تۇركيانىڭ گازيانتەپ قالاسىندا بولعان جويقىن جەر سىلكىنىسىنىڭ سالدارىن جويۋعا جۇمىلدىرىلعان قازاقستاندىق قۇتقارۋشىلاردىڭ ءبىرىنشى ەشەلونى ەلگە امان-ەسەن ورالدى, دەپ حابارلايدى Egemen.kz تجم ءباسپاسوز قىزمەتىنە سىلتەمە جاساپ.
قر تجم قۇتقارۋشىلارى مەن اپاتتار مەديتسيناسى ورتالىعىنىڭ دارىگەرلەرى مىنگەن ۇشاق الماتى اۋەجايىنا قوندى. ولاردى تۋىستارى, دوستارى مەن ارىپتەستەرى كۇتىپ الدى.
مەملەكەت باسشىسىنىڭ تاپسىرماسى بويىنشا 7 اقپاندا قۇتقارۋ بولىمشەلەرىنىڭ كۇشتەرى مەن قۇرالدارى, ونىڭ ىشىندە قازاقستان تجم تەحنيكاسى, اپاتتار مەديتسيناسى ورتالىعىنىڭ دارىگەرلەرى جانە كينولوگيالىق ەسەپتوپتار العاشقىلاردىڭ ءبىرى بولىپ ەكى ەشەلونمەن جولعا شىعىپ, ەڭ كۇردەلى وبەكتىلەردە ىزدەستىرۋ-قۇتقارۋ جۇمىستارىن جۇرگىزۋگە كىرىسكەن ەدى. قازاقستاندىق قۇتقارۋشىلار توبىن تج ءبىرىنشى ۆيتسە-ءمينيسترى يبراگيم كۇلشىمباەۆ باسقاردى.
تۇركيانىڭ ءۇش وڭىرىندە ىزدەستىرۋ-قۇتقارۋ جۇمىستارىن جۇرگىزۋ باستالعاننان بەرى قازاقستان تجم قۇتقارۋشىلارىنىڭ كۇشتەرى 7 ادامدى قۇتقاردى. قازا تاپقان 88 ادامنىڭ, ونىڭ ىشىندە 10 بالانىڭ دەنەسى شىعارىلدى.
«قۇتقارۋشىلار قولمەن, سونداي-اق ينجەنەرلىك تەحنيكانى, اۆاريالىق-قۇتقارۋ جابدىقتارىن, شانتس اسپاپتارىن تارتا وتىرىپ, 250 مىڭنان تەكشە استام مەتر ۇيىندىلەردى بولشەكتەدى. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ, ۇيىندىلەر استىندا زارداپ شەككەندەرمەن اۋديو بايلانىس ورناتۋ, قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى. قازاقستاندىق قۇتقارۋشىلاردىڭ ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ, جەدەل جانە ساۋاتتى ءىس-قيمىلدىڭ, سونداي-اق زارداپ شەككەندەردى بلوكتان شىعارۋ بويىنشا ۋاقتىلى قابىلدانعان شارالاردىڭ ناتيجەسىندە مۇمكىندىك تۋدى. قۇتقارۋشىلار قۇلاعان قۇرىلىس ماتەريالى مەن ءۇي جيھازىنىڭ قالدىقتارى, تار ساڭىلاۋلار ارقىلى جولدى كەسىپ ءوتتى. قۇتقارۋشىلاردىڭ مۇنداي جۇمىسى وتە قاۋىپتى جانە جوعارى كاسىبيلىكتى, قىراعىلىق پەن جەدەلدىكتى تالاپ ەتەدى», دەلىنگەن حابارلامادا.
قازاقستان تجم اپاتتار مەديتسيناسى ورتالىعىنىڭ دارىگەرلەرى دە تاۋلىك بويى زارداپ شەككەندەرگە بىلىكتى مەديتسينالىق كومەك كورسەتتى. بارلىق جۇمىس كەزەڭىندە 200-گە جۋىق جەرگىلىكتى تۇرعىن مەن قۇتقارۋشىلارعا, ونىڭ ىشىندە 30-عا جۋىق بالاعا مەديتسينالىق كومەك كورسەتىلدى. جەرگىلىكتى تۇرعىنداردا سترەسستىڭ جەدەل رەاكتسياسىمەن, گيپوتەرميامەن, تىنىس الۋ ورگاندارىنىڭ اۋرۋلارىمەن, سونداي-اق ءارتۇرلى جاراقاتتارمەن بايلانىستى اۋرۋلار باسىم بولدى. پنەۆموكاركاس مودۋلىنە نەگىزدەلگەن مەديتسينالىق پوست ىزدەۋ ناتيجەلەرىن كۇتكەن زارداپ شەككەندەردىڭ تۋىستارى ءۇشىن باسپانا بولدى. بۇل مودۋل قيراعان عيماراتتاردىڭ اراسىندا قالعان ادامدار ءۇشىن جىلىتۋ پۋنكتى رەتىندە دە پايدالانىلدى.
ء«بىزدىڭ كينولوگيالىق ەسەپتوپتارىمىز ىزدەۋ-قۇتقارۋ جۇمىستارىندا دا تاماشا ناتيجەلەر كورسەتتى جانە ۇيىندىلەر استىنداعى ادامداردى ىزدەۋ كەزىندە وزدەرىنىڭ جوعارى بىلىكتىلىگىن راستادى. قۇتقارۋشى يتتەر-بەلگيالىق مالينۋا دجەيكوب, ليگا م سيريۋس جانە اكسەل, لابرادور چارلي كينگ, نەمىس وۆچاركاسى ميرتا, گرينپيس ەسىمدى بوردەر كوللي-نۇسقاۋشىلارمەن جانە قۇتقارۋشىلار جاساقتارىمەن بىرگە ءار ادامنىڭ ءومىرى ءۇشىن بىرنەشە كۇن بويى قيراعان نىسانداردا جۇمىس ىستەدى», دەلىنگەن تجم حابارلاماسىندا.
ەسكە سالا كەتسەك, مەملەكەت باسشىسىنىڭ تاپسىرماسى بويىنشا تۇركياعا گۋمانيتارلىق كومەك تە جىبەرىلدى. تابيعي اپات ايماعىنا زارداپ شەككەندەرگە كومەك كورسەتۋگە ارنالعان شاتىرلار, جىلىتۋ قۇرىلعىلارى, جىلى كيىمدەر جانە باسقا دا قاجەتتى زاتتار جىبەرىلدى. گۋمانيتارلىق كومەكتىڭ جالپى كولەمى 55 توننانى قۇرادى.