تۇركىستان وبلىسىندا مەملەكەت باسشىسىنىڭ سايلاۋالدى باعدارلاماسىنىڭ ىسكە اسىرىلۋ بارىسى «قازاقستان ءماسليحاتتارى دەپۋتاتتارى بىرلەستىگى» رەسپۋبليكالىق قوعامدىق بىرلەستىگى مەن وبلىستىق ءماسليحاتى دەپۋتاتتارىنىڭ بىرلەسكەن وتىرىسىندا تالقىلاندى.
جيىندا رەسپۋبليكالىق قوعامدىق بىرلەستىك توراعاسى تولەۋبەك مۇقاشەۆ مەملەكەت باسشىسىنىڭ ءماسليحاتتار الدىنا قويعان «جاڭا قازاقستاننىڭ قۇرىلىسى», جەرگىلىكتى حالىقتىڭ ءومىر ءسۇرۋ جاعدايى مەن ساپاسىن جاقسارتۋ جونىندەگى جاڭا مىندەتتەمەلەرى دەپۋتاتتاردىڭ سايلاۋشىلارمەن اراداعى جۇمىسىن قايتا قۇرۋ مەن سايلاۋشىلار ءتارتىبى جانە ءماسليحاتشىلاردى كەرى شاقىرىپ الۋ ينستيتۋتتارىن ەنگىزۋدى ىسكە اسىراتىنىن اتاپ ءوتتى.
– جاڭا جاعدايدا ءماسليحاتتار مەن ولاردىڭ دەپۋتاتتارىنىڭ نەگىزگى قىزمەتى – ءوز اۋماعىندا ساپالى الەۋمەتتىك ينفراقۇرىلىمدى: بالاباقشالاردى, اباتتاندىرۋدى, ساۋدا نىساندارىن, جولداردى, كىتاپحانالاردى, مەكتەپتەردى, تۇرعىن ۇيلەر مەن الەۋمەتتىك نىسانداردى جانە ت.ب.سالۋ مەن جوندەۋدى ۇيىمداستىرۋدان كورىنبەك. مىسالى, الداعى ۋاقىتتا ەلىمىزدە كوپتەگەن الەۋمەتتىك ينفراقۇرىلىم نىساندارى سايلاۋشىلاردىڭ تالابى مەن جەرگىلىكتى مەملەكەتتىك باعدارلامالار نەگىزىندە قۇرىلاتىن بولادى. دەگەنمەن بۇل وزگەرىستەردىڭ بارلىعى ءماسليحاتشىلاردىڭ بەلسەندى ازاماتتاردى تارتا وتىرىپ تۇراقتى مونيتورينگ پەن باقىلاۋ جاساۋ جاۋاپكەرشىلىگىن ارتتىرادى, – دەدى ت.مۇقاشەۆ.
سونداي-اق قوعامدىق بىرلەستىك تورعاسى دەپۋتاتتىڭ جۇمىس جاعدايىنىڭ جاسالۋى ماسەلەسىنە توقتالدى. ياعني ءماسليحاتشىلاردى ۇزدىكسىز وقىتۋ جانە دەپۋتاتتار قىزمەتىنىڭ وزگە دە تۇرلەرى تۇجىرىمداماسىن ساپالى ىسكە اسىرۋ ءماسليحاتتار تاراپىنان بىرقاتار ۇيىمداستىرۋشىلىق شارتتى قامتاماسىز ەتۋدى قاجەت ەتەدى. دەپۋتاتتىڭ قىزمەتىن قۇقىقتىق, ۇيىمداستىرۋشىلىق جاعىنان, كاسىبيلىگىن قامتاماسىز ەتۋگە جەكەلەي توقتالعان ت.مۇقاشەۆ: «دەپۋتاتتىڭ قىزمەتىن قارجىلىق قامتاماسىز ەتۋدىڭ مازمۇنى مىنادا: بۇل دەپۋتات قىزمەتىنىڭ (جۇمىسىنىڭ) قىسقاشا سيپاتتاماسى كورسەتىلگەن تىزبەسى, سونداي-اق بۇل ءماسليحاتتىڭ جۇمىسى مەن وكىلەتتىكتەرىن جۇزەگە اسىرۋ ءۇشىن ءماسليحات دەپۋتاتتارى قىزمەتىنىڭ بارلىق تۇرلەرىنە قاجەتتى اقشالاي شىعىنداردىڭ ەسەبى بولىپ تابىلادى. مىسالى, گەرمانيادا ءبىر جەرگىلىكتى دەپۋتاتتىڭ ۇزدىكسىز وقۋىن ۇيىمداستىرۋعا جەرگىلىكتى بيۋدجەتتەن جىل سايىن 12 مىڭ ەۋروعا دەيىن بولىنگەن, ماجارستان, پولشا, چەحيادا شامامەن 4,5 مىڭ ەۋرو ءبولىندى, وڭتۇستىك كورەيادا – 13 مىڭ اقش دوللارىنا دەيىن, رەسەيدە 25 مىڭ رۋبل شاماسىندا بولىنگەن», دەدى. سونداي-اق ت.مۇقاشەۆ دەپۋتاتتاردى بىلتىر اقتوبەدە قابىلدانعان, جۋىردا شىمكەنتتە القالانعان ۇندەۋدى قولداۋعا شاقىردى.
