ەلورداداعى «حان شاتىر» ساۋدا ويىن-ساۋىق ورتالىعىندا «قازاقستان» ۇلتتىق ارناسىنىڭ ۇيىمداستىرۋىمەن «عاجايىپ ءسات-2014» جوباسى باستالدى. استانا جۇرتشىلىعىنا ەتەنە بوپ ۇلگەرگەن بۇل ءدۇبىرلى دودا بيىل 5-ءشى رەت وتكىزىلۋدە. اتالمىش شارانىڭ ۇيىمداستىرۋشىسى قازاقستان ۇلتتىق ارناسى بولسا, قولداۋشىسى «حان شاتىر» ساۋدا ويىن-ساۋىق ورتالىعىنىڭ ماركەتينگ ءبولىمى. جىل سايىن مامىر ايىندا وسى قىزۋ سايىستى وتكىزۋ قازىر داستۇرگە اينالعان.
«عاجايىپ ءسات-2014» اۋەسقويلار سايىسىنىڭ كوزدەگەن ماقساتى بىرەۋ عانا. تاسادا جۇرگەن ونەر يەلەرىنىڭ باعىن اشىپ, ولاردىڭ ونەرلەرىن قالىڭ جۇرتشىلىققا ناسيحاتتاۋ. ەڭ باستىسى, شارا شارتى دا وتە قاراپايىم, ياعني, بەرىلگەن 1 مينۋت ۋاقىت كولەمىندە ۇمىتكەرلەردىڭ ءان سالۋعا, بي بيلەۋگە ونىمەن قوسا ءتۇرلى اسپاپتاردا ويناۋعا مۇمكىندىگى بار. تالانتىمەن بولىسكەن جاننىڭ قابىلەتىنە ودان ءارى باعا بەرەتىن – حالىق. ناقتىراق ايتساق, ارنايى تۇسىرىلگەن ۆيدەو YOUTUBE پورتالى ارقىلى كورەرمەنگە جول تارتادى. ەڭ كوپ داۋىس جيناعان قاتىسۋشى جەڭىمپاز اتانادى. جىل سايىن مامىر مەن شىلدە اراسىندا وتكىزىلىپ تۇراتىن بۇل سايىستىڭ جەڭىمپازدارىنا بەرىلەتىن سىيلىقتار دا جىل سايىن وزگەرىپ وتىرادى. ماسەلەن, بىلتىرعى جىلى 1-ورىنعا تۇركياعا جولداما, 2-ورىنعا IPAD, 3-ورىنعا iphone5 بەرىلگەن بولاتىن. بۇل جولعى سىيلىقتار وزگەشەلەۋ. باس جۇلدە يەگەرلەرىنە گرەكياعا جولداما, 2-ورىن يەمدەنۋشىلەرىنە «RIXOS بۋراباي» قوناق ۇيىنە دەمالىپ كايتۋعا مۇمكىندىك بەرىلسە, ال 3-ورىنعا 100 مىڭ تەڭگە كولەمىندەگى سەرتيفيكات تابىستالعالى وتىر.
ءرابيا كەرىمباي.