اباي وبلىسىندا ەت وڭدەۋ ونەركاسىبى قايتا جانداناتىن ءتارىزدى. كەزىندە ەت وڭدەۋدە كۇللى كەڭەس وداعىنا ءمالىم بولعان سەمەيدە 2025 جىلى جاڭا ەت كومبيناتى ىسكە قوسىلادى دەپ جوسپارلانىپ وتىر. ينۆەستور دا تابىلىپتى. «ەۋرازيا اگروحولدينگ» كومپانياسىنا جەر تەلىمى دە بەرىلىپتى. ينۆەستور ەندىگى ەكى جىلىن كاسىپورىندى ىسكە قوسۋعا كۇش سالادى.
جوبانىڭ قۇنى دا قوماقتى. شامامەن 18 ملرد تەڭگەنى قۇرايدى. كومبينات ىسكە قوسىلاتىن بولسا, 200-دەن استام جاڭا جۇمىس ورنى اشىلادى. كومبيناتتا جوسپار بويىنشا مالدى سويۋدان باستاپ ءونىمدى ەكسپورتقا شىعارۋعا دەيىنگى تسيكل جۇزەگە اسادى. بۇل جوبا ەت ونىمدەرىن ەكسپورتتاۋمەن قاتار, ىشكى نارىقتى دا قامتاماسىز ەتۋگە مۇمكىندىك بەرەدى.
اباي وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى رۇستەم ۆوروشيلوۆتىڭ ايتۋىنشا, جۇرگىزىلىپ جاتقان جۇمىستاردىڭ باسىم بولىگى ينۆەستيتسيا تارتۋعا باعىتتالعان. ەت كومبيناتى جوباسى – وسىنداي ءىرى جوبالاردىڭ ءبىرى.
«سەمەي قالاسىنىڭ اۋماعىندا ء«وندىرىس» يندۋستريالدى ايماعى بار. زاڭناماعا سايكەس, مۇنداي ايماقتاردا ەكونوميكانىڭ باسىم سەكتورلارىنىڭ وڭدەۋشى كاسىپورىندارى قۇرىلادى. اتالعان سەكتورلار ۇلتتىق جوبالار اياسىندا سۋبسيديالاۋ ارقىلى قارجىلاندىرىلادى. ينۆەستورلارعا جۇمىسىمىزدى كورسەتۋ ءۇشىن جاڭا كاسىپورىندار قۇرۋ مىندەتىن العا قويىپ وتىرمىز. ماسەلەن, وتكەن جىلدىڭ قاراشا ايىندا وبلىس اكىمى نۇرلان ۇرانحاەۆ ورىنبوردا وتكەن قازاقستان مەن رەسەيدىڭ وڭىرارالىق ىنتىماقتاستىق فورۋمىنا قاتىسىپ, مەموراندۋمدارعا قول قويدى. وسىلايشا, وڭىرگە ينۆەستورلاردى تارتۋعا قاجەتتى قادامدار جالعاسۋدا», دەيدى ر.ۆوروشيلوۆ.
البەتتە, جاڭاسى جاقسى عوي. بىراق ەسكىسىن دە ەستەن شىعارماعان ءجون سياقتى. سەمەيدە كەڭەستىك كەزەڭدە اتاعى الىسقا كەتكەن ءىرى كاسىپورىنداردىڭ ءبىرى سانالعان ەت كومبيناتى قازىر قاڭىراپ تۇر دەۋگە بولادى. كاسىپورىننىڭ تولىق قۋاتىندا جۇمىس ىستەۋىن توقتاتقالى قاشان... كەتەۋى دە كەتىپ-اق تۇر. توقىراۋ جىلدارى تالان-تاراجعا ءتۇستى. ۇستاعاننىڭ قولىندا, تىستەگەننىڭ اۋزىندا كەتتى. 2000 جىلدارى كاسىپورىن جۇمىسى جاندانا باستاپ ەدى. وكىنىشكە قاراي, ول دا ۇزاققا بارمادى. بۇدان كەيىن جۇمىسى توقتاپ, تۇرالاپ قالعان كومبيناتقا كىمدەر يەلىك ەتپەدى. ينۆەستيتسيا دا تارتىلدى, بانكروتقا دا ۇشىرادى. وتىز جىلعا جۋىق ۋاقىتتا وتىزعا جۋىق باسشىلىق اۋىستى. ازىرگە عيماراتتارى قاڭىراپ, قابىرعالارى قاقىراپ, قاراۋسىز تۇر. وبلىستىڭ اتقارۋشى بيلىگى بۇعان دا نازار اۋدارىپ قويسا جاقسى بولار ەدى.
ەرزات جانات ۇلى,
جۋرناليست
سەمەي