بۇگىنگىدەي اقپارات داۋىرىندە بارلىق دەرەك پەن مالىمەتكە قولجەتىمدىلىك ارتقانى ايرىقشا ارتىقشىلىق رەتىندە ايتىلادى. ول راس, بىراق ينتەرنەتتەگى دەرەكتەر ناقتى, شىندىققا نەگىزدەلگەن, عىلىمي دايەكتەلگەن اقپارات ەمەس. جاس ۇرپاق, بىلسەم-كورسەم دەگەن كەز كەلگەن ادام ءوز تالابىن ىزدەنىس ارقىلى ۇشتايدى. مۇندايدا عىلىمي-تانىمدىق باسىلىمداردىڭ ورنى ەرەكشە.
«قازمۇنايگاز» ۇلتتىق كومپانياسى اكتسيونەرلىك قوعامى وسى باعىتتاعى وڭ ءارى تىڭ باستامانى قولعا الدى. ۇلتتىق كومپانيا National Geographic Qazaqstan جۋرنالىمەن بىرلەسىپ, قىزىلوردا, اقتوبە جانە ماڭعىستاۋ وبلىستارىنىڭ 900-دەن اسا مەكتەبىنە قازاق تىلىندەگى وسى باسىلىمدى تەگىن جازدىرۋ جوباسىن باستادى. سونىمەن قاتار مەكتەپتەرگە جۋرنالدىڭ 2022 جىلعى مۇراعاتىن ساتىپ الىپ بەردى.
جۋرنال تۋرالى بىرەر دەرەك كەلتىرسەك, National Geographic – اقش-تىڭ ۇلتتىق گەوگرافيا قوعامىنىڭ رەسمي باسىلىمى, 135 جىلدان بەرى الەمنىڭ 80-نەن اسا ەلىندە جارىق كورىپ كەلەدى. جەر جاھاندا ميلليونداعان وقىرمانى بار, ءوز برەندىن قالىپتاستىرعان. ونىڭ جۋرنال, تەلەارنا, كىتاپ, الەۋمەتتىك جەلىدەگى جالپى اۋديتورياسى 900 ميلليوننان اسادى.
National Geographic جۋرنالىنىڭ مۇقاباسىنداعى ءتۇرلى-ءتۇستى, بوياۋى قانىق, تاڭعاجايىپ فوتوسۋرەتتەرى بىردەن كوزگە تۇسەدى, تانىمدىق ماقالالارى الەمنىڭ ءار قيىرىنا جەتەلەيدى. اسىرەسە جاراتىلىس سىرىن قازبالايتىن, ادامزات بالاسىنىڭ وركەنيەتكە جەتۋ جولىنداعى تالپىنىستارىن تەرەڭ تالدايتىن ماتەريالداردىڭ ورنى بولەك.
ساياساتتان تىس جازبالار, تاريح پەن قازىرگى ۋاقىتتى, تۇمسا تابيعات پەن ەكولوگيا زارداپتارىن زەردەلەگەن, گەوگرافيا, ارحەولوگيا, تاريح, بيولوگيا, استرونوميا جانە ت. ب. كوپتەگەن عىلىم سالاسىن كەڭىنەن قامتىعان ماقالالار وقىرمانىنا وي سالادى. ساپالى ءارى مازمۇندى جۋرنال شىعارۋ ىسىنە الەمنىڭ تۇكپىر-تۇكپىرىنەن ءۇش مىڭنان اسا زەرتتەۋشى اتسالىسادى. ولار – ءوز زەرتتەۋ نىسانىن تەرەڭ بىلەتىن, سوعان بار ۋاقىتىن, زەيىنىن, ءتىپتى عۇمىرىن ارناعان جاندار. اتىنا قاراپ باسىلىم تەك گەوگرافيا ماسەلەلەرىنە باسىمدىق بەرەدى دەپ ويلاۋ – قاتە. وندا بيولوگيا, انتروپولوگيا, عارىش جانە مەديتسينا تاقىرىپتارى دا كەڭىنەن قامتىلادى.
National Geographic Qazaqstan 2016 جىلدىڭ اقپان ايىنان بەرى قازاق تىلىندە جارىق كورەدى. ءبىزدىڭ انا ءتىلىمىزدى قوسقاندا الەمگە ايگىلى باسىلىم 38 تىلدە شىعىپ كەلەدى. جۋرنالدىڭ ءوز تىلىندەگى نۇسقاسىن شىعارۋدى بۇرىنعى كەڭەس وداعى ەلدەرىنەن گرۋزيا, ورتالىق ازيا مەملەكەتتەرىنىڭ اراسىندا قازاقستان عانا قولعا العان, بۇگىندە قازاقشاسىنىڭ تارالىمى – 7 500 دانا. جاريالانعان ايعاقتار مەن جاڭالىقتار, زەرتتەۋلەر مەن كوز تارتار كورىنىستەر, «كۇننىڭ ۇزدىك سۋرەتىندەگى» فوتو, ساياحات پەن تابيعات تۋرالى ماقالالاردان اركىم ءوز كەرەگىن تابادى.
