دەپۋتاتتىعىنا كانديداتتار قايرات ايتۋعانوۆ, نيكولاي ارسيۋتين, سەرىك ەگىزباەۆ, رابيعا توقسەيىتوۆا, سوفيا ابدىرازاقوۆا ەلىمىزدىڭ سولتۇستىگىندەگى ءۇش وبلىستى اۋىز سۋمەن قامتاماسىز ەتىپ وتىرعان «ەسىل سۋ» كاسىپورنى ۇجىمىمەن كەزدەستى.
قۇرامىنا بۋلاەۆ, ەسىل, سوكولوۆ, پرەسنوۆ توپتىق سۋ قۇبىرى كىرەتىن «ەسىل سۋ» كاسىپورنى سولتۇستىك قازاقستان, اقمولا, قوستاناي وبلىسىنىڭ 250-گە جۋىق ەلدى مەكەنىن, 200 مىڭعا جۋىق تۇرعىنىن اۋىز سۋمەن قامتاماسىز ەتەدى. كانديداتتارمەن كەزدەسۋگە اتالعان مەكەمەنىڭ جۇزدەن استام جۇمىسشىسى قاتىستى. جيىندا ءسوز سويلەگەن ۇمىتكەرلەر الەمدىگى تازا سۋ تاپشىلىعى جايلى جالپى مالىمەت كەلتىرىپ, اتالعان ءۇش ءوڭىر حالقىن تىرشىلىك نارىمەن قامتاماسىز ەتىپ وتىرعان كاسىپورىن قىزمەتكەرلەرىنىڭ جۇمىسىن جوعارى باعالادى.
– بۇۇ مالىمەتى بويىنشا, الەم حالقىنىڭ جارتىسىنا جۋىعى سۋ تاپشىلىعىن سەزىنەدى. سونىڭ ىشىندە, اسىرەسە تازا اۋىز سۋ ماسەلەسى وزەكتى. ساراپشىلاردىڭ ايتۋىنشا, جەر بەتىندە 780 ميلليوننان استام ادام تازا اۋىز سۋعا قول جەتكىزە الماي وتىر. ال 1,7 ميلليارد ادام تۇششى سۋ كوزدەرىنە ءزارۋ. الەمدە جىل سايىن تازا سۋدىڭ جوقتىعىنان, سونىڭ سالدارىنان بولاتىن انتيسانيتاريادان مىڭداعان ادام كوز جۇمادى. ال ەلىمىزگە كەلەر بولساق 2025 جىلعا دەيىن قالالار 100 پايىز, ەلدى مەكەندەر 80 پايىزعا اۋىز سۋمەن قامتىلماق. بۇل سىزدەردىڭ جانە سىزدەردىڭ ارىپتەستەستەرىڭىزدىڭ ەرەن ەڭبەگىنىڭ ارقاسى. سىزدەر تارتقان سۋ قۇبىرى الەم بويىنشا تارتىلعان ەڭ ۇزىن سۋ قۇبىرى رەتىندە گيننەستىڭ رەكوردتار كىتابىنا ەندى. «اۋىل» پارتياسىنىڭ باستى ماقساتتارىنىڭ ءبىرى – سىزدەردەي ەڭبەك ادامىنا دەگەن قۇرمەتتى قايتارۋ. ءبىز تەك سىزدەرمەن ەلىمىزدى يندۋستريالىق-اگرارلىق دەرجاۆاعا اينالدىرامىز جانە سول ارقىلى باقۋاتتى اۋىل, دامىعان قالا مەن قۋاتتى مەملەكەت قالىپتاستىرامىز, –دەدى قايرات ايتۋعانوۆ.
ەڭبەك ادامىنىڭ توككەن ءتورىن باعالاپ, قامىن جەگەن پارتيا وكىلدەرىن ۇجىم جىلى قابىلداپ, سوزدەرىن ىقىلاسپەن تىڭدادى. پارتيا سايلاۋالدى باعدارلاماسى باعىتتارىنىڭ ماقسات-مۇددەلەرىمەن قابىساتىنىن ايتتى.