قازاقستان پارلامەنتى ءماجىلىسى توراعاسىنىڭ ورىنباسارى د. نازارباەۆا حالىقتى باسپانامەن قامتاماسىز ەتۋدە ناقتى قادامداردىڭ جاسالماي وتىرعانىن سىنعا الدى.
«نۇر وتان» پارتياسىنىڭ ورتالىق اپپاراتىندا وتكەن «حالىقتى باسپانامەن قامتاماسىز ەتۋدىڭ جاي-كۇيى مەن پەرسپەكتيۆالارى» پارلامەنتتىك تىڭداۋدىڭ ۇسىنىستارىن جۇزەگە اسىرۋ بارىسى تۋرالى» دوڭگەلەك ۇستەل وتىرىسىنا قاتىسقان داريعا نازارباەۆا تىڭداۋدىڭ وتكەنىنە ءبىر جارىم جىل بولسا دا, وندا ايتىلعان ۇسىنىستاردىڭ قاعاز جۇزىندە قالعانىن اتاپ ايتتى.
«دەپۋتاتتار كوكتەن الىپ, جاڭا دۇنيە ويلاپ تاپقان جوق. ماسەلە «قولجەتىمدى باسپانا-2020» باعدارلاماسىنىڭ جەكەلەگەن ناقتى جوسپارىن قۇرۋ تۋرالى بولاتىن», دەي كەلىپ, ءماجىلىس توراعاسىنىڭ ورىنباسارى تۇرعىن ۇيمەن قامتۋدىڭ قازىرگى جاي-كۇيىنە توقتالدى.
«بيىلعى 1 قاڭتار دەرەكتەرى بويىنشا مەملەكەتتىك تۇرعىن ءۇي قورىنان بەرىلەتىن باسپانا كەزەگىندە 283 109 ادام تۇر. ول ءۇشىن مەملەكەتتىڭ جىلىنا 6 مىڭ پاتەر سالۋ جوسپارىنا سۇيەنسەك, كەزەكتەگى ەڭ سوڭعى ادام شامامەن 44-45 جىلدان كەيىن باسپانالى بولادى دەگەن ءسوز. بۇل – بۇگىنگى كۇننىڭ شىنايى كورىنىسى. ارينە, مەملەكەتتىك قازىنانىڭ مۇمكىنشىلىگى شەكتەۋلى ەكەنىن, بەلگىلى ءبىر پروبلەمالاردىڭ بار ەكەنىن ءبىز جاقسى بىلەمىز. دەي تۇرعانمەن, ءبىز بۇل ماسەلەنى شەشۋدىڭ ايتارلىقتاي قاراپايىم جانە اقىلعا قونىمدى تاسىلدەرىن ۇسىنىپ وتىرمىز. ياعني, تۇرمىسى ناشار وتباسىلارىنا ارنالعان ءۇشىنشى-ءتورتىنشى دەڭگەيدەگى قىمبات ەمەس باسپانالار, شاعىن وتباسىلىق جاتاقحانالار سالىپ, سول ءۇشىن تيپتىك جوبالار جاساۋ قاجەت ەدى عوي», دەدى د.نازارباەۆا.
حالىق قالاۋلىسىنىڭ اتاپ وتكەنىندەي, مەملەكەت جالعا بەرەتىن پاتەرلەر جەكەشەلەندىرۋگە جاتپايدى. دەگەنمەن, ول مۇلدەم باسپاناسى جوق جاندار مەن جاس وتباسىلاردىڭ الەۋمەتتىك جاعدايىن شەشۋگە بارىنشا كومەكتەسەدى. بۇگىندە تەك ءتورت وبلىس پەن استانا جانە الماتى قالالارى شاعىن وتباسىلىق تيپتەگى باسپانا سالۋ جوسپارىن ازىرلەۋدە. باسقا وبلىستار بويىنشا ەشقانداي اقپارات جوق.
ۆيتسە-سپيكەر مەملەكەتتىك تۇرعىن ءۇي قورىنان پاتەر بولۋدە ادىلەتسىزدىكتىڭ ورىن الاتىنىن دا جوققا شىعارمادى. د.نازارباەۆا: «پاتەرلەردى ءبولۋ جۇيەسى اشىق ەمەس. سول ءۇشىن ءبىز قۇرامىنا ءماجىلىس پەن ءماسليحات دەپۋتاتتارى, ساراپشىلار, جەرگىلىكتى ۇەۇ مۇشەلەرى كىرەتىن رەسپۋبليكالىق كوميسسيا قۇرۋدى ۇسىندىق. ول كوميسسيا دا ءالى جوق», دەدى. ودان ءارى د.نازارباەۆا تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى اياسىندا كوپ پاتەرلى ۇيلەردى جوندەۋ ءتوڭىرەگىندەگى وزەكتى ماسەلەلەرگە دە باسا كوڭىل ءبولدى.
تاقىرىپ توڭىرەگىندە وڭىرلىك دامۋ ءمينيسترى بولات جامىشەۆ بايانداما جاساپ, اتقارىلعان جۇمىستاردى تىلگە تيەك ەتتى. سونداي-اق, استانا, الماتى قالالارى اكىمدەرىنىڭ ورىنباسارلارى, قۇرىلىس كومپانيالارىنىڭ باسشىلارى ءسوز الدى.
دوڭگەلەك ۇستەل جۇمىسىنا «ونلاين» رەجىمىندە بەينەكونفەرەنتسيا بايلانىسى ارقىلى جەرگىلىكتى اتقارۋشى ورگان وكىلدەرى دە قاتىستى.
د.نازارباەۆا دوڭگەلەك ءۇستەل جۇمىسىن قورىتىندىلاپ, ونىڭ ناتيجەلەرى بويىنشا ارنايى قارار قابىلداندى.