«اق جول» دەموكراتيالىق پارتياسىنىڭ رەسپۋبليكالىق شتابى مۇشەلەرى الماتى قالاسىنىڭ ەڭبەك ۇجىمدارىمەن كەزدەسۋىن جالعاستىرىپ جاتىر. سايلاۋالدى ۇگىت-ناسيحات اياسىندا ازات پەرۋاشەۆ پەن قازىبەك يسا «اق جول» پارتياسى اتىنان ءماجىلىس پەن ءماسليحات دەپۋتاتتىعىنا ۇمىتكەر الماتىلىق كانديداتتارمەن بىرگە «ماسلودەل» زاۋىتىنىڭ جانە ميكروقارجى ۇيىمدارى قاۋىمداستىعىنىڭ ۇجىمدارىمەن كەزدەستى.
«اق جول» پارتياسى «ماسلودەل» كومپانياسىنا تەحنيكالىق رەتتەۋ سالاسىنداعى زاڭدى مۇددەلەرىن قورعاۋعا كومەكتەسكەنىن اتاپ وتكەن ءجون. وڭدەۋشىلەر مەملەكەتتىك ورگاندار اۋىل شارۋاشىلىعى شيكىزاتى مەن ينگرەديەنتتەردىڭ وتاندىق ءوندىرىسىن قۇرۋعا كومەكتەسۋى كەرەك دەپ ەسەپتەيدى. ولاردىڭ باسىم بولىگى باسقا ەلدەردەن يمپورتتالعانمەن, تۇراقتى جانە بولجامدى سۋبسيديالاۋ ساياساتى جاعدايىندا قازاقستاندا دا وسىرۋگە مۇمكىندىك بار. وندىرۋشىلەر ساۋدا جەلىلەرىنىڭ جۇمىسىندا وتاندىق تاۋارلارعا ارتىقشىلىق بەرۋدى تالاپ ەتەدى. بۇگىندە ءىرى ساۋدا ورتالىقتارىمەن باسەكەگە تۇسە المايتىن, بىراق حالىققا قولجەتىمدى ءارى ىڭعايلى بولىپ تۇرعان ء«ۇي جانىنداعى دۇكەندەردىڭ» جۇمىسىن ۇيلەستىرۋ دە ءوز الدىنا بولەك ماسەلە.
شتاب مۇشەلەرى «اق جول» پارتياسىنىڭ ساياسي باعدارلاماسىن تانىستىردى. ءادىل باسەكەلەستىك, شاعىن بيزنەستىڭ سالىق ەسەپتىلىگىن پاتەنتكە اۋىستىرۋ, جەكە تۇلعالاردىڭ بانكروتتىعى تۋرالى زاڭنىڭ باسقا دا تارماقتارى جينالعان قاۋىمنىڭ ۇلكەن قىزىعۋشىلىعىن تۋدىردى.
– ءبىز زاڭ شىعارۋ جۇمىسىمىزدا, دەپۋتاتتىق ساۋالداردا كوتەرەتىن ۇسىنىستارىمىزدا ءاردايىم نارىقتىق ەكونوميكا ۇستانىمدارىن تولىققاندى جۇزەگە اسىرۋدى تالاپ ەتەمىز. وكىنىشكە قاراي, ەلدە نارىقتىق ەمەس ەكونوميكا قالىپتاسقانىن كورىپ وتىرمىز. بىزدە وليگوپولياعا ءتيىمدى بولعانىمەن, بار اۋىرتپالىعى شاعىن ورتا بيزنەس پەن حالىقتىڭ موينىنا جۇكتەلەتىن مەملەكەتتىك-مونوپوليالىق كاپيتاليزم قالىپتاسقان. مەملەكەتتىڭ ەكونوميكاعا ارالاسۋى ءادىل ءارى ادال باسەكەلەستىكتى جويدى. بۇل جاعدايدا بيۋدجەتتەن قارجىلاندىرىلسا دا, مەملەكەتتىك حولدينگتەر مەن ۇلتتىق كومپانيالاردان بيۋدجەتكە كىرىس تۇسپەيدى, – دەدى ازات پەرۋاشەۆ.
پارتيا جەتەكشىسى ميكروقارجى ۇيىمدارىنا جەكە تۇلعالاردىڭ دەپوزيتتەرىن قابىلداۋعا رۇقسات بەرۋ تۋرالى ۇسىنىستى جان-جاقتى تالقىلاۋدى ۇسىندى.