ەلىمىزدىڭ وڭتۇستىگىن ورتالىقپەن بايلانىستىرىپ تۇرعان «قىزىلوردا – جەزقازعان» جولىمەن ءبىر ءجۇرىپ وتكەن جان «جول ازابىن جۇرگەن بىلەردىڭ» ءمانىن ابدەن ۇعارى انىق. جەر قارا, كۇن جىلىنىڭ وزىندە دىتتەگەن جەرىڭە دىڭكەلەپ جەتەسىڭ, ال ەرتە كوكتەم مەن قىستا كونە جولدىڭ سورابى مي باتپاققا اينالىپ, كولىككە كەدەرگى كوبەيە بەرەدى. بۇل ارالىقتا اپاتتار دا ءجيى بولىپ تۇرادى. بىراق سوندا دا كولىك اعىنى تولاستاعان ەمەس.
شۋ باعىتىنا قاراعاندا قىزىلوردا مەن استانانىڭ اراسىن 700 شاقىرىمعا جاقىنداتا تۇسەتىن جولمەن قىستىڭ كۇندەرى جولاۋشى تاسىمالداعاندار قاتىناسا, كۇن جىلىنا وڭتۇستىكتەن ورتالىققا اۋىلشارۋاشىلىعى مەن باقشا ونىمدەرىن, قۇرىلىس ماتەريالدارىن تاسىعان كولىكتەر كەرۋەنى جولعا شىعادى. مامانداردىڭ ايتۋىنشا, كۇرە جولمەن تاۋلىگىنە مىڭداعان كولىك قاتىنايدى.
سەكسەنىنشى جىلدارى ەل ەكونوميكاسىنداعى ماڭىزى جوعارى باعىتتىڭ قىزىلوردا بولىگىندەگى 127 شاقىرىمعا ماڭعىستاۋ وڭىرىنەن اكەلىنگەن بيتۋم توسەلگەن ەكەن. قازىر وسى بولىك III كاتەگورياعا جاتادى. ال اسفالتتىڭ ءىزى دە جوق قالعان ارالىعى IV كاتەگوريا سانالادى.
ايتپاقشى, 2003 جىلى جەرگىلىكتى «دورستروي» مەكەمەسى جولدىڭ 30 شاقىرىمىن سالعان. باس-اياعى 8-9 ايدا بىتكەن جۇمىس كوپتىڭ كوكەيىندە ءۇمىت وتىن وياتىپ ەدى. بىراق كوپ ۇزاماي اگرارلى ايماق پەن ءوندىرىستى ءوڭىردى جالعاعان جاقسى باستاما ورتا جولدان ءۇزىلدى. سودان بەرگى جىلدار ىشىندە بۇل ماسەلە ءجيى ايتىلعانىمەن, رەسپۋبليكالىق ماڭىزى بار كۇرە جولعا كوڭىل اۋدارىلماستان قالا بەردى.
وسىدان 2-3 جىل بۇرىن «قىزىلوردا – پاۆلودار – ۋسپەن – رف شەكاراسى» اۆتوموبيل جولىنىڭ قىزىلوردا – جەزقازعان بولىگىندەگى 12-215 شاقىرىمى ارالىعىن قايتا جاڭعىرتۋدىڭ باستاماسى رەتىندە «قازجولجوبا» جوبالاۋ-ىزدەستىرۋ ينستيتۋتى», «قازجولجوبا» مەن «سەمجولجوبا» جاۋاپكەرشىلىگى شەكتەۋلى سەرىكتەستىكتەرى جوباسى بويىنشا قوعامدىق تىڭداۋلار وتكىزىلە باستاعاندا 30 جىل كۇتكەن جولدىڭ جونگە كەلە قويارىنا سەنگەندەر ساناۋلى ەدى. كوپ ۇزاماي جوبالىق-سمەتالىق قۇجاتتارى دايىندالىپ, قىزىلوردا وبلىسىنداعى 204 شاقىرىم 6 لوتقا ءبولىنىپ, مەملەكەتتىك ساتىپ الۋ كونكۋرسى وتكىزىلدى. وتكەن جىلى مەردىگەر مەكەمەلەر «قىتاي ازاماتتىق ينجەنەرلىك-قۇرىلىس كورپوراتسياسى» جشق, «قىران» جشس, «گۋيچجوۋ جول-ينجەنەرلىك كورپوراتسياسى» جشق جانە «Stecol Corporation» قۇرىلىسقا قاجەتتى قۇجاتتاردى ازىرلەپ, دايىندىق جۇمىستارىن جۇرگىزدى. بيىل مەردىگەر مەكەمەلەر جولدىڭ 100 شاقىرىمنان اسا بولىگىن جاڭعىرتۋدى جوسپارلاپ وتىر, قۇرىلىس ماتەريالدارىنىڭ باسىم بولىگى قويماعا جەتكىزىلدى.
