قازاق ۇلتتىق اگرارلىق زەرتتەۋ ۋنيۆەرسيتەتىنىڭ باسشىسى اقىلبەك كۇرىشباەۆ كانادانىڭ قازاقستانداعى ەلشىسى الان حامسونمەن جانە ەلشىلىكتىڭ ساۋدا ماسەلەلەرى جانە بيزنەستى دامىتۋ جونىندەگى اعا كەڭەسشىسى ەدۋارد يۋومەن كەزدەستى. كەزدەسۋدە ەكى ەلدىڭ ۋنيۆەرسيتەتتەرى, عىلىمي ورتالىقتارى مەن اگرارلىق سەكتور كاسىپورىندارى اراسىنداعى ارىپتەستىكتى دامىتۋ ماسەلەلەرى تالقىلاندى.
– كانادا مەن قازاقستان اراسى الىس بولعانىمەن, كوپتەگەن جاقىندىعى بار. مىسالى, ەكى ەل جەر كولەمى جاعىنان اۋقىمدىلىعىمەن, كليماتتىق ۇقساستىعىمەن ەرەكشەلەنەدى. تابيعي رەسۋرستارعا – گيدروەنەرگەتيكا, اۋىل شارۋاشىلىعى الەۋەتىنە, پايدالى قازبالارعا باي. كانادانىڭ اۋىل شارۋاشىلىعىندا اقپاراتتىق جانە كوممۋنيكاتسيالىق تەحنولوگيالار ەرەكشە رولگە يە, – دەدى الان حامسون.
اقىلبەك كۇرىشباەۆ كانادانىڭ جەتەكشى جوعارى وقۋ ورىندارى مەن كومپانيالارىن اگرونوميا, سەلەكتسيا, ەگىنشىلىك, زووينجەنەريا, ۆەتەريناريا جانە اۋىل شارۋاشىلىعى سالاسىندا عىلىمي زەرتتەۋلەر جۇرگىزۋ باعىتىندا بىرلەسكەن ءبىلىم بەرۋ باعدارلامالارىن ازىرلەپ, ىسكە اسىرۋعا شاقىردى.
– ءبىزدىڭ ەلدەردەگى اگروبيزنەس سالاسى جاڭا پروگرەسسيۆتى تەحنولوگيالاردى پايدالانا وتىرىپ باسەكەلەستىك جاعدايىندا دامىپ كەلەدى. وسىعان بايلانىستى كانادالىق تەحنولوگيالار مەن نوۋ-حاۋدى قولداناتىن اگروونەركاسىپ كەشەنى ءۇشىن كادرلاردى دايارلاۋداعى ىنتىماقتاستىق الەۋەتىن دامىتۋدى ماقسات ەتىپ وتىرمىز. بۇل رەتتە ساسكاچەۆانا ۋنيۆەرسيتەتىمەن اگرونوميا بويىنشا بىرلەسكەن ءبىلىم بەرۋ باعدارلاماسىن ازىرلەۋدى ۇسىنامىز, – دەدى ا.كۇرىشباەۆ.
كاناداداعى ساسكاچەۆانا ۋنيۆەرسيتەتى (UofS) الەمدەگى بيومەديتسينالىق عىلىمدار, جاراتىلىستانۋ عىلىمدارى, ينجەنەريا جانە تەحنولوگيالار, الەۋمەتتىك عىلىمدار جانە مەنەدجمەنت سالاسىنداعى ۇزدىكتەردىڭ قاتارىنا كىرەدى.
كەزدەسۋ اياسىندا قازاق ۇلتتىق اگرارلىق زەرتتەۋ ۋنيۆەرسيتەتىنىڭ باسشىلىعى زووينجەنەريا, گەنەتيكا جانە جانۋارلار سەلەكتسياسى بويىنشا بىلىكتى مامانداردى دايارلاۋعا باسا نازار اۋدارا وتىرىپ, كانادانىڭ جەتەكشى جوعارى وقۋ ورىندارىنىڭ قاتىسۋىمەن بىرلەسكەن جوبا جاساۋدى ۇسىندى.
سونىمەن قاتار البەرت ۋنيۆەرسيتەتىمەن بىرلەسىپ ماگيسترانتتارعا ارنالعان «وسىمدىكتەر تۋرالى عىلىم» بىرلەسكەن ءبىلىم بەرۋ باعدارلاماسىن ازىرلەۋ, «بولاشاق» باعدارلاماسى بويىنشا ستۋدەنتتەردى تاعىلىمدامادان وتكىزۋ جانە وقىتۋ, جەتەكشى پروفەسسورلار مەن عالىمداردى شاقىرۋ, جوعارى وقۋ ورىندارى اراسىندا ىنتىماقتاستىقتى دامىتا وتىرىپ, قازاق ۇلتتىق اگرارلىق زەرتتەۋ ۋنيۆەرسيتەتى بازاسىندا اگرارلىق-ونەركاسىپتىك كەشەن سالاسىندا كانادانىڭ جەتەكشى ۋنيۆەرسيتەتىنىڭ فيليالىن اشۋ مۇمكىندىكتەرىن قاراستىرۋ قاجەتتىگىنە نازار اۋداردى.
اگرارلىق ۋنيۆەرسيتەتتىڭ وقۋ-وندىرىستىك بازاسىمەن تانىسقان كانادا ەلشىلىگىنىڭ وكىلدەرى ۇسىنىستارعا قىزىعۋشىلىق ءبىلدىردى.
الماتى