2022 جىلى قازاقستاندا انا مەن بالا ءولىمىنىڭ دەڭگەيى ءبىرشاما تومەندەدى. قازاقستان رەسپۋبليكاسىنىڭ دەنساۋلىق ساقتاۋ مينيسترلىگى جاڭا دەرەكتەردى ۇسىندى, دەپ حابارلايدى Egemen.kz.
ماسەلەن, ەلىمىزدە جۇكتى ايەلدەردى پرەناتالدىق باقىلاۋمەن قامتۋ كۇشەيتىلدى, بۇگىندە ول 99,2%-دى قۇرادى, ونىڭ ىشىندە جۇكتى ايەلدەردى 12 اپتاعا دەيىن ەرتە قامتۋ 5%-عا ءوسىپ, 89,5%-دى قۇرادى, پرەناتالدىق ۋلترادىبىستىق سكرينينگپەن قامتۋ 5%-عا, بيوحيميالىق سكرينينگپەن قامتۋ 10%-عا ءوستى, سونداي-اق بالالاردى 1 جاسقا دەيىن پرواكتيۆتى باقىلاۋمەن جانە سكرينينگپەن قامتۋ 81%-عا دەيىن ۇلعايدى.
ۆەدومستۆو وكىلدەرى حابارلاعانداي, جۇكتى ايەلدەر مەن جاڭا تۋعان نارەستەلەرگە بىلىكتى مەديتسينالىق كومەك كورسەتۋ ءۇشىن 18 ۇرىقتى ساقتاۋ ورتالىعى ۇيىمداستىرىلدى, پرەناتالدىق دياگنوستيكا بويىنشا 150-دەن استام ۋلترادىبىستىق مامان وقىتىلدى.
ءبىر جىلدىڭ ىشىندە مينيسترلىك ماماندارى انالاردىڭ سىرقاتتانۋشىلىعى مەن ءولىمىن تومەندەتۋ ماقساتىندا اۋىر جاعدايداعى جۇكتى, بوساناتىن جانە بوسانعان ايەلدەرگە كۇندەلىكتى مونيتورينگ جۇرگىزىپ كەلدى.
2022 جىلى «ۇلتتىق شۇعىل مەديتسينانى ۇيلەستىرۋ ورتالىعىنىڭ» رەسۋرستارىن پايدالانا وتىرىپ, عىلىمي جانە رەسپۋبليكالىق كلينيكالاردىڭ پروفەسسورلارىمەن جانە جەتەكشى بەيىندى ماماندارىمەن بىرلەسىپ جۇكتىلىك جانە بوسانۋ اعىمى اسقىنعان 910 ايەلگە 1391 مەديتسينالىق قىزمەت كورسەتىلدى. سانيتاريالىق اۆياتسيامەن 200 ۇشۋ ورىندالدى; 21 ايەلگە وپەراتسيا جاسالدى, اۋىر جاعدايدا 180 پاتسيەنت وبلىستىق جانە رەسپۋبليكالىق كلينيكالارعا جەتكىزىلدى.
قابىلدانعان شارالاردىڭ ناتيجەسىندە اۋىر جاعدايداعى ايەلدەردىڭ 1237 نەمەسە 96%-ى قۇتقارىلدى.
سوڭعى 5 جىلدىڭ ىشىندە ەلدە بالا تۋدىڭ ءوسۋى بايقالدى, ول 2021 جىلى 446 مىڭ بالا دۇنيەگە كەلگەن كەزدە ەڭ جوعارى دەڭگەيگە جەتتى, 2022 جىلى 412 مىڭ نارەستە دۇنيەگە كەلدى.
نەوناتالدىق حيرۋرگيانىڭ دامۋىمەن جانە وسى تەحنولوگيالاردىڭ وڭىرلەرگە اۋىسۋىمەن تۋا بىتكەن اقاۋلارى بار جاڭا تۋعان نارەستەلەردىڭ ءومىر ءسۇرۋ دەڭگەيى 86%-دى قۇرادى. ورتاشا العاندا, جىل سايىن تۋا بىتكەن اقاۋلارى بار 1500 جاڭا تۋعان نارەستە حيرۋرگيالىق ەم الادى.
ايتا كەتسەك, قازاقستان - ورتالىق ازيادا تۋعاننان باستاپ كارديوحيرۋرگيالىق وپەراتسيالار جۇرگىزىلەتىن جالعىز مەملەكەت.
2022 جىلى تۋا بىتكەن جۇرەك اقاۋلارى بار بالالارعا 1800-دەن استام اشىق جۇرەككە وپەراتسيا, ونىڭ 75%-ى ءبىر جاسقا دەيىنگى بالالارعا جاسالدى.
ماستەر-كلاسس شەڭبەرىندە گەرمانيا مەن تۇركيادان شەتەلدىك مامانداردى تارتا وتىرىپ, كۇردەلى اقاۋلارى بار 24 بالاعا وپەراتسيا جاسالدى.
اسا اۋىر جاعدايلاردا بالالاردىڭ ءومىرىن قۇتقارۋ ءۇشىن قازاقستاندا تەلەمەديتسينالىق تەحنولوگيالار مەن مەديتسينالىق اۆياتسيا ىسكە اسىرىلدى.
ساناۆياتسيانىڭ 497 ۇشۋى, ونىڭ ىشىندە جاڭا تۋعان نارەستەلەرگە 271 ۇشۋ ورىندالدى, 1072 بالاعا مەديتسينالىق كومەك كورسەتىلدى.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس قازاقستان رەسپۋبليكاسىندا انا مەن بالا دەنساۋلىعىن ساقتاۋ جونىندەگى تۇجىرىمداما بەكىتىلەتىنىن ەسكە سالا كەتەيىك.