قارعىن سۋدىڭ قاۋپى پارتيالىق باقىلاۋ نازارىندا

سۋ تاسقىنىڭ الدىن الۋعا قاتىستى وزەكتى ماسەلەلەر «Amanat»-تىڭ پارتيالىق باقىلاۋ كوميتەتىنىڭ كەزەكتى وتىرىسىندا تالقىلاندى. كوميتەت توراعاسى ارتۋر پلاتونوۆ ەلىمىزدەگى 255 ەلدى مەكەن سۋ باسۋ قاۋپى بار ايماقتاردا قالىپ وتىرعانىن جانە وندا 127 مىڭنان استام تۇرعىن ءۇي مەن 700 مىڭنان استام ادام بار ەكەنىن اتاپ ءوتتى. توتەنشە جاعدايلار مينيسترلىگىنىڭ مالىمەتىنشە, ەلىمىزدە اپاتتىق جاعدايداعى 5 جانە جوندەۋدى قاجەت ەتەتىن 73 سۋ قويماسى, قورعانىس بوگەندەرى, پلاتينا مەن توعاندار بار. ولار اياق استىنان ىستەن شىعاتىن بولسا, جەرگىلىكتى تۇرعىندارعا ۇلكەن قاۋىپ تونەدى.

سونداي-اق جيىندا بىلتىر 2021-2023 جىلدارعا جوسپارلانعان جول كارتاسى بو­يىنشا سۋ تاسقىنىنا قارسى اتقارىلۋعا ءتيىستى 68 ءىس-شارانىڭ 41-ءى ورىندالماعانى بەلگىلى بولدى.

«ەلىمىزدەگى 400-دەن استام گيدروتەح­ني­كالىق قۇرىلىستى جوندەۋ قاجەت. سولاي بولا تۇرا, كوممۋنالدىق جانە جەكەمەنشىكتەگى مۇنداي قۇرىلىستاردىڭ باسىم كوپشىلىگى جىلدار بويى نازاردان تىس قالىپ كەلەدى. تيىسىنشە ولاردى جوندەۋ جانە جاڭعىرتۋ ءىس-شارالارى سۋ سالاسىن دامىتۋ جوسپارىنا ەنگىزىلمەي قالادى. وسىنداي قۇرىلىستاردىڭ باسىم كوبىسى 30 جىلدان استام ۋاقىت پايدالانىپ كەلەدى. ولاردىڭ 70%-دان استامىنىڭ توزىعى جەتكەن. سوندىقتان ولاردىڭ بەرىكتىگى مەن قاۋىپسىزدىك دەڭگەيى ايتارلىقتاي تومەندەدى. سۋ تاسقىنىنا قارسى الدىن الۋ ءىس-شارالارىن جوس­پارلاۋ, سونداي-اق ولاردى قارجىلاندىرۋ ىسىندە تۇيتكىلدى ماسەلەلەر بار», دەدى ارتۋر پلاتونوۆ.

ال توتەنشە جاعدايلار ءمينيسترى يۋري ءيليننىڭ ايتۋىنشا, بىلتىر سۋ تاسقىنىنا قارسى اتقارىلعان جۇمىس 213 ەلدى مەكەننىڭ سۋ باسۋ قاۋپىن بولدىرماۋعا جانە 120 مىڭعا جۋىق ءۇي ورنالاسقان وزگە دە 580 ەلدى مەكەندەگى قاۋىپتى بارىنشا ازايتۋعا مۇمكىندىك بەرگەن. وندا 550 مىڭنان استام ادام تۇرادى. الايدا جەرگىلىكتى اكىم­دىك­تەردىڭ ۋاقتىلى الدىن الۋ جۇمىسىن جۇر­گىزبەۋى نەگىزگى ماسەلەنىڭ ءبىرى بولىپ قالىپ وتىر.

«تۇرعىندار ارىق جۇيەسىن بىرەۋ كەلىپ تازالاپ بەرەدى دەپ كۇتىپ وتىرادى. ياعني ءبىزدىڭ قىزمەتكەرلەر كوبىنە-كوپ كوممۋنالدىق قىز­مەتتەردى اتقارىپ جۇرەدى. الايدا بۇل توتەنشە جاعدايلار مينيسترلىگىنە ءتان مىندەت ەمەس. ءبىز ورتكە قارسى قىزمەت بولىم­شە­لەرىن, اسكەري بولىمدەردى جانە جەدەل-قۇتقارۋ جاساقتارىن اۋلا­نى سۋدان تازارتۋ جۇمىسىنا جۇمىلدىرۋعا ءماجبۇرمىز», دەپ اتاپ ءوتتى مينيستر.

وتىرىس قورىتىندىسى بويىنشا كوميتەت مۇشەلەرى سۋ تاسقىنى قاۋپى بار وڭىرلەردەگى تۇيتكىلدى ماسەلەسى كوپ گيدروتەحنيكالىق قۇ­رىل­ىستاردا پارتيالىق باقىلاۋ بەكەت­تەرىن اشۋ جونىندە قاۋلى قابىلدادى. ءتيىستى ناتيجە بولۋى ءۇشىن پارتيالىقتار اكىمدىكتەرگە ارىقتار مەن كانالداردى, درەناج جۇيەلەرىن, وزەن ارنالارىن مۇزدان جانە قوقىستان تازارتۋ جۇمىسىن ۋاقتىلى اياقتاۋدى مىندەتتەۋ ءۇشىن ۇسىنىس ەنگىزبەكشى. سونداي-اق گيدروتەحنيكالىق قۇرىلىستاردى سالۋ جانە جوندەۋ جونىندەگى جوبالاردىڭ جوبالىق-سمەتالىق قۇجاتتاماسىن ازىرلەۋ ءراسىمىن جەدەلدەتۋ مەن سۋ شارۋاشىلىعى قۇرىلىستارىن پايدالانۋ قاعيدالارىنىڭ ساقتالۋىن تەكسەرەتىن ارنايى جۇمىس توبىن قۇرۋدى دا ۇسىنىلدى.