تابيعات اپاتىنان زارداپ شەككەن تۇرىك اعايىنعا وتانداستارىمىز بارىنشا قولداۋ كورسەتىپ جاتىر. قايىرىمدىلىق اكتسيالارى قولعا الىنىپ, قازاقستان جۇرتشىلىعى قارجىلاي كومەك جيناۋعا بەلسەندى كىرىسىپ كەتتى. راس, ءزىلزالادان قيىندىققا ۇشىراعان باۋىرلاس تۇرىك حالقىنىڭ باسىنا تۇسكەن اۋىر جاعداي ەشكىمدى بەيجاي قالدىرمادى. وسى سەبەپتەن ونەر سالاسىندا جۇرگەن بارشا ازاماتتاردى «قازاق ونەرىنىڭ تۇركياعا كومەگى» اكتسياسىنا ءبىر كىسىدەي اتسالىسۋعا شاقىرىپ, ۇندەۋ جاريالايمىن.
قادىرلى, تاتۋلىق پەن تۇراقتىلىقتىڭ تامىرى تەرەڭگە جايىلىپ, ىرىس پەن ىنتىماعى ارتقان قازاق جۇرتى!
ءبىز – ەجەلدەن بۇكىل تۇركى حالىقتارىنىڭ اتا جۇرتىمىز. باۋىرلاس ەلدەر ءبىزدىڭ جەرىمىزدەن ءارتۇرلى سەبەپتەرمەن كوشىپ, دۇنيە ءجۇزىنىڭ ءار تاراپىنا قونىس تەپتى. قازاق حالقى قارا شاڭىراقتا قالعاندىقتان, بۇكىل تۇركى حالىقتارىنىڭ تاعدىرىنا جاۋاپتى دەۋگە تولىق نەگىز بار.
مەن – قولىمنان كەلگەنشە ۇلت ونەرى الەمدىك دەڭگەيدە باعالانسىن دەگەن نيەتپەن ەڭبەكتەنىپ جۇرگەن قازاقتىڭ ءبىر بالاسىمىن. كاسىبىم دە, ءناسىبىم دە – سۋرەت سالۋ. «قايعىدان قان جۇتىپ وتىرعان تۇرىك حالقىنا قالاي قول ۇشىن سوزامىن؟» دەگەن وي كەلىپ, باعالى سۋرەتتەرىمدى اۋكتسيونعا قويۋدى ءجون دەپ تاپتىم. ودان تۇسكەن قاراجاتتى باۋىرلاس حالىققا اۋدارۋدى كوزدەپ وتىرمىز. بۇل رەتتە زەرگەر, سۋرەتشى, ءانشى, اكتەر, اقىن, جازۋشى سياقتى مادەنيەت جانە ونەر ايدىنىندا جۇرگەن بارشا ارىپتەستەرىمدى اكتسياعا بەلسەندى اتسالىسىپ, ۇندەۋدى قولداۋعا شاقىرامىن. ارينە, اۋكتسيون جۇمىسىن ۇيىمداستىرۋ وڭاي شارۋا ەمەس. بۇل ىسكە قالتالى كاسىپكەرلەردى تارتىپ, ناتيجە شىعارۋعا بولادى دەپ سەنەمىن. جينالعان قاراجات ارنايى اشىلعان قورعا ءتۇسىپ, زارداپ شەككەن تۇرىك اعايىنعا جىبەرىلەدى.
تۇركياعا مەملەكەتتىك دەڭگەيدە كومەك كورسەتىلىپ جاتقانى بەلگىلى. «كوپ تۇكىرسە – كول» دەمەكشى, از بولسا دا قولداۋ كورسەتۋ ماڭىزدى. مۇنداي ىزگى امالدار ارتىمىزدان ەرىپ كەلىپ جاتقان ۇرپاقتى تاربيەلەۋدىڭ ءبىر ۇلگىسى ەكەنىن ۇمىتپايىق.
ىزگى نيەتپەن,
سۋرەتشى ەربولات تولەپباي