ادامزات بالاسىنىڭ باسىنا تونگەن ەكىنشى دۇنيەجۇزىلىك سوعىس الاپاتىنىڭ اششى زاردابى ءالى دە حالىق جادىندا. بۇگىندە قيىن-قىستاۋ زاماننىڭ قاسىرەتىن ەسكە الاتىن ارداگەرلەر دە ازايدى. بىراق ءبىز, كەيىنگى ۇرپاق ميلليونداعان ادام تاعدىرىن قىرشىننان قيعان سوعىستى, جاۋمەن جانكەشتىلىكپەن سوعىسىپ اسقان ەرلىك كورسەتكەن اكەلەرىمىز بەن اتالارىمىزدى جادىمىزدان شىعارۋعا قاقىمىز جوق.
ەرلىگىمەن ەلگە تانىلعان جاقسى اۋدانىنا قاراستى العاباس اۋىلىنىڭ تۋماسى – كەڭەس وداعىنىڭ باتىرى اتاعىنا ۇسىنىلعان قوجامسەيىت شاياحمەت ۇلى اتامىزدىڭ مايدان دالاسىندا كورسەتكەن ەرلىكتەرى ايتۋعا تۇرارلىق. اتامىز 1923 جىلى 23 اقپان كۇنى العاباس اۋىلىندا دۇنيەگە كەلگەن. جاستايىنان جەتىم قالىپ, بالعىن بالالىق شاعىن قيىندىقپەن وتكىزگەن. 1942 جىلدىڭ ءساۋىر ايىندا مايدانعا اتتانىپ ستالينگراد, دون, وڭتۇستىك-باتىس جانە 1-بەلارۋس مايدانىندا ۋكراينا, مولدوۆا جانە پولشا جەرلەرىن جاۋدان ازات ەتۋگە قاتىسقان. سوعىستىڭ العاشقى كۇندەرى-اق جاۋعا دەگەن وشپەندىلىگىن ايقىن كورسەتىپ, اسقان جاۋاپكەرشىلىكپەن كومانديردىڭ بۇيرىعىن مۇلتىكسىز ورىنداپ باتىلدىعىمەن, ەرلىگىمەن ەرەكشە كوزگە تۇسەدى. 1942 جىلى «ەرلىگى ءۇشىن» مەدالىمەن, 1943 جانە 1945 جىلدارى ەكى مارتە «قىزىل جۇلدىز» جانە «جاۋىنگەرلىك قىزىل تۋ», سونداي-اق قاھارماندىعى ءۇشىن ءبىرىنشى دارەجەلى « ۇلى وتان سوعىسى» وردەندەرىمەن ماراپاتتالعان.
الاپات سوعىستا قوجامسەيىت اتامىز اسقان ەرلىكتىڭ ۇلگىسىن كورسەتەدى. شەشۋشى ايقاستان كەيىن كوزسىز ەرلىگى ەلەنىپ باسشىلىقتىڭ شەشىمىمەن كەڭەس وداعىنىڭ باتىرى اتاعىنا ۇسىنىلادى. اشىق اقپارات كوزىندەگى دەرەككە جۇگىنسەك: «شپرەە وزەنىنەن ءوتۋ بارىسىندا 1945 جىلدىڭ 23 ءساۋىر كۇنى گۆارديا اعا سەرجانتى قوجامسەيىت شاياحمەتوۆ ايرىقشا ەرلىك, تاپقىرلىق پەن ەپتىلىك تانىتتى. ءوز ءومىرىن اياماي, جاۋعا وقتى قارشا بوراتىپ, «وتان ءۇشىن!», «ستالين ءۇشىن!» دەپ ۇرانداتىپ, شپرەە وزەنىنىڭ سول جاعالاۋىنا جاياۋ اسكەردى وتكىزۋگە جاردەمدەسىپ, بىرنەشە جاۋدىڭ كوزىن جويىپ, تەحنيكاسىن