ەۇۋ ماگيسترانتى اينۇر پولاتوۆا ۇلتتىق ويىنداردى ناسيحاتتاپ, «Talapai» بىرەگەي جوباسىن ءساتتى جۇزەگە اسىرۋدا. بيىل ول پاريجدە قازاق ناقىشى بار سومكەنىڭ ەرەكشە ديزاينىن تانىستىرۋدى جوسپارلاپ وتىر, دەپ حابارلايدى Egemen.kz.
اينۇر پولاتوۆا ەۋرازيا ۇلتتىق ۋنيۆەرسيتەتىندە قازاق فيلولوگياسىنىڭ ماگيستراتۋراسىندا وقيدى. ول ۇلتتىق ويىندار ارقىلى قازاقتىڭ ءتول مادەنيەتىن كەڭىنەن دارىپتەۋدى ۇيعاردى. 2022 جىلى ماگيسترانت «Talapai» ستارتاپ يدەسىن قۇرىپ, ەۇۋ بيزنەس-ينكۋباتورىنداعى بايقاۋدا اقشالاي سىيلىق ۇتىپ الدى. اينۇردىڭ جوباسى ەرەكشە ۇلتتىق ديزاينمەن جاسالعان. «بەس تاس», «قۇمار», «اعاش ءۇي» بەستەمشەسى, «تۇمار» بەستەمشەسى, «توعىزقۇمالاق» ويىندارى قازاقتىڭ ويۋ ورنەگى بار فۋنكتسيونالدى قورجىن تۇرىندە ۇسىنىلعان.
ءۇش اي بۇرىن باستالعان «Talapai» جوباسى قازىردىڭ وزىندە وتە تانىمال. ەۇۋ ماگيسترانتىنىڭ ايتۋىنشا, ۇلتتىق ويىندى ساتىپ الۋعا وتىنىشتەر تەك قازاقستاندىقتاردان عانا ەمەس, تۇركيا, اقش, نيدەرلاندى ءتارىزدى شەت مەملەكەتتەردەن دە كەلىپ تۇسكەن.
«قازىر شەتەلدىك ۇستەل ويىندارى وتە كوپ. مەن ءبىزدىڭ ۇلتتىق ويىندارىمىزدى نەگە زاماناۋي ۇلگىدە دارىپتەمەسكە دەپ ويلادىم. وسىلايشا «Talapai» يدەياسى پايدا بولدى. ءار ويىن سومكە ءتارىزدى اعاشتان جاسالعان قوراپتا ۇسىنىلعان. ونى بارلىق جەردە الىپ ءجۇرۋ ىڭعايلى جانە وتە جەڭىل. ەڭ باستىسى – اعاش سومكە فۋنكتسيونالدى, ونى اشىپ, ويىن ويناۋعا بولادى», دەپ ءبولىستى قىز.
وسى جىلدىڭ ءساۋىر ايىندا اينۇر Louis Vuitton وكىلدەرىمەن كەزدەسۋدى جوسپارلاپ وتىر. ونىڭ كيىز ءۇي ءتارىزدى سومكە جاساۋ تۋرالى ۇسىنىسىن الەمدەگى ايگىلى برەندتەردىڭ ءبىرى قولداپ, ديزايندى تالقىلاۋعا پاريجگە شاقىردى.
«جارنامادان Louis Vuitton ءبىزدىڭ كيىز ۇيگە ۇقساس دۇكەن اشقانىن كورىپ قالدىم. بۇل مەنى قىزىقتىردى جانە مەن ولارعا كيىز ءۇي ءتارىزدى سومكە جاساۋ تۋرالى ۇسىنىس حات جازدىم. مەن قازىر ۇلتتىق ويىنداردى دامىتۋ ءۇشىن «Talapai» جوباسىن جۇزەگە اسىرىپ جاتقانىمدى ايتتىم, ونىڭ سىرتقى قورجىن تۇرىندەگى قورابى ءبىزدىڭ اتا-بابالارىمىزدىڭ كوشپەلى ۇيىنە ۇقسايدى. مەن بۇل ديزايندى ءوزىم جاسايمىن جانە Louis Vuitton ءۇشىن نەگىزگى يدەيا وعان نەگىزدەلگەن. ەكى اپتادان كەيىن كومپانيا مەنىڭ ۇسىنىسىما قىزىعۋشىلىق ءبىلدىرىپ, وزدەرىنىڭ جاۋاپ حاتىندا يدەيانى ودان ءارى تالقىلاۋ ءۇشىن پاريجگە شاقىردى», دەدى ماگيسترانت.
ايتا كەتۋ كەرەك, اينۇر پولاتوۆا كاسىبي ديزاين بويىنشا وقىماعان. بيىل ول گەرمانيادا, گەتە اتىنداعى فرانكفۋرت ۋنيۆەرسيتەتىندە ەۇۋ اكادەميالىق ۇتقىرلىق باعدارلاماسى بويىنشا ءبىلىمىن شىڭدايدى.