كەشە قىزىلوردا قالاسىنىڭ ت.ەسەتوۆ اتىنداعى №264 مەكتەپ-ليتسەيىندە «قازمۇنايگاز» ۇك اق باسقارما توراعاسى ماعزۇم مىرزاعاليەۆ, قىزىلوردا وبلىسى اكىمىنىڭ ورىنباسارى نۇرىمبەت ساقتاعانوۆ, National Geographic Qazaqstan باس رەداكتورى ەركىن جاقىپوۆ, قالا مەكتەپتەرىندەگى گەوگرافيا ءپانى مۇعالىمدەرى, مەكتەپ ديرەكتورلارىنىڭ عىلىمي-ادىستەمەلىك ماسەلەلەر جونىندەگى ورىنباسارلارى, ورتا جانە جوعارى سىنىپ وقۋشىلارى قاتىسقان ءىس-شارا ءوتتى.
ەلىمىزدە مەملەكەت باسشىسىنىڭ تاپسىرماسىمەن «وقۋعا قۇشتار مەكتەپ» جوباسى ىسكە اسىپ جاتىر. جوبانى قولداۋ قادامىن «قازمۇنايگاز» ۇك اق قىزىلوردا وبلىسىنان باستادى. كومپانيا سىر ءوڭىرىنىڭ 300-دەن اسا مەكتەبىنە جۋرنالدىڭ ءبىر جىلدىق تەگىن جازىلىمىن ۇيىمداستىرىپ, مەكتەپ كىتاپحانالارىندا وتكەن جىلعى جانە الداعى جارىق كورەتىن نومىرلەردى وقۋعا مۇمكىندىك جاسادى.
م.مىرزاعاليەۆ National Geographic Qazaqstan جۋرنالىمەن بىرلەسكەن جوبانىڭ اشىلۋ سالتاناتىندا بۇل مەملەكەت باسشىسى قاسىم-جومارت توقاەۆتىڭ زياتكەر ۇلت قالىپتاستىرۋ جونىندەگى تاپسىرماسىنا تولىق ساي كەلەتىنىن ايتتى.
– بۇل جولداعى ماڭىزدى قادام جاراتىلىستانۋ-عىلىمي, تەحنيكالىق باعىتتاعى جۋرنالداردى وقۋ مادەنيەتىن قايتا جانداندىرۋ ەكەنىنە سەنىمدىمىز. تاڭداۋدىڭ National Geographic جۋرنالىنا تۇسكەنى كەزدەيسوق ەمەس. رەداكتسيانىڭ ەكولوگيا ماسەلەلەرىنە ءتيىستى كوڭىل ءبولىپ, وقىرماننىڭ سانا-سەزىمىنە اسەر ەتۋگە تىرىساتىنى وتە ماڭىزدى. قورشاعان ورتانىڭ قاۋىپسىزدىگى – ءبىزدىڭ كومپانيا ءۇشىن دە ماڭىزدى قۇندىلىقتاردىڭ ءبىرى. سونىمەن قاتار ءبىز ءۇشىن اۋىل مەكتەپتەرىنىڭ جۋرنالعا جازىلۋىن ۇيىمداستىرۋ اسا ماڭىزدى. اۋىل مەن قالا اراسىنداعى اقپاراتتىق جانە ءبىلىم بەرۋدەگى تەڭسىزدىكتى جويۋ مەملەكەت پەن بيزنەس الدىنداعى ورتاق مىندەت دەپ سانايمىز. بۇل جوبا «قازمۇنايگازدىڭ» الەۋمەتتىك جاۋاپكەرشىلىك بولىگىندە كورپوراتيۆتىك ساياساتىنىڭ ءبىر بولىگى ەكەنىن ايتا كەتكەن ءجون, – دەدى باسقارما توراعاسى.
كومپانيا قىزمەتكەرلەرىنىڭ ەڭبەك جاعدايى مەن تۇرمىسىن جاقسارتۋعا باسا نازار اۋداراتىنى بەلگىلى. وعان قوسا مەديتسينالىق ورتالىقتار, سپورت كەشەندەرىنىڭ قۇرىلىسىن قارجىلاندىرۋدا, دارىندى جاستارعا داڭعىل جول اشۋعا نەگىزدەلگەن ءىرى جوبالاردى جۇزەگە اسىرىپ كەلەدى. بۇگىنگىدەي باستاما تسيفرلىق تەحنولوگيالار ادامزاتتىڭ اقپارات تۇتىنۋ ادەتتەرىن تۇبەگەيلى وزگەرتكەن كەزەڭدە جاس ۇرپاقتىڭ, ۇستازداردىڭ گازەت-جۋرنالداردى وقۋ مادەنيەتىنە قايتا ورالۋى ءۇشىن وتە كەرەك.
