قانداي سايلاۋ بولسىن ونىڭ ادىلەتتى ءوتۋى ماڭىزدى. قوعامدا سايلاۋدى تاۋەلسىز باقىلاۋدىڭ جاڭا فورماتىن ەنگىزۋ تۋرالى ءجيى ايتىلىپ ءجۇر. بۇل رەتتە ەلىمىزدە «داۋىس» قوعامدىق بايقاۋشىلار كواليتسياسى قۇرىلدى.
ارنايى ۇيىمداستىرىلعان بريفينگتە ءتۇرلى قوعامدىق ۇيىمداردىڭ وكىلدەرى «داۋىس» قوعامدىق بايقاۋشىلار كواليتسياسىنا بىرىگۋ تۋرالى مالىمدەدى. كواليتسيا سايلاۋ راسىمدەرىن قوعامدىق باقىلاۋ سالاسىنداعى جۇمىستىڭ اشىقتىق جانە دەموكراتيالىق قاعيدالارىنا نەگىزدەلگەن جاڭا فورماتسياداعى ينستيتۋتتى بىلدىرەدى. كواليتسيا قۇرامىنا ءار وڭىردەن بايقاۋشىلار, زاڭدى كونسالتينگ, مەديا مەنەدجمەنت جانە كاسىبي كويچينگ جۇمىستارىن جۇزەگە اسىرۋ سالاسىندا ۇلكەن تاجىريبەگە يە 160-تان استام ۇيىم كىردى. كواليتسيا جۇمىسىن ۇيىمداستىرۋ جەكە ەمەس, ۇجىمدىق جانە تەڭ قۇقىلى باسقارۋ قاعيداسى بويىنشا جۇزەگە اسىرىلاتىنى ۇلكەن ماڭىزعا يە.
ءىس-شارا بارىسىندا كواليتسيا ءماجىلىس جانە ءماسليحاتتار دەپۋتاتتارىنىڭ سايلاۋىنا قوعامدىق بايقاۋشىلار رەتىندە قاتىسۋ تۋرالى ءوز نيەتتەرىن مالىمدەدى. سونداي-اق بريفينگكە قاتىسۋشىلار كواليتسيانىڭ ءبىر رەتتىك باستاما ەمەس, جۇيەلى ۇيىم ەكەنىن, ونىڭ اياسىندا سايلاۋ راسىمدەرىن ادىستەمەلىك جانە قۇقىقتىق قامتاماسىز ەتۋ, تالدامالىق جانە اقپاراتتىق جۇمىستاردى ۇيىمداستىرۋ, سايلاۋ ۇدەرىستەرىنىڭ سالاسىندا ءبىلىم بازاسىن قالىپتاستىرۋ بويىنشا ءتۇرلى جوبالار جۇزەگە اسىرىلاتىنىن اتاپ ءوتتى.
كواليتسيانىڭ نەگىزگى قىزمەتى قوعامدا سايلاۋ مادەنيەتىن قالىپتاستىرۋعا, بەلسەندى, تالاپشىل ازاماتتىق كۇشتەردى تارتۋعا باعىتتالعان.