قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ القا ماجىلىسىندە قازاقستاننىڭ ودان ءارى يننوۆاتسيالىق-تەحنولوگيالىق دامۋى جونىندەگى شارالار تالقىلاندى, دەپ حابارلايدى Egemen.kz.
ۆەدومستۆو باسشىسى باعدات مۋسين 2022 جىلعى جۇمىس قورىتىندىلارى, سونداي-اق مەملەكەتتىك قىزمەتتەردىڭ ساپاسى مەن قولجەتىمدىلىگىن ارتتىرۋ, حقكو-لاردى جاڭعىرتۋ جانە حالىق پەن بيزنەس ءۇشىن جاڭا تسيفرلىق سەرۆيستەردى ەنگىزۋ, تەلەكوممۋنيكاتسيا جانە اەروعارىش سالالارىن دامىتۋ, مەملەكەتتىك اپپاراتتى تسيفرلىق ترانسفورماتسيالاۋ جانە ەلدىڭ اقپاراتتىق قاۋىپسىزدىگىن نىعايتۋ جونىندەگى جوسپارلار تۋرالى باياندادى.
اتاپ ايتقاندا, جىلجىمايتىن م ۇلىكپەن جاسالاتىن مامىلەلەردى جانە كوممۋنالدىق شارتتاردى ونلاين فورماتقا كوشىرۋ, تاۋەكەلدەردى باسقارۋ جۇيەسىنىڭ دەرەكتەرى نەگىزىندە بيزنەستى تەكسەرۋدى اۆتوماتتاندىرۋ, يننوۆاتورلار مەن جەر قويناۋىن پايدالانۋشىلاردىڭ ءوزارا ءىس-قيمىلى ءۇشىن بىرىڭعاي سەرۆيستى ازىرلەۋ, e-Health, e-Otinish, e-Gov business, Smart Data Ukimet جانە باسقا پلاتفورمالاردى دامىتۋ بويىنشا جۇمىس جالعاسادى.
سونداي-اق «قازاقتەلەكوم» اق, «قازاقستان عارىش ساپارى» ۇك» اق جانە Astana Hub IT-ستارتاپتار تەحنوپاركىنىڭ باسشىلارى بايانداما جاسادى.
پرەمەر-مينيستر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ باسىم مىندەتتەرىنىڭ ءبىرى ازاماتتاردى ساپالى ۇيالى بايلانىسپەن جانە ينتەرنەتپەن جاپپاي قامتاماسىز ەتۋ بولىپ تابىلاتىنىن اتاپ ءوتتى. ونىڭ ايتۋىنشا, ازىرلەنىپ جاتقان «قولجەتىمدى ينتەرنەت» ۇلتتىق جوباسى اياسىندا قاجەتتى شارالار قابىلدانۋى ءتيىس.
«بۇگىندە 5G بايلانىسىن ەنگىزۋ بويىنشا جۇمىس جۇرگىزىلىپ جاتىر, ءبىرىنشى كەزەكتە رەسپۋبليكالىق ماڭىزى بار قالالار مەن وبلىس ورتالىقتارىن قامتۋ جوسپارلانۋدا. سونىمەن قاتار وڭىرلەردە بايلانىس ساپاسىن ارتتىرا وتىرىپ, 3G جانە 4G ستاندارتتارىن دامىتۋدى جالعاستىرۋ قاجەت», دەدى ءاليحان سمايىلوۆ.
ۇكىمەت باسشىسى دارىندى جاستاردى IT-سەكتورعا تارتۋ ءۇشىن تەحنولوگيالىق حابتاردىڭ وڭىرلىك ەكوجۇيەسىن دامىتۋ قاجەتتىلىگىنە ەرەكشە نازار اۋداردى.
«وڭىرلەردەگى جاستاردا وزىق تاجىريبەنى زەردەلەۋ جانە يننوۆاتسيالىق ويلاۋدى دامىتۋعا ءتيىستى مۇمكىندىكتەر, سونداي-اق ءوز يدەيالارىن ىسكە اسىرۋ جانە حالىقارالىق نارىقتارعا تابىستى شىعۋ ءۇشىن قاجەتتى تەحنيكالىق ينفراقۇرىلىم بولۋى ءتيىس. بۇل مىندەتتى شەشۋ ءۇشىن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اكىمدىكتەرمەن ەلىمىزدىڭ بارلىق وڭىرلەرىندە Astana Hub مودەلى بويىنشا تەحنولوگيالىق حابتاردى اشۋ جانە قولداۋ ماسەلەسىن پىسىقتاۋى كەرەك», دەدى ءاليحان سمايىلوۆ.
سونىمەن قاتار پرەمەر-مينيستر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنە قازاقستاندى تسيفرلىق وڭىرلىك حابقا اينالدىرۋ جونىندەگى جول كارتاسىن ازىرلەپ, 1 ناۋرىزعا دەيىن قابىلداۋدى تاپسىردى. وندا ەۋروپا مەن شىعىس ازيانى ەل اۋماعى ارقىلى جالعايتىن ترانسشەكارالىق تالشىقتى-وپتيكالىق ماگيسترالداردى («كاسپي توبج», «باتىس-شىعىس» جانە باسقا دا جوبالار) سالۋ جانە ىلەسپە دەرەكتەر ورتالىقتارىن ىسكە قوسۋ جونىندەگى قادامدار كورسەتىلۋى ءتيىس.
قورىتىندىلاي كەلە, ءاليحان سمايىلوۆ Smart Data Ukimet پلاتفورماسىندا مەملەكەتتىك ورگانداردىڭ بارلىق اقپاراتتىق جۇيەلەرىن ورتالىقتاندىرۋدىڭ, پرواكتيۆتى مەملەكەتتىك قىزمەتتەر تىزبەسىن ودان ءارى كەڭەيتۋدىڭ, ۇلتتىق اقپاراتتىق قاۋىپسىزدىكتى قامتاماسىز ەتۋ بويىنشا كەشەندى شارالار قابىلداۋدىڭ, سونداي-اق عارىشتىق تەحنولوگيالاردى ەكونوميكاعا ينتەگراتسيالاۋدىڭ ماڭىزدى ەكەنىن اتاپ ءوتتى.
«مەملەكەت باسشىسى 2029 جىلعا قاراي تسيفرلىق تەحنولوگيالاردىڭ ەكونوميكاداعى ۇلەسىن ەكى ەسەدەن استام ۇلعايتۋدى تاپسىردى. وسىعان بايلانىستى سالالىق تۇجىرىمدامالاردا جانە مەملەكەتتىك ورگانداردىڭ دامۋ جوسپارلارىندا بارلىق قاجەتتى ءىس-شارالار كورىنىس تابۋى كەرەك. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى «تسيفرلىق» ۆيتسە-مينيسترلەردىڭ قىزمەتىن ۇيلەستىرۋدى كۇشەيتۋى ءتيىس», دەپ تۇيىندەدى ول.