اتىراۋ وبلىسىندا جەر استىنان كونە جادىگەرلەر تابىلدى

استانا. 13 ماۋسىم. اتىراۋ وبلىسىندا قۇندى جادىگەرلەرى مول سارمات ءداۋىرىنىڭ قورعانى تابىلدى. بۇل تۋرالى «24kz» حابارلادى. حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ارحەولوگتەرى كونە جادىگەرلەردىڭ ۇستىنەن ءتۇستى. دالىرەگى, سارمات داۋىرىنە جاتاتىن كونە قورعاننىڭ ءبىر شەتىندە ورنالاسقان قورىمنان قارۋ-جاراق جانە اشەكەي بۇيىمدارمەن بىرگە جەرلەنگەن ايەل مۇردەسى شىققان. ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ ارحەولوگيالىق توبىنىڭ جەتەكشسى مارات قاسەنوۆ: «ماحامبەت اۋدانىنداعى اقجايىق اۋىلى ماڭىنداعى سارماتتار داۋىرىندەگى قورعاندى قازۋدا التىن بىلەزىكتەر مەن سىرعالار, كيىمگە تاعىلعان التىن اشەكەيلەر تابىلدى. بۇل كونە زاتتاردىڭ اراسىندا قانجار مەن سەمسەر, قولا اينا, كەراميكالىق ىدىستاردىڭ سىنىقتارى, ساداق ۇشى بار. قورىم ءبىزدىڭ زامانىمىزعا دەيىنگى V عاسىر مەن ءبىزدىڭ جىل ساناۋىمىزدىڭ V عاسىرى اراسىنداعى كەزەڭگە جاتادى», – دەدى. ارحەولوگتار توبىنىڭ جەتەكشىسىنىڭ ايتۋىنشا, سارماتتار اتىراۋ وبلىسىنداعى قازىرگى كاسپي تەڭىزىنىڭ ويپاتى مەن ورال تاۋىنا دەيىنگى دون مەن ساعىز, جەم وزەندەرىنە دەيىنگى اتىراپتى وسىدان 2,5 مىڭ جىل بۇرىن مەكەندەگەن. بۇگىندە كاسپي ويپاتىندا 100-گە جۋىق وبالار مەن قورعاندار انىقتالدى. تابىلعان جادىگەرلەر كونە تاريحتان سىر شەرتەدى. مىسالى, التىن بۇيىمدار مىسىردا جاسالعان كورىنەدى. قولا اينا گرەكيادا نەمەسە ەفرات جانە تيگر وزەندەرى بويىنداعى مەملەكەتتەردىڭ بىرىندە جاسالۋى مۇمكىن. ارحەولوگتار توبىنىڭ مۇشەسى, ستۋدەنت ارايلىم قالىمجانوۆا: «كوپتەگەن التىن بۇيىمداردى تاۋىپ جاتىرمىز. ارينە, بۇل ءبىز ءۇشىن ۇلكەن مارتەبە دەپ بىلەمىز. جانە بۇل ءبىزدىڭ اتىراۋ ولكەسىنىڭ تاريحىنا قوسقان وزىندىك ۇلەسىمىز دەپ ويلايمىن. تابىلعان جادىگەرلەر باتىس ايماقتا اشىلماي جاتقان تالاي سىردىڭ باسى عانا», – دەيدى. قازىر قورعاندى قازۋ جۇمىستارى ودان ارى جالعاستىرىلۋدا. ودان ءالى دە ءتۇرلى كونە جادىگەرلەر كەزدەسۋى عاجاپ ەمەس. جولدىباي بازار. دەرەككوز: «24kz». فوتو: «24kz».