2022 جىلعى قىركۇيەكتە قازاقستان پرەزيدەنتى قاسىم-جومارت توقاەۆتىڭ نيۋ-يورككە جاساعان ساپارى بارىسىندا «Pfizer» كومپانياسىمەن قول قويىلعان ىنتىماقتاستىق تۋرالى مەموراندۋمعا سايكەس قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى ەۋروپا, ازيا جانە افريكا بويىنشا وڭىرلىك ديرەكتورى وزگۋر يازيۋرت باستاعان «Pfizer» دەلەگاتسياسىمەن كەلىسسوزدەر جۇرگىزدى, دەپ حابارلايدى Egemen.kz سىرتقى ىستەر مينيسترلىگىنە سىلتەمە جاساپ.
كەزدەسۋگە قر دەنساۋلىق ساقتاۋ ءمينيسترى اجار عينيات جانە «سك-فارماتسيا» جشس باسقارما توراعاسى رەنات ەسقاليەۆ قاتىستى.
كەلىسسوزدەر بارىسىندا قازاقستاندا امەريكاندىق كومپانيانىڭ بولۋىن كەڭەيتۋدىڭ وزەكتى ماسەلەلەرى, ونىڭ ىشىندە «Prevenar-13» پنەۆموكوككتى ۆاكتسينانىڭ كەلىسىمشارتتىق ءوندىرىسىن وقشاۋلاۋ تالقىلاندى. امەريكاندىق تاراپ قازاقستاندىق نارىققا بيوفارماتسەۆتيكالىق ترانسۇلتتىق كومپانيالاردى تارتۋ ءۇشىن جەرگىلىكتى زاڭنامانى جەتىلدىرۋ جونىندەگى كۇش-جىگەر تۋرالى حاباردار ەتىلدى. ءوز كەزەگىندە «Pfizer» باسشىلىعى فارماتسەۆتيكالىق قىزمەتتى رەتتەيتىن قر نورماتيۆتىك-قۇقىقتىق اكتىلەرىندەگى وزگەرىستەردى وڭ باعالادى.
شتاب-پاتەرى نيۋ-يورك قالاسىندا ورنالاسقان «Pfizer» امەريكاندىق ترانسۇلتتىق كومپانياسى – بيوفارماتسەۆتيكالىق نارىقتىڭ الەمدىك كوشباسشىلارىنىڭ ءبىرى. كومپانيانىڭ نەگىزگى زەرتتەۋ ورتالىعى كوننەكتيكۋت شتاتىنداعى گروتون قالاسىندا ورنالاسقان.
بۇگىندە كومپانيا جۇرەك-قانتامىر جۇيەسى, تىرەك-قيمىل اپپاراتى اۋرۋلارىنا قارسى ءدارى-دارمەكتەردى جاساۋمەن اينالىسادى, انتيبيوتيكتەر, ۆياگرا, يممۋنودەپرەسسانتتار جانە ت.ب. شىعارادى. 2020 جىلى «BioNTech», «Pfizer» مەن «Fosun Pharma» كومپانيالارى كوروناۆيرۋسقا قارسى ۆاكتسينا ازىرلەدى.