مەملەكەت باسشىسى قاسىم-جومارت توقاەۆتىڭ بىلتىرعى جولداۋدا ايتقان تاعى ءبىر تاپسىرماسىنىڭ ويداعىداي ورىندالعانىنا كۋا بولدىق. دالىرەك ايتساق, كەشە وتكەن جىلدىڭ 1 قىركۇيەگىنە دەيىن ەلىمىزگە اكەلىنگەن شەتەلدىك كولىكتەردى زاڭداستىرۋ باستالدى. وسىلايشا, جۇزدەگەن جۇرگىزۋشىنىڭ جانىن جەگەن ماڭىزدى ماسەلەنىڭ ءتۇيىنى تارقاي ءتۇستى.
ەل پرەزيدەنتى جولداۋدا شەتەلدىك كولىكتەرگە قاتىستى ماسەلەگە نازار اۋدارعانى ەسىمىزدە.
– كەيبىر جاقىن شەتەلدەردەن اكەلىنگەن اۆتوكولىكتەرگە قاتىستى تۇيتكىلدەر بارشاعا ءمالىم. زاڭ اياسىنان تىس قالىپ وتىرعان مۇنداي كولىكتەر قوعامدىق قاۋىپسىزدىككە قاتەر توندىرۋدە. زاڭسىز كولىك اكەلەتىن امال-ءتاسىلدىڭ بارىنە توسقاۋىل قويۋ ءۇشىن باتىل شارالار قابىلداۋ قاجەت. ال بيىلعى 1 قىركۇيەككە دەيىن ەلگە اكەلىنگەن اۆتوكولىكتەرگە قاتىستى احۋالدى رەتتەۋ كەرەك. ولاردى زاڭداستىرۋ ماقساتىندا ۋتيليزاتسيا جانە العاشقى تىركەۋ ءۇشىن تولەنەتىن قارجى كولەمىن 200-250 مىڭ تەڭگەدەن اسىرماي, بارىنە بىردەي جانە ءبىر رەتتىك الىم الۋدى ۇسىنامىن. بۇل – ىزدەۋ سالىنباعان جانە كەدەن راسىمدەرىنەن وتكەن كولىكتەرگە عانا قاتىستى شارا, – دەگەن بولاتىن مەملەكەت باسشىسى.
پرەزيدەنتتىڭ تاپسىرماسىنان كەيىن كولىك جۇرگىزۋشىلەرى ءۇنىمىز جوعارىعا جەتتى دەپ قۋانعان ەدى. سولاردىڭ قاتارىندا الماتىلىق سەيىلبەك ولجابەكوۆ تە بار. 39 جاستاعى تۇرعىن كەشە شەتەلدىك كولىكتى زاڭداستىرعان العاشقى تۇرعىن اتاندى. ول تاقىمىنداعى Toyota Alphard-تى 2019 جىلى ارمەنيادان اكەلگەن ەكەن.
– كوپبالالى اكەمىن. تابىسىمدى ءدال وسى كولىكپەن تابامىن. جولاۋشىلار تاسىمالدايمىن. مەملەكەتتىڭ مەن سەكىلدى جۇرگىزۋشىلەر بەتپە-بەت كەلگەن ماسەلەگە نازار اۋدارعانىنا قۋانىشتىمىن. بۇگىن العاشقىلاردىڭ ءبىرى بولىپ كولىگىمدى زاڭداستىردىم. بۇل – حالىققا بەرىلگەن تاماشا مۇمكىندىك, – دەيدى سەيىلبەك ولجابەكوۆ.
وسى ورايدا «ازاماتتارعا ارنالعان ۇكىمەت» مەملەكەتتىك كورپوراتسياسى شەتەلدىك اۆتوكولىكتەردى زاڭداستىرۋ جۇمىستارىن جىلدام ءارى دۇرىس ورىنداۋدىڭ ءتيىمدى تەتىكتەرىن ۇسىندى. ول ءۇشىن ەڭ الدىمەن كولىك يەسى eGov.kz پورتالى ارقىلى دەرەكتەردى تەكسەرۋگە ءوتىنىش بەرۋى قاجەت. مۇنى دەربەس كومپيۋتەر ارقىلى ىستەۋگە بولادى. كومپيۋتەر جوق بولسا, ەلىمىزدىڭ كەز كەلگەن حالىققا قىزمەت كورسەتۋ ورتالىقتارىنداعى وزىنە-ءوزى قىزمەت كورسەتۋ سەكتورى ارقىلى ءوتىنىش بەرۋگە مۇمكىندىك بار. بۇل رەتتە اتالعان قىزمەتتى ەكىنشى دەڭگەيلى بانكتەردىڭ قوسىمشالارى («Kaspi», «HomeBank») ارقىلى الۋ تەتىكتەرى پىسىقتالىپ جاتقانىن ەسكە سالامىز. سونداي-اق اۆتوكولىكتىڭ تىركەۋ دەرەكتەرى قاتەسىز تولتىرىلۋى قاجەت.
