ەلباسى نۇرسۇلتان نازارباەۆ «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ب.بايبەك كەزدەسۋ بارىسىندا مەملەكەت باسشىسى – پارتيا ءتوراعاسى نۇرسۇلتان نازارباەۆقا 2014 جىلدىڭ ءبىرىنشى جارتىجىلدىعىنداعى جۇمىستىڭ جانە «2050» ستراتەگياسىن ءتۇسىندىرۋ مەن جۇزەگە اسىرۋ جۇمىستارىنىڭ ناتيجەلەرى تۋرالى باياندادى.
مەملەكەت باسشىسى «نۇر وتان» پارتياسى ەلىمىزدەگى نەگىزگى قوعامدىق كۇش ەكەنىنە, ونىڭ جۇمىسىنىڭ ءبىر باعىتى مەملەكەتتىك ساياساتتى ءتۇسىندىرۋ بولىپ تابىلاتىنىنا توقتالدى.
– وڭىرلەردە جۇمىس ىستەيتىن پارتيالىقتار جۇرگىزىلىپ جاتقان جۇمىستى حالىققا جەتكىزۋى, سونداي-اق, جەرگىلىكتى اتقارۋشى ورگانداردىڭ مەملەكەتتىك باعدارلامالاردى جۇزەگە اسىرۋ بارىسىن باقىلاۋى ءتيىس. پارتيا بەدەلى وتە جوعارى دەڭگەيدە ساقتالىپ, ابىرويى مۇنتازداي بولۋى ءتيىس, – دەدى قازاقستان پرەزيدەنتى.
نۇرسۇلتان نازارباەۆ مەملەكەتتىك باعدارلامالاردى, ءاسىرەسە, يندۋستريالىق-يننوۆاتسيالىق دامۋ باعدارلاماسىن ءتيىمدى ءجۇزەگە اسىرۋدىڭ ماڭىزدىلىعىن اتاپ ءوتتى.
– شەتەل ينۆەستورلارى كەڭەسىنىڭ وتكەن وتىرىسى كاسىپكەرلىكتىڭ مۇددەلىلىگى جوعارى ەكەنىن كورسەتتى. مەن ەلدەگى بيزنەس احۋالدى جەتىلدىرۋ جونىندەگى جاڭا مىندەتتەردى جاريالادىم. بارلىق جەردە شاعىن جانە ورتا بيزنەستى قولداپ, تۇرعىنداردىڭ بيزنەس-جوبالار ازىرلەۋىنە, نەسيەلەۋ كوزدەرىن تاۋىپ, سالىقتىق جانە باسقا دا پرەفەرەنتسيالار تۋرالى بىلۋىنە كومەكتەسۋ كەرەك. شاعىن جانە ورتا كاسىپورىنداردى دامىتۋ كوپتەگەن جۇمىس ورىندارىن قامتاماسىز ەتەدى, پارتيانىڭ وسى ماسەلەنى ءوز قولىنا العانى ءجون, – دەدى مەملەكەت باسشىسى.
«نۇر وتان» پارتياسى ءتوراعاسىنىڭ ءبىرىنشى ورىنباسارى ءوز كەزەگىندە تۇرعىندارمەن كەرى بايلانىستى قامتاماسىز ەتۋ جۇمىستارى جولعا قويىلعانى تۋرالى مالىمدەدى.
– وتكەن جىلدىڭ قورىتىندىسى بويىنشا پارتيانىڭ قوعامدىق قابىلداۋىنا 800 مىڭ ادام كەلدى. 39 مىڭ ارىز مەملەكەتتىك ورگانداردىڭ قاراۋىنا جولداندى. پارتيالىق باقىلاۋ مەن ورتالىق جانە جەرگىلىكتى اتقارۋشى ورگاندارمەن ءىس-قيمىلدى كۇشەيتۋ جۇمىستارى جۇرگىزىلدى. سونىمەن بىرگە, ءسىزدىڭ تاپسىرماڭىزعا سايكەس, مۇمكىندىگى شەكتەۋلى ازاماتتارمەن جۇمىس جۇرگىزىلۋدە. سوڭعى التى ايدا وسى ساناتتاعى 4000 ادام جۇمىسقا ورنالاستىرىلدى, – دەدى ب.بايبەك.
بۇدان بولەك, «نۇر وتان» پارتياسى توراعاسىنىڭ ءبىرىنشى ورىنباسارى ۇكىمەت قىزمەتىنىڭ ءناتيجەلەرىن ءتۇسىندىرۋ, «قازاقستان-2050» ستراتەگياسىن, سونداي-اق, ەۋرازيالىق ەكونوميكالىق ينتەگراتسيانى جۇزەگە اسىرۋ اياسىنداعى جۇمىس جونىندە حابارلادى.
كەزدەسۋ قورىتىندىسى بويىنشا مەملەكەت باسشىسى, پارتيا توراعاسى «قازاقستان-2050» ستراتەگياسىن جۇزەگە اسىرۋ, حالىقپەن تىكەلەي ءوزارا ءىس-قيمىل اياسىن كەڭەيتۋ, پارتيانىڭ ءوزىن ءوزى جان-جاقتى قامتاماسىز ەتۋى جانە ونىڭ الدىنا قويىلعان وزگە دە مىندەتتەردى ورىنداۋى ءجونىندەگى جۇمىستى ودان ءارى كۇشەيتۋگە قاتىستى بىرقاتار ناقتى تاپسىرمالار بەردى.
سۋرەتتەردى تۇسىرگەندەر
س.بوندارەنكو, ب.وتارباەۆ.