ال وبلىس اكىمى اپپاراتىنىڭ باسشىسى ەركەعالي الىمقۇلوۆ سايلاۋالدى باعدارلامانىڭ ەكىنشى قاعيداتى – ادىلەتتى ەكونوميكا قۇرۋ ەل ەكونوميكاسىنىڭ دامۋ مودەلىن تۇبەگەيلى وزگەرتۋ ارقىلى حالىقتىڭ, بيزنەستىڭ جانە مەملەكەتتىڭ مۇددەسىن بىردەي قورعاۋعا نەگىزدەلەتىنىن ايتا كەلە وڭىردە اتقارىلىپ جاتقان جۇمىستارعا كەڭىنەن توقتالدى. مىسالى, تىكەلەي شەتەلدىك ينۆەستيتسيالاردى تارتۋ بويىنشا وڭىردە وتكەن جىلدىڭ ءىىى توقسانىنىڭ قورىتىندىسى بويىنشا شەتەلدىك ينۆەستيتسيالار كولەمى 331,1 ملن اقش دوللارىن قۇراپ, جوسپار تولىعىمەن ورىندالعان. وتكەن جىلدىڭ قورىتىندىسىمەن 831 ەلدى مەكەننىڭ 719-ى نەمەسە 87,0%-ى اۋىز سۋمەن قامتاماسىز ەتىلدى. سونداي-اق تۇرعىن ءۇي, ءبىلىم, دەنساۋلىق سالالارىندا اتقارىلعان جۇمىستارعا توقتالعان اپپارات باسشىسى وبلىستا سايلاۋالدى باعدارلامادا كورسەتىلگەن مەجەلەر جوسپارعا ساي ىسكە اسىرىلۋدا ەكەنىن مالىمدەدى. وبلىستىق ءماسليحاتتىڭ اگرارلىق سالا, جەر قاتىناستارى جانە تابيعاتتى پايدالانۋ ماسەلەلەرى جونىندەگى تۇراقتى كوميسسيا توراعاسى نۇرالى ءابىشوۆ بايانداماسىندا ەلىمىزدەگى سۋارمالى جەرلەردىڭ 4-تەن 1 بولىگى تۇركىستان وبلىسىنا تيەسىلى ەكەنىن اتاپ ءوتتى.
– اۋىل شارۋاشىلىعى جالپى ءونىمىنىڭ 12 پايىزى وبلىسقا تيەسىلى, ونىڭ ءونىم كولەمى 996,3 ملرد تەڭگەنى قۇرايدى. اۋىل شارۋاشىلىعىنىڭ نەگىزگى كاپيتالىنا 59,8 ملرد تەڭگە, تاماق ءوندىرىسىنىڭ نەگىزگى كاپيتالىنا 7,2 ملرد تەڭگە ينۆەستيتسيالار تارتىلدى. اۋىل شارۋاشىلىعى داقىلدارىنىڭ ەگىس القاپتارى 859,9 مىڭ گەكتارعا ورنالاستىرىلدى, وتكەن جىلدان 14,4 مىڭ گەكتارعا ارتتى. جاڭادان 101 گەكتارعا جىلىجايلار سالىنىپ, جالپى كولەمى 1 569 گەكتارعا جەتتى. بۇل رەسپۋبليكالىق كورسەتكىشتىڭ 71 پايىزىن قۇرايدى, – دەدى ن.ءابىشوۆ.
جيىن سوڭىندا ت.مۇقاشەۆ قوعامدىق بىرلەستىك اتىنان بەلسەندى دەپۋتاتتىق قىزمەتى جانە وبلىستىڭ الەۋمەتتىك-ەكونوميكالىق دامۋىنا قوسقان ەلەۋلى ۇلەسى ءۇشىن بىرقاتار وبلىستىق ءماسليحات دەپۋتاتىن «قۇرمەتتى دەپۋتات» ءتوس بەلگىسىمەن جانە گراموتامەن ماراپاتتادى.
تۇركىستان وبلىسى