قىزىلورداداعى «Qosyl» قالالىق جاستار رەسۋرستىق ورتالىعى وتكەن جىلى 143 ءىس-شارا ۇيىمداستىرىپ, وعان 10 مىڭنان استام جاس قاتىسىپتى. جاستاردىڭ سۇرانىسىنا وراي جابدىقتالعان ورتالىق قىزمەتىن 11 مىڭنان استام ادام پايدالانعان. مۇنداعى WI-FI, كوۆوركينگ ورتالىعى, سپورتتىق سەكتسيالار, كرەاتيۆ فوتو-بەينە ستۋدياسى, بي زالى جانە جاستار ۇيىمدارى كابينەتى تەگىن قىزمەت كورسەتەدى.
وتكەن جىلى قالا اكىمىنىڭ «سامعاۋ» جاستار سىيلىعى نەگىزىنەن كاسىپتىك-تەحنيكالىق باعىتتاردا قىزمەت ەتەتىن سالا جاستارىنا تابىستالدى. سونىمەن قاتار قالالىق جاستار رەسۋرستىق ورتالىعى ەلىمىزدە موبيلوگرافيانىڭ نەگىزىن قالاۋشىلاردىڭ ءبىرى قىران تالاپبەكتىڭ قاتىسۋىمەن وبلىستا العاش رەت «موبيلوگرافيا» فەستيۆالىن ۇيىمداستىردى.
– قاتارلاستارىمىزدىڭ بوس ۋاقىتىن ءتيىمدى وتكىزىپ, سالاماتتى ءومىر سالتىن ۇستاپ, بۇقارالىق سپورتپەن اينالىسۋى ءۇشىن قالانىڭ شەت ايماقتارى مەن وبلىس ورتالىعىنا قاراستى اۋىلداردان ورتالىقتار اشىلدى. قازىر قاراۋىلتوبە, اقسۋات, اقجارما, قىزىلجارما, تالسۋات, قىزىلوزەك اۋىلدىق وكرۋگتەرى جاستارى ۇستەل تەننيسىمەن اينالىسادى. «اۋلا كلۋبتارى» الەۋمەتتىك جوباسى اياسىندا وتكەن جىلدىڭ سوڭىندا تاسبوگەت كەنتىندە العاشقى اۋلا كلۋبى جۇمىسىن باستادى. الداعى ۋاقىتتا وسىنداي كلۋبتاردى بەلكول كەنتى مەن شانحاي اۋداندارىنان اشۋدى جوسپارلاپ وتىرمىز, – دەيدى «Qosyl» قالالىق جاستار رەسۋرستىق ورتالىعىنىڭ جەتەكشىسى ءالىبي باساروۆ.
جازدا قالاداعى اربات بويىندا ءار اپتانىڭ بەيسەنبىسىندە «Ping-Pong», جۇما كۇنى «كاراوكە Battle», سەنبىدە «كينو TIME» جوبالارى وتكىزىلدى. جاستار ورتالىعىنىڭ «Qosyl kenes» جوباسى ارقىلى جاستارعا ۇزدىكسىز كەڭەس بەرىلىپ, «Qosyl acoustic» جوباسى شەڭبەرىندە اي سايىن ءان كەشى وتكىزىلىپ كەلەدى.
جۋىردا وبلىس ورتالىعىنان «Orta» رۋحاني-ينتەللەكتۋالدى دەمالىس ورنى اشىلدى. زاماناۋي ۇلگىدەگى جابدىقتالعان بۇل ورتالىقتا ءتۇرلى ۇستەل وينى, ينتەللەكتۋالدى سايىستار, جاندى داۋىستا اندەر شىرقالاتىن مەرەكەلىك كەشتەر ۇيىمداستىرىلادى.
سونىمەن قاتار مۇندا كىتاپ بۇرىشى, ءماجىلىس زالى, بالالارعا ارنالعان لوگوپەد كابينەتى مەن توعىزقۇمالاق, شاحمات ۇيىرمەلەرى جۇمىس ىستەيدى.
قىزىلوردا