استانا اۋەجايى تەز بۇزىلاتىن اۋىل شارۋاشىلىعى جانە تەڭىز ونىمدەرىن, سونداي-اق فارماتسەۆتيكالىق ونىمدەردى جيناقتاپ تاراتاتىن ءمۋلتيمودالدى حاب قۇرۋعا نيەتتى. ءتىپتى وعان اۆتوموبيلدەر مەن ونىڭ بولشەكتەرى دە تارتىلاتىن كورىنەدى.
باستاۋىنان تاراتىپ ايتار بولساق, كاسىپورىن ەلوردا اۋە ايلاعى ءۇشىن اتالعان تاۋارلاردى تيەۋدى, جونەلتۋدى ىسكە اسىراتىن بولادى. بۇگىندە ەل پرەزيدەنتىنىڭ تاپسىرمالارىن ورىنداۋ شەڭبەرىندە «نۇرسۇلتان نازارباەۆ حالىقارالىق اۋەجايى» اق ترانزيتتىك الەۋەتتى جانە جۇك تاسىمالىن دامىتۋ جونىندەگى جۇمىستاردى جالعاستىرىپ جاتىر.
2020 جىلى كاسىپورىن ءوز قىزمەتىنىڭ ستراتەگيالىق دامۋ جوسپارىن تۇزەتىپ, اۋە كەمەلەرىنە قىزمەت كورسەتۋ جانە جانارماي قۇيۋ ءۇشىن قازاقستان استاناسىنا شەتەلدىك جۇك جانە ترانزيتتىك رەيستەردى تارتۋ جونىندەگى جۇمىستى تاعى دا جانداندىرا ءتۇسۋدى قولعا الدى. ناتيجەسىندە, 2021-2022 جىلدارى 4 مىڭعا جۋىق جۇك ۇشاقتارىنىڭ ترانزيتتىك رەيسىنە قىزمەت كورسەتىلدى.
وعان قوسا, ەلوردا اۋەجايى بىرقاتار ءىرى جۇك اۆياكومپانياسىنا ءوز تەرريتورياسىنان ورىن ۇسىنعان. بۇگىنگى تاڭدا استانادا AeroTransCargo, ASL Airlines جانە Challenge Airlines ورنالاسقان. سونداي-اق 2022 جىلدىڭ اياعى مەن اعىمداعى جىلدىڭ باسىندا لەج جانە ليۋكسەمبۋرگ جۇك تەرمينالدارىندا تانىسۋ كەزدەسۋلەرى جانە قازاقستاندا Turkish Cargo, Air Belgium Cargo جانە Cargolux-پەن تابىستى كەلىسسوزدەر وتكىزىپتى.
استانا جۇك تەرمينالىن دامىتۋ بويىنشا ءىرى لوگيستيكالىق كومپانيالارمەن ىنتىماقتاستىق جالعاسۋدا. 2022 جىلى اۋتسورسينگكە اۋىستىرۋ شەڭبەرىندە ALS Logistics كومپانياسىمەن كەلىسىم جاسالعان. ول اعىمداعى جىلدان باستاپ قولدانىستاعى جۇك تەرمينالىن 40 پايىزعا كەڭەيتۋگە جانە اۋدانى 1800 شارشى مەتر جاڭا نىسان تۇرعىزۋعا قاراجات سالۋعا مىندەتتەنەدى.
ءسويتىپ, اۋەجاي اۋماعىندا قويماسى بار باسقا جۇك وپەراتورلارىمەن ىنتىماقتاسادى. اتاپ ايتقاندا, e-commerce جۇكتەرىنە قىزمەت كورسەتۋ ءۇشىن جەكە تەرمينال قۇرۋ جوسپارى دا جوق ەمەس. «قازپوشتا» مەن حالىقارالىق پوشتا الماسۋ پۋنكتىن (ممپو) قۇرۋ تۋرالى ۋاعدالاستىققا قول جەتكىزىلدى. ال جوعارىدا ايتىلعانداي «سك-فارماتسيامەن» ىنتىماقتاستىق شەڭبەرىندە اۋەجاي اۋماعىندا فارماتسەۆتيكالىق حاب قۇرۋ كوزدەلىپ وتىر.
تاعى ءبىر ماڭىزدى شارا, وتكەن جىلى اۋەجايدى دامىتۋدىڭ 2052 جىلعا دەيىنگى باس جوسپارى ازىرلەنگەن. جاڭا ستراتەگيا تەمىرجول, اۆتوموبيل جانە اۋە جۇك تاسىمالدارىن قوسۋ ءۇشىن اۋەجايعا تەمىرجول ينفراقۇرىلىمىن اكەلە وتىرىپ, ءمۋلتيمودالدى حاب قۇرۋدى كوزدەيدى.
ءمۋلتيمودالدى حاب ەلوردالىق اۋە ايلاعى ءۇشىن جۇكتەردىڭ جاڭا تۇرلەرىن – تەز بۇزىلاتىن اۋىل شارۋاشىلىعى ونىمدەرىن, تەڭىز ونىمدەرىن, اۆتوموبيلدەر مەن اۆتوموبيل بولشەكتەرىن, سونداي-اق حالىق تۇتىناتىن تاۋارلاردى تارتۋعا مۇمكىندىك بەرەدى. سونداي-اق تاياۋ شىعىس ەلدەرى مەن قىتايعا اۋىل شارۋاشىلىعى ونىمدەرىنىڭ ەكسپورتىن دامىتۋ جونىندەگى جۇمىس تاعى دا جاندانادى.