ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە IV حالىقارالىق «الەمدىك فيلوسوفيانىڭ وزەكتى ماسەلەلەرى» اتتى عىلىمي-تەوريالىق كونفەرەنتسيا ءوتتى. ءىس-شارا اياسىندا ديالەكتيكالىق لوگيكا مەكتەبىنىڭ نەگىزىن قالاۋشى جابايحان ءابدىلديننىڭ 25 تومدىق عىلىمي ەڭبەكتەر جيناعى تانىستىرىلدى.
كونفەرەنتسياعا قاتىسۋشىلار قازىرگى زامانعا فيلوسوفيالىق تالداۋ جۇرگىزىپ, ەتيكا مەن مورالدىق جاۋاپكەرشىلىك ماسەلەلەرىن, قازىرگى زامان كونتەكسىندەگى قازاق فيلوسوفياسىنىڭ دامۋ پەرسپەكتيۆالارىن تالقىلادى.
جيىندا ەۇۋ رەكتورى ەرلان سىدىقوۆ جابايحان ءابدىلديننىڭ وتاندىق پارلامەنتاريزمدى دامىتۋعا جانە قازاقستانداعى ادام قۇقىقتارىن قورعاۋعا قوسقان زور ۇلەسىن اتاپ ءوتتى.
– ۇلتتىق زاماناۋي كاسىبي فيلوسوفيا عىلىمىنىڭ قالىپتاسۋى جابايحان مۇباراك ۇلىنىڭ ەسىمىمەن تىكەلەي بايلانىستى. قازاقستانداعى العاشقى ديالەكتيكالىق لوگيكا مەكتەبىنىڭ نەگىزىن قالاعان جانە وتاندىق فيلوسوفيانىڭ دامۋىنا باعا جەتپەس ۇلەس قوسقان عىلىمي-زەرتتەۋ ەڭبەكتەرى, كوپجىلدىق اعارتۋشىلىق قىزمەتى ءبىزدىڭ رۋحاني مۇرامىزدىڭ التىن قازىناسىنا اينالدى, – دەدى ول.
اكادەميكتىڭ كونفەرەنتسيا اياسىندا تانىستىرىلعان 25 تومنان تۇراتىن جيناعىندا كەيىنگى 5-7 جىلدا جازعان ەڭبەكتەرى قامتىلعان. وعان كانت پەن گەگەل فيلوسوفياسى, اباي, ءا.بوكەيحان, م.اۋەزوۆ, شەكسپير, م.گوركي, تاعى دا باسقالار تۋرالى شىعارمالارى ەنگەن. سونىمەن قاتار جاڭادان جارىق كورگەن جيناقتا قوعامنىڭ دامۋ ۇدەرىسىندەگى ءدىن فورمالارىنىڭ ەۆوليۋتسياسى, ءومىر تۋرالى فيلوسوفيالىق ويلار بەرىلگەن.
اكادەميكتىڭ ەڭبەكتەرى ستۋدەنتتەرگە, ماگيسترانتتارعا, دوكتورانتتارعا, سونىمەن قاتار فيلوسوفيا مەن رۋحاني مادەنيەتكە قىزىعۋشىلىق تانىتاتىن قالىڭ وقىرمان قاۋىمعا ارنالعان.
– مەن قازىر عىلىمي تۇرعىدا ەڭبەك ەتىپ جاتىرمىن. ءبارى ويداعىداي بولىپ, 30 تومدىق كىتاپ جارىققا شىعىپ جاتسا, مۇنى قازاقستاننىڭ تاۋەلسىزدىگىنە قوسقان ۇلەسىم دەپ ەسەپتەيمىن. كوپ نارسە جاساۋ ءۇشىن كوپ ەڭبەك ەتۋ كەرەك. ەرىنبەي ەڭبەك ەتكەن ادام شارشامايدى. ەگەر ادامنىڭ ميى قارتايا باستاسا, وندا ادامنىڭ ءوزى دە قارتايادى, – دەيدى فيلوسوف.