– National Geographic Qazaqstan جۋرنالىنىڭ باسشىلىعى مەن رەداكتسياسىنا ىنتىماقتاستىق ءۇشىن, سونداي-اق ونىڭ جاراتىلىستانۋ عىلىمدارىن ناسيحاتتاۋعا جانە مەملەكەتتىك تىلدەگى ساپالى كونتەنتتى دامىتۋعا قوسىپ جۇرگەن ۇلەسى ءۇشىن العىس ايتقىم كەلەدى. ال بۇگىنگى جيىننىڭ باستى كەيىپكەرلەرى – وقۋشىلارعا پايدالى ءىلىم مەن جارقىن جاڭالىقتار تىلەيمىن! وقۋدا وزات بولىپ, وسىنداي جۋرنالداردى كوپ وقىپ, ۇلگىلى ءتارتىپ پەن ءوزىن ءوزى دامىتۋ ارقىلى وسىندا وتىرعان كوپشىلىگىڭىز بولاشاقتا عالىم-زەرتتەۋشى, ساياحاتشى مەن گەولوگ, ەكولوگ پەن ينجەنەر بولا الاتىندارىڭىزعا سەنىمدىمىن, – دەدى م.مىرزاعاليەۆ.
سالتاناتتى ءراسىم كەزىندە قىزىلوردا وبلىسى بويىنشا جازىلۋ سەرتيفيكاتى جاراتىلىستانۋ-عىلىمي پاندەر بويىنشا وليمپيادالاردىڭ قاتىسۋشىسى ءارى جۇلدەگەرى, №264 مەكتەپتىڭ 9-سىنىپ وقۋشىسى سانجار سۇلتانبەككە تابىستالدى. سونىمەن قاتار قالا مەكتەپتەرىنىڭ شاكىرتتەرى جەتىستىككە جەتكەن گەوگرافيا ءپانى مۇعالىمدەرى العىس حاتپەن ماراپاتتالدى.
جۋرنالدىڭ باس رەداكتورى ەركىن جاقىپوۆتىڭ ايتۋىنشا, ۇستازدار مەن وقۋشىلار ءۇشىن قازاق تىلىندەگى عىلىمي كونتەنتكە قولجەتىمدىلىكتىڭ ماڭىزى زور. مەكتەپتەگى وقۋ باعدارلامالارىنىڭ تاقىرىپتارىنا قوسىمشا كومەك بولاتىن قۇرالدار – ارينە, عىلىمي جۋرنالدار. باسىلىم الەمنىڭ 80 ەلىندەگى 3 مىڭداي زەرتتەۋشىنىڭ ەڭبەگىن وقىرمانىنا ۇسىنىپ كەلەدى.
– ۇستازدار قاۋىمى National Geographic Qazaqstan جۋرنالىن گەوگرافيا, بيولوگيا, جاراتىلىستانۋ پاندەرىندە كۇندەلىكتى قوسىمشا قۇرال رەتىندە قىزىقتى, تارتىمدى ساباق وتكىزۋ ءۇشىن قولدانا الادى. سونداي-اق وقۋشىلاردىڭ فۋنكتسيونالدىق ساۋاتتىلىعىن, زەرتتەۋشىلىك وي-قابىلەتىن دامىتۋعا سەپتىگىن تيگىزەدى. ءارتۇرلى عىلىمي-تانىمدىق جوبالارعا, جارىستارعا وسى تاقىرىپتاردى ارقاۋ ەتىپ الۋىنا بولادى. بۇل جاس ىزدەنۋشىلەردىڭ عىلىمعا, زەرتتەۋگە دەگەن قۇلشىنىسىن وياتادى, – دەدى باس رەداكتور.
ۇستازدار ءۇشىن مەكتەپ باعدارلاماسىنان تىس قوسىمشا ادەبيەتتەر مەن رەسۋرستارعا قولجەتىمدىلىك وتە ماڭىزدى. سوندىقتان وسى ءىس-شاراعا قاتىسقان گەوگرافيا ءپانى مۇعالىمدەرىنىڭ دە پىكىرىن بىلدىك. №264 مەكتەپتىڭ گەوگرافيا ءپانى مۇعالىمى شولپان نۇرماحانوۆانىڭ ايتۋىنشا, وقۋشىلاردى عىلىمي جوبالار جازۋعا باۋلۋ, وليمپيادالارعا دايىنداۋعا وسىنداي ساپالى ماتەريالدار اسا قاجەت. بۇل تالاپكەردى ىزدەنۋگە ىنتالاندىرادى, وي-تانىمىن بايىتادى.
ءىس-شارا سوڭىندا National Geographic وكىلى جەرگىلىكتى مەكتەپتەردىڭ مۇعالىمدەرىنە باسىلىمنىڭ ونلاين جانە وففلاين رەسۋرستارىن قولدانۋ بويىنشا ترەنينگ وتكىزدى. مۇعالىمدەر ۇسىنىلىپ وتىرعان مول ماتەريالدى كۇندەلىكتى جۇمىس بارىسىندا پايدالانۋعا مۇمكىندىك تۋعانىنا ريزاشىلىق ءبىلدىردى.