قيراتىپ, پلاتسدارمدى كەڭەيتىپ, اۋماقتى جاۋدان تازارتتى. بەرلين قالاسىنىڭ ماڭىنداعى ۇرىس كەزىندە شپرەە وزەنى, لاندۆەر كانالى جانە قالانىڭ كوشە ۇرىستارىندا گۆارديا اعا سەرجانتى قوجامسەيىت شاياحمەتوۆ باستاعان جاۋىنگەرلەر 3 نەمىس تانكىسىن, 2 وزدىگىنەن جۇرەتىن تەحنيكاسىن, 4 برونەترانسپورتەرىن, اسكەري جۇك تيەلگەن 10 اۆتوكولىكتى, 5 پتو قۇرالدارىن جانە 170-كە جۋىق ءفاشيستىڭ كوزىن جويدى. جەكە ءوزى 21 گيتلەرشىلدى, ونىڭ ىشىندە 2 كاپيتاندى تۇتقىنعا الدى. قوجامسەيىت شاياحمەتوۆ كەڭەس وداعىنىڭ باتىرى اتاعىنا لايىق. 64-گۆارديالىق ويتپد گۆ گۆارديا مايورى ا.سافونوۆ. 1945 جىلدىڭ 6 مامىرى» دەپ جازىلعان. بىراق, وكىنىشكە قاراي, جەڭىس كۇنىن جاقىنداتۋعا وسىنشاما ەرلىك كورسەتىپ, جان اياماي ارپالىسقان باتىر اتامىزعا كەڭەس وداعىنىڭ باتىرى التىن جۇلدىزى «بۇيىرماعان».
سىرتقى ىستەر مينيسترلىگى ارقىلى ماسكەۋ قالاسىنداعى قازاقستان ەلشىلىگىنىڭ قولداۋىمەن رەسەي مەملەكەتتىك ارحيۆىنەن جانە رەسەي قورعانىس مينيسترلىگىنە سۇراۋ سالعان حاتقا جاۋاپ الدىق. وندا جوعارىداعى ەرلىك تايعا تاڭبا باسقانداي كورسەتىلگەن.
قازاق ەلى ەگەمەندىك العان سوڭ, زامان تالابىنا ساي ءوز ەلىنىڭ باتىرلارى مەن ارداگەرلەرىنىڭ ابىرويىن اسقاقتاتۋ ماقساتىندا تىڭعىلىقتى ىستەر اتقارىپ جاتىر. ەكىنشى دۇنيەجۇزىلىك سوعىس تۋرالى ايتىلماي كەتكەن اقيقاتتار اقپارات قۇرالدارىندا ءجيى جازىلىپ, ايتىلىپ ءجۇر. ەرلىكتەرى ەلەۋسىز, ەلەنبەي قالعان قانشاما بوزداقتاردىڭ اتى-جوندەرىن پاش ەتىپ, كەلەشەك ۇرپاققا امانات رەتىندە جاريالاۋ – ءبىزدىڭ پارىزىمىز. العاباس اۋىلى تۇرعىندارى جانە قوجامسەيىت اتامىزدىڭ ۇرپاقتارى اتامىزدى باتىر رەتىندە ماقتان تۇتامىز. تاۋەلسىزدىك العان وداقتاس مەملەكەتتەر ءوز ەلىنىڭ اتا زاڭىنا سۇيەنىپ, ءوز ەلىنىڭ باتىرى اتاعىن بەرىپ جاتقانىنان ءبارىمىز دە حاباردارمىز. قوجامسەيىت شاياحمەت ۇلى اتامىزدىڭ 100 جىلدىق مەرەيتويى قۇرمەتىنە باتىر رۋحىنا تاعزىم رەتىندە «حالىق قاھارمانى» اتاعىنا ۇسىنۋدى ەل بولىپ قولدايىق.
تالعات قۇرمان ۇلى,
استانا قالاسىنىڭ تۇرعىنى