ءاليحان سمايىلوۆ جاڭا يندۋستريالىق جوبالار پۋلىن كەڭەيتۋدى تاپسىردى

يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ حابارلاۋىنشا, ونەركاسىپ سالاسىندا 2022 جىلدىڭ قورىتىندىسى بويىنشا ءوسىم 1,1%-دى قۇرادى. اتاپ ايتقاندا, وڭدەۋ ونەركاسىبىندەگى ءوندىرىس كولەمى 3,4%-عا ءوستى. قالعان سەكتورلار دا تۇگەلگە دەرلىك  ءوسىم كورسەتتى.  

سونىمەن قاتار جالپى قۇنى 2 ترلن تەڭگەنى قۇرايتىن 160 جوبا ىسكە اسىرىلدى, 14,4 مىڭ جۇمىس ورنى قۇرىلدى. قىزىلوردا وبلىسىندا شىنى ءوندىرىسى بويىنشا, اتىراۋ وبلىسىندا پوليپروپيلەن, قاراعاندى وبلىسىندا اۆتوموبيل شينالارى, شىمكەنت قالاسىندا اليۋميني بانكالارىن شىعارۋ سياقتى نەگىزگى جوبالار ىسكە قوسىلدى. جامبىل وبلىسىنداعى ازوت-فوسفور تىڭايتقىشتارىن ءوندىرۋ قۋاتى 2 ەسەگە ۇلعايتىلدى. 

القا ءماجىلىسى اياسىندا قاتىسۋشىلار ونەركاسىپ, قۇرىلىس, كولىك جانە گەولوگيالىق سالالاردى ودان ءارى دامىتۋ جونىندەگى جوسپارلاردى, سونداي-اق تۇرعىن ءۇي-كوممۋنالدىق شارۋاشىلىق سالاسىنداعى ءىس-شارالاردى تالقىلادى. 

پرەمەر-مينيستر ءوز سوزىندە وسى جىلى يندۋستريا جانە ينفراقۇرىلىمدىق دامۋ مينيسترلىگىنىڭ الدىندا قازىرگى سىن-قاتەرلەرگە توتەپ بەرەتىن بىرقاتار ماڭىزدى مىندەت تۇرعانىن اتاپ ءوتتى. ونىڭ سوزىنشە, تاۋ-كەن ءوندىرۋ سالاسىن دامىتۋعا سەرپىن بەرىپ, وڭدەۋ ونەركاسىبىندە جاڭا وندىرىستەر قۇرۋ جونىندەگى جۇمىستى كۇشەيتۋ قاجەت. 

«ەكونوميكانى ءارتاراپتاندىرۋ قارقىنىن تومەندەتۋگە بولمايدى. ءبىزدىڭ الدىمىزدا جىل سايىن شامامەن 4-5% دەڭگەيىندە ەلدىڭ ءجىو-ءنىڭ تۇراقتى ءوسۋىن قامتاماسىز ەتۋ مىندەتى تۇر. وسىعان بايلانىستى يندۋستريا جانە ينفراقۇرىلىمدىق دامۋ مينيسترلىگى وڭىرلەردىڭ اكىمدىكتەرىمەن بىرلەسىپ, ونىڭ ىشىندە 2023 جىلى دا يندۋستريالىق جوبالار پۋلىن كەڭەيتۋى قاجەت. اسىرەسە يمپورتتى الماستىرۋعا باسا نازار اۋدارىلۋى ءتيىس», دەدى ءاليحان سمايىلوۆ. 

بۇل رەتتە ول مونوقالالاردىڭ دامۋىن ەسكەرۋ ماڭىزدى ەكەنىن ايتتى. ونداعى جاڭا كاسىپورىندار حالىقتى قوسىمشا جۇمىسپەن قامتاماسىز ەتەدى.  

سونداي-اق ۇكىمەت باسشىسى قازاقستاندىقتاردىڭ اۆتوجولداردىڭ ساپاسىنا, ونىڭ ىشىندە جۇرگىزىلىپ جاتقان جوندەۋ جۇمىستارىنا قاتىستى شاعىمدارى بار ەكەنىن اتاپ ءوتتى.  

«جوندەلگەن ۋچاسكەلەر قايتادان ءجيى بۇزىلىپ جاتادى. جوندەۋ جۇمىستارى ادامدار ءۇشىن ەمەس, جول جۇمىسشىلارىنىڭ وزدەرى ءۇشىن جاسالاتىن سياقتى. مارات كارىمجان ۇلى (قاراباەۆ – قر يدم باسشىسى), بۇل ماسەلەنى ەرەكشە باقىلاۋدا ۇستاپ, ونى ءتيىمدى شەشۋگە مۇمكىندىك بەرەتىن شارالار كەشەنىن ازىرلەۋ قاجەت», دەدى ءاليحان سمايىلوۆ.  

ونىڭ ايتۋىنشا, بۇل ماسەلەدە ءتيىمدى جوسپارلاۋ, كەلىسىمشارتتاردى ەنگىزۋ, تەحنيكالىق قاداعالاۋدى كۇشەيتۋ, تسيفرلاندىرۋ جانە ت. ب. اسا ماڭىزدى.  

سونىمەن قاتار وتىرىس بارىسىندا پرەمەر-مينيستر قازاقستاننىڭ كولىك جۇيەسىن حالىقارالىق دالىزدەرمەن ودان ءارى ينتەگراتسيالاۋ بويىنشا جۇمىستىڭ ماڭىزدىلىعىن اتاپ ءوتتى. بۇل ەلىمىزگە ايماقتاعى نەگىزگى «ترانزيتتىك حابتاردىڭ» بىرىنە اينالۋعا, سونداي-اق اقتاۋ جانە قۇرىق پورتتارىن دامىتۋعا, «اقتاۋ تەڭىز پورتى» اەا بازاسىندا لوگيستيكالىق حاب قۇرۋعا, قتج ترانسفورماتسيالاۋعا, تەمىرجولدار سالۋعا جانە جىلجىمالى قۇرامدى جاڭارتۋعا مۇمكىندىك بەرەدى.  

ونىڭ ايتۋىنشا, تۇرعىن ءۇي قۇرىلىسىندا جانە ينجەنەرلىك ينفراقۇرىلىمدى جاڭعىرتۋدا بارلىق جوسپارلانعان كورسەتكىشتەرگە قول جەتكىزۋدى قامتاماسىز ەتۋ قاجەت. 

قورىتىندىلاي كەلە, پرەمەر-مينيستر «KAZNEDRA» اقپاراتتىق پلاتفورماسىن ونەركاسىپتىك پايدالانۋعا بەرۋدى جەدەلدەتۋدى, Minerals.gov.kz جەر قويناۋىن پايدالانۋشىلاردىڭ بىرىڭعاي پلاتفورماسىنداعى فۋنكتسيالاردى اۆتوماتتاندىرۋدى, ارنايى ەكونوميكالىق ايماقتاردىڭ تيىمدىلىگىن ارتتىرۋ بويىنشا ولاردىڭ جۇمىسىنىڭ جاڭا مودەلىن ەنگىزۋ ارقىلى جان-جاقتى شارالار قابىلداۋدى,  شيكىزاتپەن قامتاماسىز ەتۋ جانە دايىن ءونىمدى وتكىزۋ ءۇشىن وتاندىق كاسىپورىندارعا قولداۋ كورسەتۋدى تاپسىردى.