ريددەر قازاندىعىنداعى ءورت

جىلىتۋ قازاندىعىنان ءورت شىقتى دە­گەن­دى ەستي سالا وقيعا ورنىنا باردىق. ءورت سون­دىرۋشىلەر تاڭعى ساعات 6.54-تە شىققان ءتىلسىز جاۋدى اۋىزدىقتاپ, اساي-مۇسەيلەرىن جيناستى­رىپ جاتىر ەكەن. كومىر تسەحى تولىقتاي وتقا وران­عان. دەمەك قازاندىققا كومىر جەتكىزىلۋ جاعىنان ­پروبلەما تۋىندايدى. بۇل تىعىرىقتان شىعۋ ءۇشىن قازاندىق جۇمىسى ۋاقىتشا مازۋتقا كوشىرىلەدى. ول تۋرالى اپات بولعان جەرگە كەلگەن وبلىس اكىمى دانيال احمەتوۆ ايتىپ بەردى. ايماق باسشىسى, قازىرگى جاعداي بويىنشا عانا ەمەس, جالپى جىلىتۋ ەلەكتر قازاندىعىنىڭ ماسەلەسىن تۇبەگەيلى شەشۋ جولىن دا ايتتى.

– جىلىتۋ قازاندىعىندا ورىن العان ءورت ءسوندىرىلدى. جاعدايدى باقىلاۋدا ۇستاپ وتىرامىز. ءبىرىنشى قيىنشىلىق – كومىردى قازاننىڭ باسىنا اپارا المايمىز. ماسەلە قاۋىپتى ەمەس. ەكى ساعات ىشىندە ىستەپ تۇرعان ءتورت قازاندىق مازۋتقا كوشىرىلەدى. قازىرگى تاڭدا 380 توننا مازۋت بار. 960 توننا مازۋت جەتكىزىلەدى. تاۋلىگىنە 240 توننا مازۋت پايدالانىلادى. دەمەك بەس كۇننىڭ قورى بار. ال ورتەنگەن تسەح ءۇش كۇن ىشىندە قالپىنا كەلتىرىلەدى, – دەدى ايماق باسشىسى.

سونىمەن قاتار د.احمەتوۆ جىلىتۋ ەلەكتر قازاندىعى باسشىلىعىنىڭ جاۋاپسىزدىعىن, سالعىرتتىعىن سىنعا الىپ وتىر. ايتۋىنشا, قا­زاندىقتىڭ قاراجىرا كومىر كەنىشىنە 2 ملرد 350 ملن تەڭگە قارىزى بار. قازاندىق وكىلدەرى 6 قاراشاداعى جاعدايدان بەرى ماسەلەنى شەشۋ ءۇشىن ەشقانداي ارەكەت جاساماعان كورىنەدى. مازۋت مەملەكەتتىك كەپىلدىكپەن عانا جەتكىزىلىپ وتىر. ەستەرىڭىزگە سالا كەتسەك, 6 قاراشادا قازان­دىق­تىڭ بەسەۋى بىردەي ىستەن شىعىپ, قالادا تو­تەن­شە جاعداي جاريالانعان ەدى. سودان بەرى كەي­بىر تۇرعىن ۇيلەردە قالىپتى تەمپەراتۋرا ساقتا­لىپ تۇرعان. دەگەنمەن جىلۋعا ءزارۋ تۇرعىندار دا از ەمەس.

– ءۇيىمىز سۋىق. بىراق شىداپ, قىستان شىعىپ كەلەمىز. جىلۋ ءۇشىن تولەمدى ۋاقتىلى تولەپ وتىرمىز. ماسەلە تۇبەگەيلى قاشان شەشىلەدى, بىلمەيمىز, – دەيدى كوپقاباتتى ءۇيدىڭ تۇرعىنى ءماۋليا دونەنباەۆا.

ءيا, بيىلعى قىستان جىلىتۋ قازاندىعى اۋپىرىمدەپ شىعاتىن شىعار. الايدا ماسەلە جىلدا قايتالانباۋى ءۇشىن نە ىستەمەك كەرەك؟! بۇل سۇراقتى وبلىس باسشىسىنا قويدىق. دانيال احمەتوۆتىڭ پىكىرىنە قاراعاندا, ماسەلە تۇبەگەيلى شەشىلۋى ءۇشىن قازاندىق تولىعىمەن كوم­مۋنالدىق مەنشىككە ءوتۋى كەرەك. ەگەر مەملەكەت مەنشىگىنە بەرىلەتىن بولسا, قازاندىقتىڭ قارىزى دا جابىلاتىن كورىنەدى.

– قازاندىقتى كوممۋنالدىق مەنشىكە بەرۋ كەرەك دەگەن ۇسىنىستى ۇكىمەتكە جەتكىزەمىز. بىراق بۇل جۇمىس زاڭ اياسىندا اتقارىلۋعا ءتيىس. قازىر پروكۋراتۋرا وكىلدەرى وسى باعىت بويىنشا جۇمىس اتقارىپ جاتىر, – دەدى وبلىس اكىمى.

شىعىس قازاقستان وبلىسى,

ريددەر قالاسى