كەشە تۇركيانىڭ مالاتيا پروۆينتسياسىنىڭ ەشيليۋرت ايماعىندا 5,6 بالدىق جەر سىلكىنىسىنەن ەكى ادام قايتىس بولىپ, 140-ى جارالاندى, دەپ حابارلايدى Egemen.kz Anadolu اگەنتتىگىنە سىلتەمە جاساپ.
تۇركيا ۇكىمەتى جانىنداعى اپاتتاردىڭ الدىن الۋ جانە سالدارىن جويۋ باسقارماسىنىڭ (AFAD) حابارلاۋىنشا قيراندىلاردىڭ استىنان 32 ادام قۇتقارىلعان.
زارداپ شەككەن 140 ادامنىڭ 12-ءسى اۋىر جاعدايدا جاتىر.
قۇلاعان 31 عيماراتتىڭ 7 ايماعىندا ىزدەستىرۋ-قۇتقارۋ جۇمىستارى اياقتالدى. ىزدەستىرۋ-قۇتقارۋ وپەراتسياسىنا 650 ادام جۇمىلدىرىلدى.
حابارلانعانداي, كەشە تۇركيانىڭ مالاتيا پروۆينتسياسىندا ماگنيتۋداسى 5,6 بالل بولاتىن جەر سىلكىنىسى تىركەلدى.
بۇگىن تۇركيانىڭ مالاتيا پروۆينتسياسىندا ماگنيتۋداسى 4,1 بولاتىن تاعى ءبىر جەر سىلكىنىسى بولدى. جەراستى دۇمپۋلەرى جەرگىلىكتى ۋاقىت بويىنشا 05:18-دە تىركەلگەن. جەر سىلكىنىسىنىڭ وشاعى ەشيليۋرت ايماعىندا ورنالاسقان.
ەسكە سالايىق, 6 اقپاندا كاحرامانماراش پروۆينتسياسىنىڭ پازاردجيك ايماعىندا ماگنيتۋداسى 7 باللدان اساتىن ەكى جەر سىلكىنىسى بولدى. جەر سىلكىنىسىنەن كەيىنگى دۇمپۋلەر ەلدىڭ 11 پروۆينتسياسىندا, سونداي-اق كورشىلەس مەملەكەتتەردە, سونىڭ ىشىندە سيريادا دا سەزىلدى. ماماندار ايماقتا دۇمپۋلەر تاعى جارتى جىل بويى جالعاسادى دەپ بولجاپ وتىر.
تۇركياداعى جويقىن جەر سىلكىنىسىنەن كەيىن ۇيىندىلەردى شىعارۋعا 88 ەلدەن 11 مىڭ قۇتقارۋشى قاتىستى, سونداي-اق ىزدەۋ-قۇتقارۋ جۇمىستارىنا استانا مەن الماتى قالالارىنىڭ, اقمولا جانە قاراعاندى وبلىستارىنىڭ قۇتقارۋشىلارى قاتىستى.
سونداي-اق 20 اقپاندا حاتاي پروۆينتسياسىندا 6,4 جانە 5,8 بالدىق ەكى جەر سىلكىنىسى تىركەلدى.