قازاقستاننىڭ دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ كۋبا رەسپۋبليكاسىنىڭ قازاقستانداعى ەلشىسى وسكار سانتانا لەون مىرزامەن كەزدەستى.
ءبىرىنشى ۆيتسە-مينيستر كۋبالىق ديپلوماتتى قۇتتىقتاپ, ەلدەرىمىزدىڭ اراسىنداعى ىنتىماقتاستىقتى نىعايتۋعا قىزىعۋشىلىق تانىتقانى ءۇشىن ريزاشىلىعىن ءبىلدىردى. ول 2025 جىلعا دەيىن «دەنى ساۋ ۇلت» ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسىن ىسكە اسىرۋدى قوسا العاندا, قازاقستاندىق دەنساۋلىق ساقتاۋدى دامىتۋدىڭ باسىم باعىتتارى تۋرالى ايتىپ بەردى.
سونىمەن قاتار ت.سۇلتانعازيەۆ وتكەن جىلدىڭ قاراشا ايىندا حالىققا مەديتسينالىق كومەكتىڭ ۋاقتىلى كورسەتىلۋىن, قولجەتىمدىلىگىن, ساپاسى مەن ساباقتاستىعىن قامتاماسىز ەتۋگە ارنالعان بىرىڭعاي الەۋمەتتىك باعدارلانعان جۇيەنى قالىپتاستىرۋ ماقساتىندا قازاقستاننىڭ دەنساۋلىق ساقتاۋ سالاسىن دامىتۋدىڭ 2026 جىلعا دەيىنگى تۇجىرىمداماسى بەكىتىلگەنىن اتاپ ءوتتى.
ءوز كەزەگىندە كۋبا ەلشىسى ەلىنىڭ جەتكىلىكتى كادرلىق الەۋەتىن اتاپ ءوتىپ, دەنساۋلىق ساقتاۋ سالاسىنداعى ءوزارا ىنتىماقتاستىقتى دامىتۋدىڭ ماڭىزدىلىعىنا توقتالدى.
«كۋبا رەسپۋبليكاسىندا 497 مىڭ مەديتسينا قىزمەتكەرى نەمەسە ارال مەملەكەتىنىڭ ەڭبەككە قابىلەتتى حالقىنىڭ 6,8%-ى بار. مەديتسينا قىزمەتكەرلەرىنىڭ سانى بويىنشا كۋبا الەمدە ءبىرىنشى ورىندا, مۇندا 10 مىڭ تۇرعىنعا 92 دارىگەر كەلەدى. كۋبالىقتاردىڭ ورتاشا ءومىر ءسۇرۋ ۇزاقتىعى 78 جاسقا جەتتى جانە وسى كورسەتكىش بويىنشا كۋبا رەسپۋبليكاسى – الەمدە 39-ورىندا», دەدى وسكار سانتانا لەون مىرزا.
ونىڭ ايتۋىنشا, كۋبالىق دارىگەرلەر دامۋشى ەلدەردە عانا ەمەس, يتاليادا, قاتاردا جانە باسقالارىندا ارىپتەستىك كەلىسىمدەردىڭ نەگىزىندە ونداعان مەملەكەتتىڭ دەنساۋلىق ساقتاۋ جۇيەلەرىندە جۇمىس ىستەيدى جانە كومەكتەسەدى.
كەزدەسۋ بارىسىندا تاراپتار قازاقستاندا كۋبالىق دارىلىك پرەپاراتتاردى تىركەۋ, كۋبانىڭ مەديتسينالىق مەكەمەلەرىندە قازاقستاندىق ازاماتتاردى ەمدەۋ, كۋبانىڭ مەديتسينا ۋنيۆەرسيتەتتەرىندە قازاقستاندىق ستۋدەنتتەردى وقىتۋ, سونداي-اق قوعامدىق دەنساۋلىق ساقتاۋعا بايلانىستى بىرلەسكەن عىلىمي ءىس-شارالارعا قاتىسۋ ماسەلەلەرىن تالقىلادى.
كۋبالىق تاراپ بىرقاتار باعىت بويىنشا قازاقستاننىڭ دەنساۋلىق ساقتاۋ مينيسترلىگىمەن ودان ءارى جەمىستى ىنتىماقتاستىقتى جالعاۋعا دايىن ەكەنىن ءبىلدىردى.