قاراعاندى ايماعىندا بالالاردىڭ بوس ۋاقىتىن ءتيىمدى وتكىزۋى ءۇشىن تەگىن ۇيىرمەلەر كوبەيىپ كەلەدى. رەسمي مالىمەتتەرگە سۇيەنسەك, قازىر وبلىستا اقىسىز 144 ۇيىرمە جۇمىس ىستەپ تۇر. وندا 4 806 بالا ءتۇرلى باعىتتا ءوزىن-ءوزى دامىتا الادى.
بالالار مۇندا بي تۇرلەرىن ۇيرەنىپ, بەينەلەۋ, كەسكىندەمەدە تالابىن ۇشتايدى. كيىم ۇلگىلەرىن دايىنداپ, ونى ءپىشىپ, تىگۋدى ۇيرەنەدى. اكتەرلىك شەبەرلىك, ەسترادالىق ۆوكال, حالىق اندەرى, دومبىرا ۇيىرمەسى دە بار. ۇيىرمەلەر مۇنىمەن شەكتەلمەيدى. بۇل ارادا تەك ءبىر پاراسى عانا اتالىپ وتىر. شىعارماشىلىق تاپسىرىستاعى ۇيىرمەلەر قاراعاندى, تەمىرتاۋ, شاحتينسك جانە ساران قالالارىندا دا جاقسى جۇمىس ىستەپ تۇر.
بۇل ورايدا ەرەكشە بالالالار دا ۇمىت قالعان جوق. ماسەلەن, «باتىل جۇرەك» جانە «ۋمنيتسى» قوعامدىق قايىرىمدىلىق قورلارىنىڭ بەيىمدەلگەن ەكى ۇيىرمەسىندە سۋرەت, كوركەمسۋرەت جانە مۇسىندەۋگە قىزىققان مۇمكىندىگى شەكتەۋلى 25 بالا بار. جالپى, بيىل وڭىردەگى شىعارماشىلىق تاپسىرىستى جان باسىنا قارجىلاندىرۋعا بيۋدجەتتەن 1 ملرد 127 ملن تەڭگە بولىنگەن.
– مەنىڭ قىزىم ەميليا ەكى جىل بويى La Dance complex ستۋدياسىنىڭ Millennium انسامبلىندە بيلەيدى. العاشقى جىلى اقىلى وقىدىق. سودان كەيىن ArtSport باعدارلاماسى تۋرالى ءبىلىپ, ۆاۋچەر الدىق. ەندى ءبىر جىلدان بەرى تەگىن اينالىسىپ كەلەمىز. ايتپەسە ايىنا 13 مىڭ تولەۋگە تۋرا كەلەر ەدى. مەنىڭشە, بۇل بالالار ءۇشىن تاماشا مۇمكىندىك. ويتكەنى بارلىق وتباسىنىڭ اقىلى ۇيىرمەلەرگە بالالارىن جىبەرۋگە مۇمكىندىگى جوق, – دەيدى قاراعاندى تۇرعىنى نايليا يمرانوۆا.
قازىرگى تاڭدا انسامبلگە 3 جاستان 13 جاسقا دەيىنگى 200-گە جۋىق بالا قاتىسادى.
– La Dance complex ورتالىعى الدىمەن استانادا اشىلدى. ArtSport جوباسىنىڭ ناتيجەسىندە كەڭەيىپ, 2021 جىلى قاراعاندىدا جۇمىس ىستەي باستادىق. بۇعان دەيىن ءار فيليالدا 60-تان 150-گە دەيىن بالا وقىعان, جان باسىنا شاققانداعى قارجىلاندىرۋدان سوڭ تەك قاراعاندىنىڭ وزىندە بالالار سانى 385-كە دەيىن ءوستى, – دەيدى قاراعاندىداعى ستۋديانىڭ نەگىزىن قالاۋشى اننا ۆولودينا.
ستۋديادا بي, كەسكىندەمە, شاحمات, ۆوكال ۇيىرمەلەرى ۇيىمداستىرىلعان.
كيىم ءپىشۋ جانە تىگۋدى ۇيرەنگىسى كەلەتىن بالدىرعاندارعا «توعجان» شىعارماشىلىق ورتالىعىندا ارنايى سەرتيفيكاتى بار شەبەرلەر ساباق بەرەدى. «كيىم ۇلگىسى, ءپىشۋ جانە تىگۋ» ۇيىرمەسىندەگى ءتورت توپقا 30-دان استام بالا قاتىسىپ ءجۇر.
– باستاپقىدا «كەسكىندەمە جانە سۋرەت سالۋ» باعىتىنداعى 6 توپتا شامامەن 60 بالا وقىدى. ءبىر عانا وقىتۋشى بولدى. ArtSport باعدارلاماسى ارقىلى ءبىزدىڭ ورتالىقتا تاعى ءۇش ۇيىرمە اشىلدى: دومبىرا, كيىم ۇلگىلەۋ, ءپىشۋ جانە تىگۋ, گرافيكا. توعىز وقىتۋشى جۇمىسقا قابىلداندى. بۇل ۇيىرمەلەرگە 280 ادام تەگىن بارادى. ءپىشۋ جانە تىگۋمەن اينالىساتىن بالالار ءتۇرلى كورسەتىلىمدەرگە قاتىسادى, – دەيدى ورتالىق باسشىسى ايگۇل مەدەۋباەۆا.
قازاقستاندا مەملەكەتتىك شىعارماشىلىق تاپسىرىس جوباسى 2021 جىلدىڭ مامىر ايىندا باستالعان بولاتىن. ونىڭ ماقساتى – 4 پەن 17 جاس ارالىعىنداعى بالالاردى تەگىن ساباقتارمەن بارىنشا قامتۋ. جوبا artsport.edu.kz پورتالىندا ىسكە اسىرىلادى. ول قىزمەت كورسەتۋشىلەردى, سونداي-اق بالالار مەن جاسوسپىرىمدەردىڭ اتا-انالارىن نەمەسە زاڭدى وكىلدەرىن شىعارماشىلىق ۇيىرمەلەر مەن سپورت تۇرلەرىنە تەگىن قاتىسۋعا ۆاۋچەر الۋ ءۇشىن تىركەۋگە جانە وتىنىمدەر قابىلداۋعا ارنالعان.
قاراعاندى وبلىسى