قوستاناي وبلىستىق تاريحي-ولكەتانۋ مۋزەيىندە ساقتاۋلى تۇرعان قۇندى جادىگەرلەردىڭ ءبىرى – ايتباي باتىردىڭ دۋلىعاسى. كونە مۇرانى مۇراجايعا باتىردىڭ ۇرپاعى سارىكول اۋىلىنىڭ تۇرعىنى مۇرات جانۇزاقوۆ تاپسىرىپتى.
تۇتاستاي بولاتتان قۇيىلعان دۋلىعانى بۇگىندە توت باسا باستاعان. ءپىشىنى كۇمبەزگە ۇقسايدى. توبەسىندە بيىكتىگى شامامەن 2,5 سم بولاتىن توبەشاشاق بەكىتەتىن تۇتىگى بار. جيەگىنە اينالا تەسىك كوزدەر سالىنىپتى. ءسىرا, مويىندى ۇشقان جەبەدەن, قىلىشتىڭ ءجۇزى مەن نايزانىڭ ۇشىنان قورعايتىن بولات شىنجىرلى جىعا بەكىتۋگە ارنالسا كەرەك.
– سارىكول وڭىرىنەن شىققان ايتباي اتكەلتىر ۇلى ايگىلى بوگەنباي, قابانباي باتىرلارمەن بىرگە قازاق جەرىن سىرتقى جاۋلاردان قورعاپ قالعان. ايتباي باتىردىڭ ون سەگىزىنشى عاسىردا ەدىل قالماقتارىمەن حاربالى بەكىنىسى ءۇشىن كەسكىلەسكەن قانتوگىس شايقاسقا قاتىسىپ, بەكىنىستى جاۋدان ازات ەتكەنى تۋرالى دەرەك بار. ايتباي باتىر كيگەن دۋلىعا اتادان بالاعا ميراس بولىپ ساقتالىپ كەلە جاتىر, – دەيدى مۋزەي باسشىسىنىڭ ورىنباسارى ەلميرا الشىموۆا.
ايتباي اتكەلتىر ۇلى تەك باتىر عانا ەمەس, ەل تاعدىرى شەشىلەر كەلەلى ماسەلەلەر تالقىلانار تۇستا دا سۇبەلى ءسوز ايتا بىلگەن شەشەن كىسى بولعان. ونىڭ پىكىرىمەن حان دا, قارا دا ساناسقان دەسەدى. ماسەلەن, ابىلاي حان حال ۇستىندە جاتقاندا ورنىنا بالاسى قاسىمنىڭ ەمەس, ءۋالىنىڭ حان تاعىنا وتىرۋىنا وسى ايتباي باتىردىڭ ءۋاجى سەبەپ بولعان دەگەن اۋىزەكى دەرەك بار.
ەل قۇرمەتىنە بولەنگەن باتىر كيەلى تۇركىستانداعى قوجا احمەت ياساۋي كەسەنەسىنە جەرلەنگەن.
قوستاناي وبلىسى