اۋليەكول اۋدانىندا بىلتىر كۇزدە بولعان الاپات ورتكە قاتىستى سوت ۇكىمى شىقتى. باس پروكۋراتۋرا قىزمەتكەرلەرى تەرگەگەن ىسكە اۋليەكول اۋداندىق سوتى نۇكتە قويدى.
ءورتتىڭ تۇتانۋىنا الەكساندر رەپەيكو ەسىمدى تراكتور جۇرگىزۋشىسى كىنالى بولىپ شىقتى. قىلمىستىق ءىستىڭ دەرەگى بويىنشا, 2022 جىلدىڭ 2 قىركۇيەگىندە ورماندا اعاش دايىنداپ جۇرگەن قاراعايشى ر.ەسماعانبەتوۆ تراكتورشىعا اقىسىن تولەيتىنىن ايتىپ, باعانالى اۋىلىنان باسامان ورمان شارۋاشىلىعىنىڭ №22 تەلىمىنە ۆاگون جەتكىزىپ بەرۋىن سۇرايدى. ا.رەپەيكو كەلىسىمىن بەرەدى. الايدا مەحانيزاتور جۇرگىزىپ جۇرگەن تراكتوردىڭ ۇشقىن سوندىرگىشى بولماعان. وعان قوسا تراكتوردىڭ ءتسيليندرى مەن پورشەنىندە دە اقاۋ بولعان.
تراكتورشى مەجەلى جەردىڭ الىس ەكەنىن بىلە تۇرا, اۋا رايىنىڭ اپتاپ ىستىعى مەن جەلدىڭ ۇدەي باستاعانىنا قاراماستان, تراكتورىنا ۇشقىن سوندىرگىش ورناتپاستان, الگى ۆاگوندى ارتىنا تىركەپ الىپ جولعا شىعىپ كەتەدى. وسىلايشا, جول بويى ارتىنان وت شاشىپ كەلە جاتقان تراكتوردىڭ ۇشقىنى تيگەن قاۋ لاپ ەتە قالىپ, اينالا ءاپ-ساتتە قىزىل جالىنعا ورانعان. ورەكپىگەن جەلگە ىلەسكەن ءتىلسىز جاۋ ەل ەس جيىپ بولعانشا ورماندى شارپىپ, ەلدى مەكەندەرگە ەنەدى.
سالدارىنان جويقىن ءورت 40 مىڭ گەكتارعا جۋىق ورماندى-دالالى القاپتى تىپ-تيپىل ەتىپ, 18 ملرد 774 ملن 283 مىڭ 323,73 تەڭگە شىعىن كەلتىرگەن. وعان قوسا, 91 تۇرعىن ءۇي, 4 شاعىن بيزنەس نىسانى, 33 قورا-قوپسى, 20 اۆتوكولىك, اۋىلشارۋاشىلىق جانە ارنايى تەحنيكا, 122 باس مال ورتەنىپ كەتتى. بۇل شىعىنداردىڭ ەسەبى – 642 ملن 114 مىڭ 735 تەڭگە.
الاپات ءورتتى ءسوندىرۋ كەزىندەگى ارپالىسقا مەملەكەت بيۋدجەتىنەن 2 ملرد 680 ملن 640 مىڭ 278, 37 تەڭگە ءبولىندى.
الەكساندر رەپەيكونىڭ ءىسى سوتتا قىلمىستىق كودەكستىڭ 204-بابىنىڭ 2-تارماعىندا كورسەتىلگەن «وتپەن نەمەسە قاۋiپتiلىگى جوعارى وزگە دە كوزدەرمەن ابايسىز جۇمىس iستەۋ ارقىلى جاسالعان نە اۋىر زارداپتارعا اكەپ سوققان نەمەسە اسا ءىرى زالال كەلتىرگەن ءدال سول ءىس-ارەكەت» جانە قىلمىستىق كودەكستىڭ 341-بابى, 1-تارماعىندا كوزدەلگەن «وتقا سالعىرت قاراۋ سالدارىنان تۇرعىن ءۇي ماڭىنداعى, باۋ-باقشا ۋچاسكەلەرىندەگى اعاشتاردى, سونداي-اق ورمان قورىنا كىرەتىن جانە كىرمەيتىن اعاش-بۇتالاردى جويۋ نەمەسە زاقىمداۋ» قىلمىسى رەتىندە قارالدى.
اقىرى اۋداندىق سوت ا.رەپەيكونى ءبىر جىلعا شارتتى تۇردە باس بوستاندىعىنان ايىرۋ تۋرالى ۇكىم شىعاردى. ال بۇعان دەيىن قاماۋعا الىنعان باسامان ورمان شارۋاشىلىعىنىڭ ديرەكتورى اسحات جاقاشوۆقا قاتىستى تەرگەۋ امالدارى ءالى ءجۇرىپ جاتىر.
قوستاناي وبلىسى