قر يدم ازاماتتىق اۆياتسيا كوميتەتى ازەربايجان رەسپۋبليكاسىنىڭ اۆياتسيالىق بيلىك ورىندارىمەن بىرلەسىپ, «ازەربايجان حاۆا يوللارى» اۋە كومپانياسىنىڭ باكۋ – استانا جانە باكۋ – الماتى باعىتتارى بويىنشا تۇراقتى جولاۋشىلار رەيستەرىن قايتا جاڭعىرتۋ ماسەلەسىن پىسىقتادى, دەپ حابارلايدى Egemen.kz.
وسىلايشا, ازەربايجان اۋەكومپانياسى 2023 جىلدىڭ 10 ناۋرىزىنان باستاپ باكۋ – استانا باعىتى بويىنشا اپتاسىنا 2 رەيس جيىلىگىمەن, اتاپ ايتقاندا بەيسەنبى جانە سەنبى كۇندەرى, سونداي-اق 2023 جىلدىڭ 11 ناۋرىزىنان باستاپ باكۋ-الماتى باعىتى بويىنشا اپتاسىنا 2 رەيس جيىلىگىمەن (سارسەنبى, جەكسەنبى كۇندەرى) تۇراقتى جولاۋشىلار رەيستەرىن قايتا باستاۋدى جوسپارلاپ وتىر.
رەيستەر ا-319/ە-190/ب-757 ءتيپتى اۋە كەمەلەرىندە ورىندالادى.
ايتا كەتسەك, قازاقستان مەن ازەربايجان استانالارى اراسىنداعى اۋە قاتىناسىن قالپىنا كەلتىرۋ ەكى ەل اراسىنداعى ساۋدا-ەكونوميكالىق, ينۆەستيتسيالىق, تۋريستىك جانە مادەني-ىسكەرلىك ىنتىماقتاستىقتى ودان ءارى دامىتۋعا سەپتىگىن تيگىزەدى.