قازاقستان حالىق پارتياسىنان پارلامەنت ماجىلىسىنە كانديداتتار اسحات اسىلبەكوۆ, ەلميرا اۋەزوۆا, نۇرسۇلتان شوقانوۆ الماتى قالاسىنداعى №40 جانە №145 ورتا مەكتەپتەردە اتا-انالارمەن كەزدەسىپ, سايلاۋالدى ۇگىت-ناسيحات جۇمىسىن جۇرگىزدى.
سپيكەرلەر سايلاۋشىلاردى پارتيانىڭ سايلاۋالدى باعدارلاماسىمەن تانىستىردى.
– ءبىزدىڭ پارتيا «ارتسپورت» قوزعالىسىن قولدادى. ناتيجەسىندە, جۇزدەگەن مىڭ بالا سپورت سەكتسيالارى مەن شىعارماشىلىق ۇيىرمەلەرگە تەگىن قاتىستى. بالالار مەيىرىم مەن قامقورلىقتى قازىردەن باستاپ سەزىنىپ ءوسۋى كەرەك. ءبىز بالالارىمىزدىڭ سپورتپەن جانە شىعارماشىلىقپەن تەگىن اينالىسقانىن قولدايمىز, – دەدى اسحات اسىلبەكوۆ.
كەزدەسۋدە پارتيا وكىلدەرى حالىقتى تەگىن تۇرعىن ۇيمەن قامتاماسىز ەتۋ قاجەتتىگىنە دە نازار اۋداردى. «ەلىمىزدەگى كەدەيشىلىكتى جويۋ قاجەت. مەملەكەت حالىقتى تۇراقتى جۇمىسپەن قامتۋ, الەۋمەتتىك سالالارداعى پروبلەمالاردى رەتتەۋى كەرەك», دەدى ەلميرا اۋەزوۆا.
سپيكەرلەر حالىقتىڭ قارىزعا باتقانىن, ونلاين نەسيەنىڭ سالدارىنان ەلىمىزدە الاياقتاردىڭ قاپتاپ كەتكەنىن, جاستاردىڭ قۇمار ويىننىڭ قۇربانىنا اينالىپ بارا جاتقانىن دا العا تارتتى.
«قازىر ونلاين نەسيەنىڭ جارناماسى قاپتاپ كەتتى. حالىق ماجبۇرلىكتەن نەسيە الىپ, قارىزعا باتىپ وتىر. الاياق كومپانيالار ەلدى قاناپ جاتىر. وسىلاردى مەملەكەت اۋىزدىقتاۋى كەرەك», دەدى نۇرسۇلتان شوقانوۆ.
قازاقستان حالىق پارتياسىنىڭ وكىلدەرى مەملەكەتتىك مەكەمەلەردە (ارناۋلى ورتا جانە جوعارى) ءبىلىم بەرۋ مەن دەنساۋلىق ساقتاۋ ماماندارىن تەگىن وقىتۋ, ايەلدەردىڭ زەينەتكە شىعۋ جاسىن 58-گە بەكىتۋ, ال 4 جانە ودان كوپ بالا تاربيەلەپ وتىرعان انالاردى 55 جاسقا دەيىن زەينەتكە شىعارۋ ۇسىنىسىن قولدايتىنىن, بۇل باعىتتا جۇيەلى جۇمىستاردى جالعاستىرا بەرەتىنىن ايتتى. كانديداتتار سايلاۋالدى باعدارلامادا بانكتەرگە ازاماتتاردىڭ ارتىق تولەمدەرىن قايتارىپ بەرۋ تۋرالى تالاپ قويعاندارىن مالىمدەدى.
ال استانا قالاسىندا قازاقستان حالىق پارتياسى سايلاۋالدى ۇگىت-ناسيحات جۇمىسى اياسىندا اۆتوشەرۋ وتكىزدى. باستى ماقسات – جول-كولىك وقيعالارىنىڭ الدىن الۋ.