تۇركياداعى تابيعي اپات ايماعىنداعى ىزدەستىرۋ-قۇتقارۋ جۇمىستارىنا تجم قۇتقارۋشىلارىمەن جانە اپاتتار مەديتسيناسى ورتالىعىنىڭ دارىگەرلەرىمەن بىرگە كينولوگيالىق توپتار دا قاتىسقان ەدى. تجم وكىلدەرى وكق الاڭىندا ىزدەۋ-قۇتقارۋ جۇمىستارىنىڭ قورىتىندىلارىنا ارنالعان بريفينگ بارىسىندا ولاردىڭ جۇمىسى تۋرالى ايتىپ بەردى, دەپ حابارلايدى Egemen.kz.
ميرتا اتتى نەمىس وۆچاركاسى كينولوگ-نۇسقاۋشىمەن بىرگە وكق الاڭىنا كەلدى.
«ميرتا تۇركيادا ۇيىندىلەر استىندا قالعان 3 ادامدى تاپتى. سونداي-اق بەلگيالىق مالينۋا وۆچاركالارى دجەيكوب, ليگا م سيريۋس جانە اكسەل, لابرادور چارلي كينگ, گرينپيس ەسىمدى بوردەر كوللي, كينولوگ-نۇسقاۋشىلارمەن جانە قۇتقارۋشىلار وتريادتارىمەن بىرگە بىرنەشە كۇن بويى قيراعان نىسانداردا جۇمىس ىستەپ, ءار ادامنىڭ ءومىرى ءۇشىن كۇرەسكەن», دەپ جازىلعان وكق تاراتقان حابارلامادا.
تجم وكىلدەرى قازاقستاندىق كينولوگيالىق توپتار ىزدەستىرۋ-قۇتقارۋ جۇمىستارىندا جاقسى ناتيجەلەر كورسەتىپ, ۇيىندىلەر استىندا قالعان ادامداردى ىزدەۋ كەزىندە جوعارى بىلىكتىلىگىن راستاعانىن ايتتى.