ەڭبەك جانە حالىقتى الەۋمەتتىك قورعاۋ مينيسترلىگى جۇمىسسىز جۇرگەن 12 مىڭنان استام ازاماتقا SMS-حابارلاما جولداعان. حابارلاما العان 101 جاس جۇمىسقا ورنالاستى. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ورداباەۆ مالىمدەدى, دەپ حابارلادى Egemen.kz.
«بۇل – پيلوتتىق جوبانىڭ ءبىرىنشى لەگى بولدى. حابارلاما 23-35 جاس ارالىعىنداعى 12 مىڭ ازاماتقا جولداندى, ولار زەينەتاقى جارنالارىنا تەكسەرۋ جۇرگىزۋ ناتيجەسىندە انىقتالعان. ونىڭ ىشىندە 4,8 مىڭى ەلەكروندى ەڭبەك بيرجاسىنا تىركەلگەن. ناتيجەسىندە 101 ادام جۇمىسقا ورنالاستى. تاعى 39 ادام كاسىپكەرلىك نەگىزدەرىن وقۋدى باستادى», دەدى ۆيتسە-مينيستر.
ايتا كەتسەك, حابارلاما العان بارلىق ازامات جۇمىسقا ورنالاسىپ, ناتيجەسىن كورسەتكەننەن كەيىن عانا قالعان ازاماتتارعا SMS-حابارلاما جولداناتىنى اتاپ ءوتىلدى.
سونىمەن قاتار ۆيتسە-مينيستر ەلەكتروندى ەڭبەك بيرجاسىندا قازاقستان بويىنشا بوس جۇمىس ورىندارى تۋرالى اقپارات بار ەكەنىن ەسكە سالدى.
بۇل رەتتە قازاقستاندا جاستاردى جۇمىسپەن قامتۋعا ارنالعان «جاستار پراكتيكاسى», «العاشقى جۇمىس ورنى» جانە «ۇرپاقتار كەلىسىمشارتى» باعدارلامالارى ىسكە قوسىلعانىن اتاپ وتكەن ءجون.