مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا دا, ءتۇرلى جيىنداردا دا بۇقارالىق سپورتقا كوڭىل ءبولۋ قاجەتتىگىن ەسكەرتىپ كەلەدى. بۇقارالىق سپورتتىڭ دامۋى شىرايلى شىعىستا ويداعىداي دەۋگە بولادى. تۇرعىنداردىڭ 30 پايىزى بوس ۋاقىتتارىن ءماندى دە ءساندى وتكىزەدى.
ءبىر عانا مىسال. جاقىندا وسكەمەن قالاسىنداعى «يمپەريا» بيليارد كلۋبىندا ءوڭىردىڭ ەكونوميكاسى, مادەنيەتى مەن سپورتىنىڭ دامۋىنا وزىندىك ۇلەس قوسقان, وبلىس, اۋدانداردى باسقارىپ تۇرعان كەزىندە جاعىمدى جاڭالىقتارمەن جەرلەستەرىن قۋانتقان مەملەكەت جانە قوعام قايراتكەرى, قازاقستان رەسپۋبليكاسى «الەم قىراندارى» بيلياردشىلار قوعامداستىعى شىعىس قازاقستان وبلىستىق فيليالىنىڭ توراعاسى ءتۇسىپحان تۇسىپبەكوۆتىڭ 70 جىلدىق مەرەيتويىنا ارنالعان تۋرنير ءوتتى. ونى وتكىزۋگە قازاقستان رەسپۋبليكاسى بيليارد سپورتى فەدەراتسياسى شىعىس قازاقستان وبلىستىق فيليالىنىڭ ديرەكتورى سەرىك اقتانوۆ مۇرىندىق بولدى. رەتى كەلگەندە ايتا كەتۋ كەرەك, سپورت دەسە ىشكەن اسىن جەرگە قوياتىن ىسكەر ازاماتتىڭ باستاماسىمەن وسكەمەندە بيلياردتان ازيانىڭ اشىق چەمپيوناتى, جازۋشى قابدەش ءجۇمادىلوۆتى ەسكە الۋعا ارنالعان تۋرنير, بىرنەشە حالىقارالىق, وبلىستىق جارىستار ءوتىپ, بيليارد سپورتىن جانداندىراتىندار قاتارى ارتا ءتۇستى. سەرىك قاسىمبەك ۇلى جەتەكشىلىك ەتەتىن فەدەراتسيانىڭ مۇشەلەرى استانا, الماتى, شىمكەنت, ەلىمىزدىڭ باسقا دا قالالارىندا وتەتىن جارىستاردىڭ كورىگىن قىزدىرىپ, جۇلدەلى ورىنداردى يەلەنىپ ءجۇر.
ءتۇسىپحان تۇسىپبەكوۆتىڭ تۋرنيرىنە 23 تاستاياق شەبەرى قاتىستى. ولاردىڭ اراسىندا ءتۇسىپحاننىڭ دوستارى, زامانداستارى, بيليارد سپورتىن ناسيحاتتاۋشى ارداگەرلەر بولدى. الماتىدان ءتۇسىپحاننىڭ دوسى, جازۋشىلار وداعىنىڭ باسقارما توراعاسى ۇلىقبەك ەسداۋلەت, استانادان مەملەكەت جانە قوعام قايراتكەرى, ەل سپورتىنىڭ دامۋىنا ەلەۋلى ۇلەس قوسىپ جۇرگەن سادىبەك تۇگەل, وبلىستىق دراما تەاترىنىڭ ديرەكتورى رۋسلان قايىرسىنوۆ, مەرەيتوي يەسىنىڭ كىندىك قانى تامعان تارباعاتايدان دەلەگاتسيانى باسقارىپ كەلگەن اۋداندىق ىشكى ساياسات ءبولىمىنىڭ باسشىسى ەرمەك قۇرمانعاليەۆ, تاعى باسقا ازاماتتار اقجارما تىلەكتەرىن ايتىپ, اتا سالتىمەن مەرەيتوي يەسىنىڭ يىعىنا شاپان جاپتى.
وبلىستىق توتەنشە جاعدايلار باسقارماسىندا ۇزاق جىل باسشى بولعان پولكوۆنيك الماس ۋاليەۆ قازىر دە بابىندا ەكەنىن دالەلدەدى. بيلياردپەن ۇزاق جىل شۇعىلدانىپ جۇرگەن ول شەبەرلىگىن پاش ەتىپ, چەمپيون اتاندى. نيكولاي رىجيح, قايرات ادىلبەكوۆ, بادري دجەبەسوۆ جۇلدەلى ورىنداردى ءبولىستى. ولارعا فەدەراتسيا باسشىسى قۇرمەت گراموتالارىن تاپسىردى. استانا مەن الماتىدان, اۋدانداردان كەلگەن قوناقتار تاعىلىمى مول ءتۋرنيردى وتكىزگەن ازاماتتارعا العىسىن ايتتى. ال مەرەيتوي يەسى الداعى ۋاقىتتا دا بيليارد سپورتىن دامىتۋعا ۇلەس قوسا بەرەتىنىن جەتكىزدى.
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
وسكەمەن