«اق جولدىڭ» التى باعىتى

– ءبىزدىڭ ۇلان-عايىر جەرىمىزدى ەسكەرسەك, قازاقستان اۋماعىندا ءبىرتۇتاس نارىق, ءبىرتۇتاس ەكونوميكالىق كەڭىستىك بولۋى ءۇشىن بارلىق وڭىرلەردى, وندىرۋشىلەر مەن تۇتىنۋشىلاردى بايلانىستىرۋ وتە ماڭىزدى. بۇل ىرگەلى جۇمىستا نەگىزگى سالماق تەمىرجولعا تۇسەدى. بۇكىل قتج جۇيەسىن ەۋروپا مەن ازيانى بايلانىستىراتىن كوپىر قىزمەتىن اتقاراتىن حالىقارالىق كولىك-لوگيستيكالىق كومپانياعا اينالدىرۋ جوباسى ازىرلەنىپ جاتىر. قىتاي مەن باتىس اراسىنداعى كونتەينەرلىك تاسىمال كولەمىنىڭ ءوسىپ كەلە جاتقانى دا كەزدەيسوق ەمەس, – دەدى پارتيا جەتەكشىسى جۇمىسشىلارمەن كەزدەسۋدە.

كەزدەسۋ بارىسىندا ازات پەرۋاشەۆ پارتيانىڭ ساياسي باعدارلاماسىنىڭ التى نەگىزگى باعىتىن اتادى: تاۋەلسىزدىك جانە «الاش» ۇلتتىق يدەياسى, دەموكراتيا جانە پارلامەنتاريزم, سىبايلاس جەمقورلىقپەن جانە دەوفشوريزاتسيامەن كۇرەس, الەۋمەتتىك ادىلەتتىلىك, نارىقتىق ەكونوميكا, كاسىپكەرلىك پەن وتاندىق وندىرۋشىلەردى قولداۋ, ساليقالى سىرتقى ساياسات.

كومپانيا قىزمەتكەرلەرى كولىكتىك سەرۆيس ورتالىعى وليگوپولياسىنا قاتىستى ماسەلەلەردى كوتەردى. پارتيا باسشىسى 2017 جىلدان بەرى «اق جول» فراكتسياسى كىرمە جولداردى رەيدەرلىك باسىپ الۋ مەن «كولىكتىك سەرۆيس ورتالىعى» اق-نىڭ تاريفتەردى كۇرت كوتەرگەنى تۋرالى بىرنەشە رەت دەپۋتاتتىق ساۋال جولداعانىن ەسكە سالدى. بىراق تەك پرەزيدەنت ق.توقاەۆتىڭ تىكەلەي تاپسىرماسىنان كەيىن عانا مونوپولياسىزداندىرۋ جونىندەگى ۇكىمەتتىك كوميسسيا جولداردى زاڭدى يەلەرىنە قايتارۋعا قول جەتكىزىپ, ۆاگونداردىڭ ءوتۋ تاريفتەرىن 12 ەسەگە تومەندەتتى.

دەپو جۇمىسشىلارى يپوتەكانىڭ قولجەتىمدىلىگى, نەسيەلەر بويىنشا اقىلعا قونىمسىز پايىزدار, جالعىز باسپانانىڭ بانكتەر مەن كوللەكتورلاردان قورعالۋى ماسەلەلەرىنە قىزىعۋشىلىق تانىتتى. وسى ورايدا ا.پەرۋاشەۆ «اق جول» پارتياسىنىڭ جەكە تۇلعالاردىڭ بانكروتتىعى تۋرالى زاڭ قابىلداۋ جولىنداعى 8 جىلدىق كۇرەسى, سول زاڭ اياسىندا بورىشكەرلەرگە جاسالعان مۇمكىندىكتەر مەن شەكتەۋلەر تۋرالى ايتتى.