ەلىمىزدىڭ عىلىم جانە جوعارى ءبىلىم مينيسترلىگى, Heriot-Watt ۋنيۆەرسيتەتى جانە ق.جۇبانوۆ اتىنداعى اقتوبە وڭىرلىك ۋنيۆەرسيتەتى اراسىندا ىنتىماقتاستىق تۋرالى ۇشجاقتى مەموراندۋمعا قول قويىلدى. مينيستر ساياسات نۇربەكتىڭ ۇلىبريتانياعا جاساعان ساپارى بارىسىندا بەكىتىلگەن قۇجاتتىڭ بەرەكەسىن كورەر كۇن دە الىس ەمەس.
ۆەدومستۆونىڭ ءباسپاسوز قىزمەتى حابارلاعانداي, ەدينبۋرگ قالاسىندا وتكەن كەزدەسۋدە تاراپتار مەموراندۋم اياسىندا جۇزەگە اساتىن قادامداردى ناقتىلاپ, بىرلەسە اتقاراتىن جۇمىستار بويىنشا جوسپار جاساپتى. وسى ورايدا, باستاما مەملەكەت باسشىسى قاسىم-جومارت توقاەۆتىڭ جوعارى ءبىلىم بەرۋ جۇيەسىن ەكونوميكانىڭ سۇرانىستارىنا ساي قايتا فورماتتاۋ جونىندەگى تاپسىرماسىن ورىنداۋ شەڭبەرىندە, ونىڭ ىشىندە جەتەكشى شەتەلدىك جوعارى وقۋ ورىندارىنىڭ فيليالدارىن اشۋ جولىمەن جۇزەگە اسپاق.
وسىدان ەكى اي بۇرىن ۇلىبريتانياداعى Heriot-Watt ۋنيۆەرسيتەتىنىڭ رەكتورى مارك بيگگس اقتوبەگە ارنايى كەلىپ, وبلىس جانە ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ باسشىلىعىمەن كەزدەسكەن بولاتىن. اقتوبە وبلىسى اكىمدىگىنىڭ قولداۋىمەن Heriot-Watt ۋنيۆەرسيتەتى ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ بازاسىندا ءۇش («مۇناي-گاز ءىسى», «ەلەكترەنەرگەتيكا», «كومپيۋتەرلىك ينجەنەريا») باكالاۆريات دەڭگەيىندەگى ءبىلىم بەرۋ باعدارلاماسىن اشادى. بۇل ماماندىقتار ءوڭىردىڭ سۇرانىسىنا قاراي تاڭدالىپ وتىر.
جوعارى وقۋ ورىندارىنىڭ اراسىنداعى سەرىكتەستىك وتاندىق تەحنيكالىق جانە IT-مامانداردى بىرلەسە دايىنداۋعا باعىتتالعان. وقۋدى اياقتاعان ستۋدەنتتەرگە Heriot-Watt ۋنيۆەرسيتەتى مەن ق.جۇبانوۆ اتىنداعى اقتوبە ۋنيۆەرسيتەتىنىڭ قوس ديپلومى بەرىلەدى. بۇل ماماندىقتار ۇلىبريتانيالىق ستاندارت بويىنشا وقىتىلىپ, ساپانى Heriot-Watt ۋنيۆەرسيتەتى باقىلايدى.
تالاپكەرلەردى قابىلداۋ كەلەسى وقۋ جىلىندا باستالادى. الداعى ۋاقىتتا جوعارى وقۋ ورىندارى اراسىنداعى اكادەميالىق ۇتقىرلىق باعدارلامالارى قارقىندى داميتىن بولادى.