ارقالىق قالاسىندا بەسىنشى قاباتتان قۇلاپ بارا جاتقان قىزدى قۇتقارىپ قالعان پاترۋلدىك پوليتسيا قىزمەتكەرىنە پاتەر بەرىلدى.
ەستەرىڭىزگە سالا كەتسەك, توسىن جاعداي وسى جىلدىڭ 7 قاڭتارىندا ارقالىق قالاسىندا بولعان ەدى. سول كۇنى تاڭعى ساعات 05:30-دا قالالىق پوليتسيا باسقارماسىنىڭ جەدەل باسقارۋ ورتالىعىنا قىزدىڭ بەسىنشى قاباتتان قۇلاپ بارا جاتىپ, بالكوننىڭ تەمىر قورشاۋىنان ۇستاپ قالعانى تۋرالى سۋىت حابار كەلىپ تۇسەدى.
وقيعا ورنىنا پاترۋلدىك پوليتسيا قىزمەتكەرلەرى المات ءامىرحان مەن رۋسلان قاپساماتوۆ شۇعىل جەتەدى. المات ءامىرحان سىرتتا قالىپ, ارىپتەسى دەرەۋ بەسىنشى قاباتقا قاراي جۇگىرە جونەلەدى.
الايدا قىز ءدال وسى ساتتە جەرگە قاراي قۇلديلاي جونەلگەن. تومەندە تۇرعان المات ءامىرحان قۇلاپ كەلە جاتقان قىزدى قاعىپ الادى.
– پوليتسيا قىزمەتكەرلەرى وڭىردەگى قوعامدىق ءتارتىپتى قامتاماسىز ەتەدى جانە كۇندەلىكتى جۇمىستا قيىن جاعدايلارعا تاپ بولادى. كەيدە ادام ءومىرىن قۇتقارىپ قالىپ جاتادى. قىزمەتتە ءجۇرىپ وسىنداي ەرلىككە بارعانى ءۇشىن المات ءامىرحاندى قىزمەتتىك تۇرعىن ۇيمەن قامتاماسىز ەتۋ تۋرالى شەشىم قابىلداندى, – دەدى ارقالىق قالاسىنىڭ اكىمى.
قىزدى قۇتقارماق بولىپ اياعىنان جاراقات العان المات ءامىرحان ءالى ەمدەلىپ جاتىر. پوليتسيا اعا لەيتەنانتى بۇعان دەيىن تۋىستارىمەن بىرگە تۇرىپ كەلگەن.