قاراعاندى قالاسىندا تاعى ءبىر وقىس وقيعا بولدى. قاڭتاردىڭ 21-ءى كۇنى ساعات 19.00-گە قاراي ششورس كوشەسىندەگى قوسقاباتتى ۇيدە باللونداعى گاز جارىلدى. توتەنشە جاعدايلار دەپارتامەنتى جارىلىستان 2 ادام زارداپ شەگىپ, 3 پاتەر زاقىمدانعانىن حابارلادى.
«قوسقاباتتى ۇيدە كولەمى 5 ليترلىك گاز باللونى جارىلدى, ءورت شىققان جوق. ەكىنشى قاباتتاعى №6 پاتەردىڭ اعاش ەدەنى مەن قابىرعالارى تولىقتاي, ال ەكىنشى قاباتتاعى 4, 5-پاتەرلەر, ءبىرىنشى قاباتتاعى 3-پاتەر جارتىلاي قيراعان. الدىن الا بولجام بويىنشا ونىڭ اۋدانى 36 شارشى مەتردى قۇرايدى», دەپ حابارلادى قاراعاندى وبلىسىنىڭ توتەنشە جاعدايلار دەپارتامەنتى.
ءتيىستى قۇزىرلى ۇيىمدار وقيعا ورنىندا تەرگەپ, تەكسەرۋ امالدارىن جۇرگىزۋدە. تەكسەرۋ اياقتالعانشا جىلۋ جانە ءىشىنارا ەلەكتر جۇيەسى ءوشىرىلدى. تۇرعىندار ۋاقىتشا جاتاقحاناعا ورنالاستىرىلدى. قاراعاندى قالاسىنىڭ اكىمى مەيرام كوجۋحوۆ تۇرعىندارمەن كەزدەسىپ, جاعدايدى باياندادى.
– قازىر ءۇي جىلۋ جۇيەسىنەن اعىتىلدى. سەبەبى ءبىرىنشى كىرەبەرىستە ەدەندەرى, قابىرعالارى قۇلاعان. ءۇيدىڭ ەكىنشى جارتىسىنا, ياعني ەكىنشى كىرەبەرىستە جىلۋ بەرۋگە تىرىسامىز. ونداعى 7-12 پاتەرلەرگە قاۋىپتى كورىپ تۇرعان جوقپىز. ال ءبىرىنشى كىرەبەرىس تۋرالى قورىتىندى ازىرگە شىعارا المايمىز, ساراپشىلار جۇمىس ىستەۋگە ءتيىس, – دەدى قاراعاندى قالاسى اكىمى مەيرام كوجۋحوۆ.
ءۇي تۇندە ق ۇلىپتاپ جابىلدى. تۇرعىندار باعالى زاتتارىن قۇتقارۋشىلار كومەگىمەن الىپ شىقتى.
زارداپ شەككەننىڭ بىرەۋى – 1970 جىلى تۋعان ەر ادام, ەكىنشىسى – 1971 جىلى تۋعان ايەل ادام. ەكەۋىن دە كۇيىك شالعان. قاراعاندى قالاسىنداعى وبلىستىق مەديتسينا ورتالىعىنا جەتكىزىلدى. دەنساۋلىق ساقتاۋ باسقارماسى ءباسپاسوز قىزمەتىنىڭ حابارلاۋىنشا, ناۋقاستاردىڭ ءحالى – ورتاشا اۋىر جاعدايدا. «ەر ادامنىڭ باسى جانە وڭ جاق يىعى كۇيگەن. كومبۋستيولوگيا بولىمىنە جاتقىزىلدى. جاعدايى – ورتاشا اۋىر. ايەل ادامنىڭ وڭ جاق بىلەگى, وڭ جاق يىعى, وڭ جاق سانى كۇيگەن. ول دا كومبۋستولوگيا بولىمىندە جاتىر», دەلىنگەن باسقارمانىڭ مالىمدەمەسىندە.
قاراعاندى