بەرىلگەن ءوتىنىمدى ىشكى ىستەر مينيسترلىگى قارايدى. كولىك يەسىنىڭ جەكە كابينەتىنە وتىنىشتەن باس تارتۋ تۋرالى حابارلاما كەلسە, سەبەبىن ءبىلۋ ءۇشىن مامانداندىرىلعان حالىققا قىزمەت كورسەتۋ ورتالىقتارىنا بارۋدىڭ قاجەتى جوق. دۇرىسى تىكەلەي مەملەكەتتىك ورگانعا حابارلاسقان ابزال. ال ءوتىنىش قابىلدانعان بولسا, اۆتوكولىكتى تەكسەرۋ ءۇشىن مامانداندىرىلعان حالىققا قىزمەت كورسەتۋ ورتالىعىنا ونلاين كەزەككە تۇرۋ قاجەت. ول ءۇشىن مارتەبە پاراعىندا «كەزەككە تۇرۋ» باتىرماسىن باسىپ, مەكەنجايلار تىزىمىندە كورسەتىلگەن ورتالىقتاردىڭ ءبىرىن تاڭداپ, سونىڭدا كۇنى مەن ۋاقىتىن بەلگىلەۋ كەرەك. الدىن الا ونلاين كەزەككە تۇرماعان جاعدايدا, ازاماتتارعا قىزمەت كورسەتىلمەيدى. وسىنى قاپەردە ۇستاعان ابزال.
زاڭداستىرۋعا رۇقسات العان اۆتوكولىكتى مامانداندىرىلعان حالىققا قىزمەت كورسەتۋ ورتالىعىنىڭ تەكسەرۋ پۋنكتىنە بەلگىلەنگەن ۋاقىتتان 20 مينۋت بۇرىن اكەلۋ كەرەك. تالوندى تەكسەرۋ پۋنكتىندە نەمەسە حالىققا قىزمەت كورسەتۋ ورتالىعىنىڭ ءموبيلدى قوسىمشاسى ارقىلى الۋعا بولادى.
تەكسەرۋدى تولىق وتكەننەن كەيىن, اۆتوكولىكتى تىركەۋ ءۇشىن مامانداندىرىلعان حالىققا قىزمەت كورسەتۋ ورتالىعىنىڭ عيماراتىنا ءوتۋ كەرەك. ودان ءارى قىزمەتكەرگە اۆتوكولىككە مەنشىك قۇقىعىن راستايتىن قۇجاتتىڭ تۇپنۇسقاسىن جانە كولىكتىڭ شەتەلدىك تەحنيكالىق پاسپورتىن تاپسىرۋ ماڭىزدى. وسىدان كەيىن العاشقى تىركەۋ ءۇشىن 200 مىڭ تەڭگە, تەحپاسپورت ءۇشىن مەملەكەتتىك باج (4 313 تەڭگە), مەملەكەتتىك ءنومىر ءۇشىن 9 660 تەڭگە مولشەرىندە قارجى تولەيسىز. تولەمدى QR ارقىلى ورتالىقتا تولەۋگە مۇمكىندىك بار. تولەم جۇرگىزىلگەننەن كەيىن سول كۇنى كولىك يەسىنە تەحنيكالىق پاسپورت جانە قازاقستان رەسپۋبليكاسىنىڭ مەملەكەتتىك نومىرلىك بەلگىلەرى بەرىلەدى.
وزدەرىڭىز بىلەتىندەي, شەتەلدىك اۆتوكولىكتەردى زاڭداستىرۋ جۇمىستارى ءبىر رەتتىك اكتسيا رەتىندە ۇيىمداستىرىلىپ جاتىر. بۇل ەرەجەلەر 2023 جىلدىڭ 1 شىلدەسىنە دەيىن كۇشىندە بولادى جانە جەڭىل اۆتوكولىكتەرگە, شاعىن, ورتا اۆتوبۋستارعا (تولىق سالماعى 5 تونناعا دەيىن) جانە شاعىن جۇك اۆتوكولىكتەرىنە (تولىق سالماعى 3,5 تونناعا دەيىن), ونىڭ ىشىندە باسقارۋ ورگاندارىنىڭ وڭ جاقتا ورنالاسۋىنا قاتىستى قولدانىلادى. تىركەلەتىن شەتەلدىك اۆتوكولىكتەرگە جاسىنا جانە ەكولوگيالىق سىنىبىنا تالاپتار قويىلمايدى.
وتكەن جىلدىڭ قازان ايىندا ىشكى ىستەر ءمينيسترى مارات احمەتجانوۆ 2022 جىلدىڭ 1 قىركۇيەگىنە دەيىن ەلىمىزگە 300 مىڭنان اسا شەتەلدىك كولىك كەلگەنىن ايتقان ەدى.