– وسى جىلى 1 ساۋىرگە دەيىن مەردىگەر كومپانيالار قاجەتتى ماتەريالداردىڭ 70 پايىزىن دايىنداپ قويۋى كەرەك. جەرگىلىكتى «قىران» جشس وزىنە تيەسىلى 29 شاقىرىمنىڭ 10 شاقىرىمىنا ءبىرىنشى توسەنىمدى سالىپ قويدى. باسقا كومپانيالار جۇمىسىندا دا قارقىن بار. قۇرىلىسقا تەحنيكالىق قاداعالاۋ «DONWA Engineering Co. LTD» مەن «M50 Consalting Group» كومپانيالارىنا جۇكتەلگەن. «قازاۆتوجول» ۇك» اق جالپى ۇيلەستىرۋ, مونيتورينگ جۇمىستارىنا جاۋاپتى, – دەيدى «قازاۆتوجول» ۇك» اق وبلىستىق فيليالى ديرەكتورىنىڭ ورىنباسارى شانجارحان مىرزاباي.
جوبا اياسىندا قالادان تولىعىمەن جارىقتاندىرىلعان اينالما جول, كۇرە جولدىڭ ۇزىندىعى 204 شاقىرىمدىق قايتا جاڭعىرتىلاتىن بولىگىندە اۋىلشارۋاشىلىعى تەحنيكالارى مەن ءۇي جانۋارلارىنا ارنالعان وتكەلدەر, 3 كوپىر, 2 ارالىق باقىلاۋ اركاسىن, دەمالىس الاڭدارى مەن مال وتكەلدەرىن سالۋ قاراستىرىلعان.
قايتا جاڭعىرعان اۆتوماگيسترال ەلدىڭ وڭتۇستىگى مەن ورتالىعىن تىكەلەي بايلانىستىرىپ, سىر وڭىرىنە ينۆەستيتسيا تارتۋدىڭ اياسىن كەڭەيتەدى, تۋريستىك الەۋەتىن ارتتىرا تۇسەدى. وزبەكستان, قىرعىزستان مەن تاجىكستاننان رەسەيگە ساپارلاعان جۇك كولىكتەرىنە دە وسى باعىت ءتيىمدى. جۇك تاسىمالى كولەمىنىڭ ارتۋى وڭىردە كاسىپكەرلىكتىڭ ورىستەۋىنە سەپ بولادى.
جۋىردا وبلىسقا جاساعان ساپارىندا ۇكىمەت اپپاراتى باسشىسىنىڭ ءبىرىنشى ورىنباسارى عابيت سىزدىقبەكوۆ اۆتوجولدى قايتا جاڭعىرتۋ جۇمىستارىمەن تانىسىپ, قۇرىلىسقا قاجەتتى بيتۋم ساقتايتىن قويمالاردى ارالادى. بيتۋم دەمەكشى, شيكىزاتتىڭ وسى ءتۇرى قازىر نەگىزىنەن وزىمىزدەن, ءىشىنارا رەسەيدەن تاسىمالدانادى. قالعان ماتەريالدار جاڭاقورعان اۋدانىنان جەتكىزىلىپ جاتىر.
وبلىس اكىمى نۇرلىبەك نالىباەۆ جەرگىلىكتى اكىمدىك مەملەكەت باسشىسىنىڭ نازارىنداعى نىسان قۇرىلىسىنىڭ ۋاقتىلى ءارى ساپالى سالىنۋىنا بارىنشا ۇلەس قوساتىنىن ايتتى.
«جول اناسى – ءىز» دەيدى حالىق ناقىلى. ەل جىلدار بويى كۇتكەن جاڭالىق جۇزەگە اسقاندا, سىر مەن ارقا اراسى ايتارلىقتاي جاقىنداي تۇسەدى. كونە سوراپتىڭ ۇلىتاۋ جاعىنداعى بولىگى دە كوپ ۇزاماي جوندەلە باستايدى دەگەن جاڭالىق جۇرتتى قۋانتىپ تۇر.
جولدىڭ جايىن جاقسى بىلەتىن ماماندار كەلەشەكتە قىزىلوردا – بۇقارا باعىتىنداعى حالىقارالىق جول قۇرىلىسى ماسەلەسى دە وڭىنان شەشىلەتىنىنە سەنەدى. كەزىندە باستالعان ءىس كەڭەس وداعى تاراپ, اياقسىز قالىپ قويعان بولاتىن. ەگەر سول جىلدارى جوبا جۇزەگە اسىپ كەتكەندە قىزىلوردا بۇل كۇندەرى وزبەكستانمەن بايلانىسىن نىعايتىپ, كولىك-لوگيستيكالىق حاب قالىپتاستىرعان ءوڭىردىڭ ءبىرى اتانار ەدى.
دەگەنمەن دە يگىلىكتىڭ ەرتە-كەشى جوق. قىزىلقۇم قويناۋى ارقىلى بايلانىستىراتىن بۇل باعىتقا جول تۇسەتىن كۇن تۋار.
قىزىلوردا