بۇگىن اقپارات جانە قوعامدىق دامۋ ءمينيسترى دارحان قىدىرالى مەن عىلىم جانە جوعارى ءبىلىم ءمينيسترى ساياسات نۇربەك MediaLab جۋرناليستيكا ورتالىعىنىڭ اشىلۋ راسىمىنە قاتىستى, دەپ حابارلايدى Egemen.kz.
اقپارات جانە قوعامدىق دامۋ مينيسترلىگى جانىنداعى MediaLab جۋرناليستيكا ورتالىعى قوعامدىق مەديا مەن كوممۋنيكاتسيالاردىڭ قوعامعا اسەرى تاقىرىپتارى شەڭبەرىندە قولدانبالى عىلىمي زەرتتەۋلەر جۇرگىزۋمەن اينالىسادى.
كەزدەسۋ بارىسىندا ۆەدومستۆو باسشىلارى مەديا-ماماندىقتار ءۇشىن ادەبيەت دايارلاپ, باسىپ شىعارۋدى, «بولاشاق» باعدارلاماسى شەڭبەرىندە جۋرناليستەردى وقىتۋدى ۇيىمداستىرۋدى, جۋرناليستيكا فاكۋلتەتى ستۋدەنتتەرىنىڭ وقۋ مەرزىمىندە تاجىريبەدەن ءوتۋ مەرزىمىن ەسەپكە الۋ مەن يندۋسترياداعى دۋالدى ءبىلىم جۇيەسىن تالقىلادى.
«ەستەرىڭىزدە بولسا, Astana MediaWeek فورۋمىندا ءبىز مەديا يندۋستريانى زەرتتەۋمەن, جۋرناليستيكا جانە كوممۋنيكاتسيا سالاسىنداعى مامانداردىڭ بىلىكتىلىگىن ارتتىرۋمەن جۇيەلى تۇردە اينالىساتىن ورتالىق اشامىز دەگەن ەدىك. ەندى, مىنە سونىڭ ورايى بۇگىن كەلىپ وتىر. MediaLab ورتالىعى مەديا تۇتىنۋ پاتتەرندەرىن عىلىمي تۇرعىدا زەرتتەۋدى, جۋرناليستەردىڭ, اسىرەسە ايماقتاعى جۋرناليستەردىڭ بىلىكتىلىگىن ارتتىرۋدى, سالالىق جۋرناليستيكانى جەتىلدىرۋدى, ءباسپاسوز حاتشىلارىنىڭ كاسىبي داعدىلارىن دامىتۋدى كوزدەيدى», دەپ اتاپ ءوتتى دارحان قىدىرالى.
ورتالىقتا جۋرناليستيكا ماماندىعى بويىنشا وقىپ جاتقان ستۋدەنتتەرگە دە ادىستەمەلىك قولداۋ كورسەتىلەدى.
ء«بىز الەمدەگى جۋرناليستيكا مەكتەپتەرىنىڭ وزىق دەگەن وقۋ باعدارلامالارىن «اشىق سيللابۋس» جوباسى اياسىندا قازاقستانعا اكەلىپ, ۇزدىك كىتاپتار مەن وقۋلىقتاردى قازاق تىلىنە اۋدارۋدى جوسپارلاپ وتىرمىز», دەدى د. قىدىرالى.
سونداي-اق عىلىم سالاسىنداعى سۇراقتار, ونىڭ ىشىندە عىلىمي جۋرناليستيكا جانە باق-تاعى عىلىمي زەرتتەۋلەر قاراستىرىلدى. ءىس-شارا سوڭىندا مينيسترلەر بىرلەسكەن جوبالاردى جۇزەگە اسىرۋ تۋرالى ۋاعدالاستىققا قول جەتكىزدى.