اسكەري تاربيە مەن قۇقىقتىق ساۋاتتىلىققا باۋلۋدى بالا كەزدەن باستاعان ناتيجەلى بولماق. وسى باعىتتا الماتى وبلىسىنىڭ ۇيعىر اۋدانىندا «جاس شەكاراشىلار» مەن «جاس پوليتسەيلەر» اسكەري-پاتريوتتىق كلۋبتارى اشىلدى. كلۋب مۇشەسى رەتىندە 5 مەكتەپتىڭ 85 وقۋشىسى شونجى اۋىلىنىڭ مادەنيەت ۇيىندە انت قابىلدادى. سونداي-اق جاس پوليتسەيلەرگە ارنايى كۋالىكتەر تابىس ەتىلدى.
مۇنداعى «جاس شەكاراشىلار» مەن «جاس پوليتسەيلەر» كلۋبى مەكتەپتەردەگى ءوزىن-ءوزى باسقارۋ ۇيىمىنىڭ قۇقىق فراكتسياسىندا قىزمەت ەتەدى. ياعني ولار اۋدانداعى پوليتسيا بولىمشەلەرىنىڭ ماماندارىمەن جانە وقۋ وشاقتارىنداعى قۇقىق مەنەدجەرىمەن بايلانىس ورناتىپ, مەكتەپتەردەگى قۇقىق بۇزۋشىلىقتىڭ الدىن الماق. الماتى وبلىسىنداعى «جاس سارباز» اسكەري-پاتريوتتىق قوزعالىسىنىڭ توراعاسى ماديار شاراپوۆتىڭ ايتۋىنشا, ارنايى كۋالىككە يە بولعان بالالار ەندى كەز كەلگەن وقۋشىعا ءتارتىبى, ءجۇرىس-تۇرىسىنا سىن-ەسكەرتپە ايتا الادى. جانە ولار قۇقىق مەنەدجەرىنە ەسەپ بەرىپ, ەسكەرتۋ العاندارمەن ارنايى جينالىس وتكىزەدى. سونىمەن قاتار كلۋبقا قابىلدانعاندار مەكتەپ بىتىرگەنگە دەيىن ەلىمىزدىڭ اكىمشىلىك جانە قىلمىستىق قۇقىق بۇزۋشىلىق تۋرالى زاڭدارىن مەڭگەرىپ شىقپاق.
– جاس شەكاراشىلار تۋرالى ايتار بولساق, ولار اۋدانداعى اسكەري بولىمدەرگە بارىپ, ساربازداردىڭ تىنىس-تىرشىلىگىمەن تانىسىپ, ونى باسقالارعا ناسيحاتتاۋمەن اينالىسادى. جانە ولارعا اسكەريلەر قوسىمشا ساباق بەرىپ, شەكارا قىزمەتىنىڭ قىر-سىرىنان حاباردار ەتەدى. ولار 11-سىنىپتى تامامداعاننان كەيىن اسكەري بورىشىن وتەۋگە تاس-ءتۇيىن دايىن بولادى. قازىرگى تاڭدا كلۋبتاردىڭ ۇيىمداستىراتىن ءىس-شارالارىنىڭ جوباسى بەكىتىلىپ جاتىر, – دەيدى ماديار شاراپوۆ.
ال اۋداندىق ءبىلىم ءبولىمىنىڭ باسشىسى ءمولدىر قۇرماناليەۆا مۇنداي كلۋبتاردىڭ اشىلۋى ءبىلىم وشاقتارىنداعى تاربيە جۇمىسىن تىڭ وزگەرىستەرگە باستايتىنىنا سەنىمدى. اسكەري-پاتريوتتىق كلۋبتارعا الداعى ۋاقىتتا تاعى بىرنەشە مەكتەپ وقۋشىلارى مۇشەلىككە قابىلدانادى ەكەن.
– بۇل كلۋبتىڭ اشىلۋى – مەكتەپ جۇمىسىنا تىڭ وزگەرىس ەنگىزەتىنى ءسوزسىز. سەبەبى كەيدە ۇستازدىڭ مۇمكىندىگى شەكتەۋلى بولاتىن ساتتەر بولادى. مۇندايدا وزىندىك مىندەتتەمەسى, قىزمەتى بار كلۋب مۇشەلەرى كومەككە كەلەدى. ولار بارلىعىنا ۇلگى كورسەتىپ, مەكتەپتىڭ بەت-بەينەسىنە اينالۋعا ءتيىس. قارشادايىنان «قازاقستان رەسپۋبليكاسىنا قىزمەت ەتەمىن!» دەپ انت بەرگەن بالا جاۋاپكەرشىلىكتى سەزىنىپ وسەدى. بۇدان بولەك, ولار قوعام ومىرىنە ەرتە جاستان ارالاسادى. ءوزىن-ءوزى دامىتۋعا, مەكتەپتە ادەپ پەن ءتارتىپتى ساقتاۋعا قۇشتار وقۋشىدان ەل ەرتەڭىنە الاڭدايتىن ازاماتتار شىعاتىنىنا ءۇمىتىمىز مول, – دەيدى اۋداندىق ءبىلىم ءبولىمىنىڭ باسشىسى ءمولدىر قۇرماناليەۆا.